އިންޑޯ ބާސްކެޓްބޯޅަ ކޯޓުގެ މަސައްކަތް އަންނަ އަހަރު ފެށިގެންދާނެ: މަޙްލޫފް

ބާސްކެޓްބޯޅައިގެ އިންޑޯ ކޯޓުގެ މަސައްކަތް އަންނަ އަހަރު ފެށިގެންދާނެ ކަމަށް އުންމީދު ކުރައްވާ ކަމަށް ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވެއްޖެއެވެ.

ބާސްކެޓް ބޯޅައަށް ވަކި ހާއްސަ އިންޑޯ ކޯޓެއް ނެތުން އެއީ ބާސްކެޓްބޯޅަ ކުޅުންތެރިންގެ ބޮޑު ޝަކުވާއެކެވެ. އެގޮތުން ބާސްކެޓްބޯލް އެސޯސިއޭޝަން އޮފް މޯލްޑިވްސް (އެމްބީއޭ) އިންވެސް ވަނީ ބާސްކެޓްބޯޅައަށް ވަކި ހާއްސަ އިންޑޯ ކޯޓެއް ނެތުމުން އެކަމުގެ ތަކުލީފު ބާސްކެޓްބޯޅަ އާއިލާއިން ކުރަން ޖެހޭ ކަމަށް ބުނެފައެވެ.

ރާއްޖެޓީވީގެ "ބަޖެޓު 2021" ޕްރޮގްރާމުގައި ވާހަކަދައްކަވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ވިދާޅުވީ ބާސްކެޓްބޯޅަ އާއިލާއިން އިންޑޯ ކޯޓެއް ބޭނުންވާ މިންވަރު އެމަނިކުފާނަށް އެނގިލައްވާ ކަމަށެވެ. އަދި އަންނަ އަހަރުގެ ބަޖެޓަކީ ބާސްކެޓްބޯޅަ އާއިލާއިން މިހާރު އުފުލަމުން އަންނަ ތަކުލީފަށް ނިމުން އައިސް، އިންޑޯ ބާސްކެޓްބޯޅަ ކޯޓުގެ މަސައްކަތް ފެށިގެންދާނެ އަހަރު ކަމަށްވެސް ވިދާޅުވިއެވެ.

ވަޒީރު އިތުރަށް ވިދާޅުވީ ކުޅިވަރާ ބެހޭ ވުޒާރާއިން އަންނަ އަހަރު ކުރާ އެންމެ ބޮޑު އުންމީދަކީ އިންޑޯ ބާސްކެޓްބޯޅަ ހޯލުގެ މަސައްކަތް ފެށިގެންދިޔުން ކަމަށާއި، އެކަމަށް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙު މިހާރު މަގު ކޮށާދެއްވާފައިވާ ކަމަށެވެ. އަދި އެ މަސައްކަތް ކުރުމުގައި ޚާރިޖީ ވަޒީރު އަބްދުﷲ ޝާހިދުގެ އެއްބާރުލުން ލިބިވަޑައިގަންނަވާ ކަމަށްވެސް ވަޒީރު ވިދާޅުވިއެވެ.

ވަޒީރު ވިދާޅުވީ ބާސްކެޓްބޯޅައިގެ އިންޑޯ ކޯޓުގެ މަސައްކަތް މިހާރު ބަޖެޓު ކުރެވިފައިވާ ކަމަށެވެ. އަދި ބާސްކެޓްބޯޅަ ކަހަލަ ކުޅިވަރުތައް ހަމައެކަނި މާލެއަށް ފޯކަސްކޮށްފައި އޮންނަ އޮތުން މި ސަރުކާރުން ބަދަލުކުރާނެ ކަމަށާއި، އެ ކުޅިވަރުތައް އަތޮޅުތެރެއަށް ގެންދަން ޖެހޭ ކަމަށްވެސް ވިދާޅުވިއެވެ.

ބާސްކެޓްބޯޅަ މުބާރާތްތައް މިހާރު ޒުވާނުންގެ މަރުކަޒުގެ އެތެރޭ ކޯޓުގައި ބާއްވާއިރު، އެ ކޯޓުގައި އެކި ކުޅިވަރުތަކުގެ މުބާރާތްތައްވެސް އަންނަނީ ބާއްވަމުންނެވެ. އެގޮތުން މިހާތަނަށް ވޮލީބޯޅަ މުބާރާތްތައްވެސް ޒުވާނުންގެ މަރުކަޒުގެ އެތެރޭ ކޯޓުގައި ބާއްވާއިރު، އަންނަ އަހަރު ވޮލީބޯޅައަށްވެސް އިންޑޯ ކޯޓެއް އެޅުމަށް ސަރުކާރުން ވަނީ ނިންމާފައެވެ.