އިދިކޮޅުގެ ވާހަކައަށް ބަޖެޓް ކޮމިޓީ މުގައްރިރު: ޤައުމަށް ޙާލަތެއް ކުރިމަތިވެފައި ނެތް އިރުވެސް ދަރަނި އެހާ ބޮޑު!
އިދިކޮޅުން އެފަދަ ވާހަކަ ދެއްކުމުން ސީރިއަސްކޮށް ނަންގަވަންވެސް އުނދަގޫ
ރާއްޖެޓީވީގެ \"ފަލަސުރުޙީ\" ޕްރޮގްރާމްގައި ބައިވެރިވެވަޑައިގެން ބަޖެޓާ ގުޅޭގޮތުން މެމްބަރު ނާޝިޒް ވާހަކަ ދައްކަވަނީ
ޤައުމަށް ޙާލަތެއް ކުރިމަތިވެފައި ނެތް އިރުވެސް ވޭތުވެދިޔަ ސަރުކާރުގެ ދަރަނި ނުހަނު ބޮޑު ކަމަށް ބަޖެޓް ދިރާސާކުރަމުން އަންނަ ކޮމިޓީގެ މުޣައްރިރު ކިނބިދޫ ދާއިރާގެ މެމްބަރ މުހައްމަދު ނާޝިޒު ވިދާޅުވެއްޖެއެވެ.
މިހާރު ސަރުކާރުން ހުށަހަޅާފައިވާ ބަޖެޓަކީ ބުއްދި ސަލާމަތުން ހުރެގެން މީހަކު ވޯޓުދޭނެ ބަޖެޓެއް ނޫން ކަމަށާއި، ބަޖެޓް މިހާރު އޮތް ގޮތަށް ފާސްކޮށްގެން ރައްޔިތުން ފުނޑިގެން ދާނެ ކަން ފާހަގަ ކުރައްވައި ބަޖެޓް އަނބުރާ ގެންގޮސް 25 ބިލިއަން ރުފިޔާއަށް ކުޑަކުރަން މަޖިލީހުގެ މައިނޯރިޓީ ލީޑަރު އޭދަފުށި ދާއިރާގެ މެމްބަރު އަހުމަދު ސަލީމް ވަނީ ގޮވާލައްވާފައެވެ. އަދި އިދިކޮޅުގެ ބައެއް އިތުރު މެމްބަރުންވެސް ވަނީ ބަޖެޓަށް ފާޑު ވިދާޅުވެ ވާހަކަ ދައްކަވާފައެވެ.
އެކަމާ ގުޅޭގޮތުން ރާއްޖެޓީވީގެ "ފަލަސުރުޙީ" ޕްރޮގްރާމްގައި ވާހަކަ ދައްކަވަމުން ނާޝިޒް ވިދާޅުވީ، އިދިކޮޅުން އެފަދަ ވާހަކަ ދެއްކުމުން ސީރިއަސްކޮށް ނަންގަވަންވެސް އުނދަގޫ ކަމަށެވެ. އެގޮތުން ވެރިކަން ނިމިގެން އައިރު ޔޫޒަބަލް ރިޒާވްގައިވެސް ހުރީ 200 މިލިއަން ޑޮލަރުކަން ފާހަގަ ކުރައްވައި ނާޝިޒް ވިދާޅުވީ، އެއީ އެއްވެސް އިޤްތިސާދީ ޚާއްސަ ޙާލަތެއް ނައިސް، އާމްދަނީ އަށް ދަތިކަމެއް ނައިސް އަދި ރާއްޖޭގެ އެރައިވަލްވެސް އަންދާޒާ ކުރި ވަރަށް އިތުރުވަމުން އައިއިރުގެ ޙާލަތު ކަމަށެވެ.
އޭގެ އިތުރުން، ވެރިކަން ފެށިގެން އައިއިރު 30 ބިލިއަނުގައި ހުރި ދަރަނި ވެރިކަން ނިމުނު އިރު ހުރީ 80 ބިލިއަނާ ގާތަށް އަރާފައިކަން ފާހަގަ ކުރައްވައި ނާޝިޒް ވިދާޅުވީ، އޭރު ރާއްޖޭގެ ވަސީލަތްތައްވެސް ގެންދިޔައީ ބަހާ ހުސް ކުރަމުން ކަމަށެވެ.
ނާޝިޒް އިތުރަށް ވިދާޅުވީ، ދަރަނި މޭންޖް ކުރަން މިހާ އުދަގޫ ޙާލަތަށް ކަންކަން ދިޔައީ އޭރުގެ ސަރުކާރުން ކަންކަން ކޮށްފައިވާ ގޮތުގެ ސަބަބުން ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 34.7 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާއެވެ. މި ފައިސާގެ 62.3 އިންސައްތަ ހޭދަވަނީ ރިކަރަންޓް ހަރަދަށެވެ. އަދި ކެޕިޓަލް އެކްސްޕެންޑިޗަރއަށް ހަރަދުވަނީ 37.7 އިންސައްތައެވެ. ބާކީ 1.5 ބިލިއަން ރުފިޔާ ހަރަދުކުރުމަށް ކަނޑައަޅާފައިވަނީ ދައުލަތުގެ ދަރަނި އަދާކުރުމަށެވެ.
