އިސްލާމިކް މިނިސްޓްރީން އިންތިޒާމުކޮށްގެން ކުރިއަށް ގެންދާ "ކީރިތި ގުރުއާން ބަލައިގެން ކިޔެވުމުގެ ގައުމީ މުބާރާތް 2020" ފަށައިފިއެވެ.

އެ މިނިސްޓްރީއިން ބުނީ މީގެ ކުރިން ކީރިތި ގުރުއާން ކިޔެވުމުގެ ގައުމީ މުބާރާތް ބާއްވަމުންއައި އުސޫލާ ހިލާފަށް މިފަހަރު މި މުބާރާތް ކުރިއަށްގެންދަނީ ބަލައިގެން ކިޔެވުމަށް ހާއްސަ މުބާރާތެއްގެ ގޮތުގައިކަމަށެވެ. އަދި ކޮވިޑުގެ ހާލަތާ ގުޅިގެން މިފަހަރު މުބާރާތް ކުރިއަށް ގެންދަން ނިންމާފައި ވަނީ ވަރޗުއަލްކޮށެެވެ.

މި މުބާރާތް ދެ ކެޓަގަރީއަކަށް ބަހާލައިގެން ގެންދާއިރު މި ދެ ކެޓަގަރީއަކީ މުޖައްވަދުކޮށް (ދިގު ރާގަށް) އަދި ހަދަރުކޮށް (ކުރު ރާގަށް) ކިޔެވުމެވެ. މުބާރާތް ބޭއްވުމަށް މިނިސްޓްރީއިން ނިންމާފައި ވަނީ ދެ ބުރަކަށް ބަހާލައިގެންނެވެ.

އެގޮތުން ފުރަތަމަ ބުރަކީ އޮޑިޝަންގެ ބުރެވެ. މި ބުރު ކުރިއަށްދާނީ 28 ނޮވެމްބަރ 2020 ގެ ނިޔަލަށެވެ. އަދި ފައިނަލް ނުވަތަ އެންމެ ފަހު ބުރު ކުރިއަށް ގެންދިއުމަށް ހަމަޖެހިފައި ވަނީ 13 ޑިސެމްބަރ 2020 ފެށިގެން 17 ޑިސެމްބަރ 2020 ގެ ނިޔަލަށެވެ.

މި މުބާރާތުގައި ބައިވެރިވެވޭނީ ހަމައެކަނި ދިވެހިންނަށެވެ. އަދި މުބާރާތުގައި ބައިވެރިވުމަށްޓަކައި ރަޖިސްޓްރީވުމާ އެކު އޮޑިޝަންގެ ވީޑިއޯ އަޕްލޯޑު ކުރަންޖެހެއެވެ. ވީޑިއޯ އަޕްލޯޑު ކުރުމާއި ރަޖިސްޓްރީވުން ކުރިއަށް ދާނީ މުބާރާތައް ހާއްސަކުރެވިފައިވާ ޕޯޓަލް މެދުވެރިކޮށެވެ.

މުބާރާތުގައި ބައިވެރިވެވުމުން ކެންޑިޑޭޓަށް ރަޖިސްޓްރީ ވެވުނުކަމުގެ މެސެޖު ލިބިގެން ދާނެއެވެ. އިސްލާމިކް މިނިސްޓްރީން ބުނީ މުބާރާތާއި ބެހޭ އިތުރު މައުލޫމާތު މުބާރާތުގެ އުސޫލުގައި ވާނެ ކަމަށާ އުސޫލު ޕޯޓަލްއިން ލިބޭނެ ކަމަށެވެ. މި ޕޯޓަލްއަށް ވަދެވޭނީ އިސްލާމިކް މިނިސްޓްރީގެ ވެބްސައިޓް މެދުވެރިކޮށެވެ.