މަޝެރާނޯ ފުޓްބޯޅަ ކުޅުން ހުއްޓާލައިފި

އާޖެންޓީނާގެ މިޑްފީލްޑަރު ހަވިއޭ މަޝެރާނޯ ފުޓްބޯޅަ ކުޅުން ހުއްޓާލައިފިއެވެ.

މީގެ ކުރިން ކުރީގެ ބާސެނޯލާ އާއި ލިވަޕޫލުގެ ފަހަތް ބެލެހެއްޓުމުގައި މުހިންމު ދައުރެއް އަދާކުރި މަޝެރާނޯ ވަނީ އާދިއްތަ ދުވަހު ފުޓްބޯޅަ ކުޅުން ހުއްޓާލިކަން އިއުލާނުކޮށްފައެވެ. ފުޓްބޯޅަ ކުޅުމުގައި 17 އަހަރު ހޭދަކުރި މަޝެރާނޯ ބުނީ މިއީ އޭނާގެ ކެރިއަރު ނިންމާލަން އެންމެ ރަނގަޅު ވަގުތު ކަމަށާއި، ކުޅުން ހުއްޓާލަން ނިންމީ ފާއިތުވި މަސްތަކުގައި ކަންތައް ދިމާވި ގޮތުން ވަރަށް ބޮޑަށް ވިސްނުމަށްފަހު ކަމަށެވެ.

އުމުރުން 36 އަހަރުގައި މަޝެރާނޯ ފުޓްބޯޅަ ކުޅުން ހުއްޓާލިއިރު، އޭނާ އެންމެ ފަހުން ކުޅެފައިވަނީ އުފަން ގައުމު އާޖެންޓީނާގެ އެސްޓޫޑިއާންޓޭސް ޑި ލާ ޕްލާޓާއަށެވެ. މިދިޔަ އަހަރުގެ ނޮވެމްބަރު މަހު އެސްޓޫޑިއާންޓޭސްއާ ގުޅުނު މަޝެރާނޯ ވަނީ އެ ޓީމަށް 11 މެޗު ކުޅެދީފައެވެ. އޭގެ ކުރިން އޭނާ ވަނީ ޗައިނާގެ ހެބެއީ ޗައިނާ ފޯޗިއުންއަށްވެސް ކުޅެފައެވެ.

މަޝެރާނޯ ފުޓްބޯޅައިގައި ވިދާލީ ލިވަޕޫލާއި ބާސެލޯނާގައެވެ. ލިވަޕޫލުގައި ކާމިޔާބު ހަތަރު ސީޒަން ހޭދަކުރި މަޝެރާނޯ ވަނީ އެ ކުލަބަށް 139 މެޗު ކުޅެދީފައެވެ. އޭގެ ފަހުން ބާސާއަށް ބަދަލުވެ ސެންޓްރަލް ޑިފެންޑަރެއްގެ އިތުރުން މެދުތެރެއަށްވެސް ގިނަ މެޗުތައް ކުޅެފައިވާ މަޝެރާނޯ ވަނީ ބާސާއެކު 18 މުބާރާތް ކާމިޔާބުކޮށްފައެވެ. އޭގެ ތެރޭގައި ހަތަރު ފަހަރު ހޯދި ސްޕެނިޝް ލީގާއި، ދެ ފަހަރު ހޯދި ޔުއެފާ ޗެމްޕިއަންސް ލީގު ހިމެނެއެވެ. އެކަމަކު އެ ކުލަބަށް ކުޅެދިން 334 މެޗުން އޭނާއަށް ޖެހުނީ އެންމެ ލަނޑެކެވެ.

އަދި މަޝެރާނޯ ވަނީ އިންގްލެންޑުގެ ވެސްޓް ހޭމް ޔުނައިޓެޑާއި، ބްރެޒިލްގެ ކޮރިންތިއަންސް އަދި އާޖެންޓީނާގެ ރިވާ ޕްލޭޓަށްވެސް ކުޅެފައެވެ.

އާޖެންޓީނާގެ ގައުމީ ފުޓްބޯޅަ ޓީމަށް 147 މެޗު ކުޅެދީފައި މަޝެރާނޯ ވަނީ 2014 ވަނަ އަހަރުގެ ފީފާ ވޯލްޑް ކަޕުގެ ފައިނަލުގައި އާޖެންޓީނާ ވާދަކުރިއިރު، މުހިންމު ދައުރެއް އަދާކޮށްފައެވެ. އަދި މަޝެރާނޯ ވަނީ އާޖެންޓީނާއާއެކު 2004 އަދި 2008 ވަނަ އަހަރުގެ އޮލިމްޕިކް ގޭމްސްގެ ފުޓްބޯޅަ އިވެންޓުން ރަން މެޑަލް ހޯދާފައެވެ.