އެމްއެމްއޭގެ ކަންބޮޑުވުމަކީ އާމްދަނީ ނުލިބި ޕީއެސްއައިޕީ މަޝްރޫއުތައް ހުއްޓާލަން ޖެހުން
ހިންގުމުގެ ހަރަދު ފޫބެއްދުމަށް ހަމަޖެހިފައިވަނީ ހިލޭ އެހީންނާއި ލިބޭ އާމްދަނީ އިން
އެމްއެމްއޭގެ އިސްވެރިން މަޖިލީހުގެ ބަޖެޓު ދިރާސާކުރާ ކޮމިޓީގައި
އަންނަ އަހަރަށް ލަފާ ކުރާ ދައުލަތުގެ ބަޖެޓުގައި ކަނޑައަޅާފައިވާ މިންވަރަށް އާމްދަނީ ނުލިބިއްޖެ ނަމަ ބައެއް ޕީއެސްއައިޕީ ޕްރޮޖެކްޓުތައް ހުއްޓާލަން ޖެހިދާނެ ކަމުގެ ކަންބޮޑުވުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފިއެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓުގައި ކަނޑައަޅާފައިވާ މިންވަރަށް އާމްދަނީ ނުލިބިއްޖެ ނަމަ ބައެއް ޕީއެސްއައިޕީ ޕްރޮޖެކްޓުތައް ހުއްޓާލަން ޖެހިދާނެ ކަމުގެ ކަންބޮޑުވުން އެ އިދާރާއިން ފާޅުކޮށްފައިވާއިރު އެމްއެމްއޭއިން ބުނީ ދައުލަތުގެ ބަޖެޓުގެ ތެރެއިން ކެޕިޓަލް ހަރަދުތަކުގެ ތެރޭގައި ޕީއެސްއައިޕީ މަޝްރޫއުތައް ހިންގުމަށް ހަމަޖެހިފައި ވަނީ ލޯނާއި އާއްމު ބަޖެޓުން ކަމަށެވެ.
އަންނަ އަހަރު ޕީއެސްއައިޕީއަށް ހުށައަޅާފައިވާ އަދަދަކީ 8306.2 މިލިއަން ރުފިޔާއެވެ. މިއީ މި ހިނގާ 2020 ވަނަ އަހަރާ އަޅާބާލާއިރު 49.3 އިންސައްތަ އިތުުރު އަދަދެއް ކަމަށް ފިނޭންސް މިނިސްޓްރީން ވަނީ ބުނެފައެވެ. އެ މިނިސްޓްރީން ބުނީ ކޮވިޑާއި ގުޅިގެން މި އަހަރުގެ ބަޖެޓު މުރާޖާ ކުރިއިރު ޕީއެސްއައިޕީގެ ތެރެއިން މަޑުޖައްސާލެވުނު މަޝްރޫއުތަކަށްވެސް އަންނަ އަހަރުގެ ބަޖެޓުން ޖާގަބދީފައި ވާނެ ކަމަށެވެ.
ހިންގުމުގެ ހަރަދު ފޫބެއްދުމަށް ހަމަޖެހިފައިވަނީ ހިލޭ އެހީންނާއި ލިބޭ އާމްދަނީއިން ކަން ފާހަގަކުރައްވާ ގަވަރުނަރު ވިދާޅުވީ ކެޕިޓަލް ހަރަދުތައް ކުރެވޭނީ އެކަންކަމަށް ބޭނުންވާ ފައިސާ ހަމަޖެހިގެން ކަމަށެވެ. މީގެ އިތުރުން އޭނާ ވިދާޅުވީ ޕީއެސްއައިޕީ ފަދަ ކެޕިޓަލް ހަރަދުތަކަށް އާއްމު ބަޖެޓުގައި ކަނޑައެޅިފައިވާ މިންވަރަށް ފައިސާ ހަމަޖެއްސުމަށް ދަތިވާނެ ކަމަށާއި އެއީ ކޮވިޑާއި ގުޅިގެން ފަތުރުވެރިކަމަށް އައިސްފައިވާ ހީނަރުކަމާއި ބޭރު ފައިސާގެ ސަޕްލައި ދަށްވުމާއި ގުޅިގެން ކަމަށެވެ.
އަންނަ އަހަރަށް ހުށައަޅާފައިވާ ޕީއެސްއައިޕީގެ ތެރޭގައި ދައުލަތުގެ އާއްމު ބަޖެޓުން 3258.3 މިލިއަން ރުފިޔާ ހަރަދުކުރާނެ ކަމަށް ވަނީ އަންދާޒާކޮށްފައެވެ. އަދި ލޯނުތަކުން 3890.4 މިލިއަން ރުފިޔާއާއި ބޭރުގެ ހިލޭ އެހީއިން 561.5 މިލިއަން ރުފިޔާގެ އިތުރުން ޓްރަސްޓު ފަންޑުން 596.2 ހަރަދު ކުރުމަށް ވަނީ ހަމަޖެހިފައެވެ.
ކޮމިޓީގައި ވާހަކަ ދައްކަވަމުން އަލީ ހާޝިމް ވަނީ ކެޕިޓަލް ހަރަދުތަކަށް ބޭނުންވާ މިންވަރަށް އެތެރޭގެ މާކެޓުން ޑޮލަރު ނުލިބިއްޖެ ނަމަ ބައެއް ޕީއެސްއައިޕީ މަޝްރޫއުތައް ހުއްޓާލަން ޖެހިދާނެ ކަމުގެ ކަންބޮޑުވުން ވެސް ފާޅުކުރައްވާފައެވެ. އަދި ބަޖެޓުގައި ހިލޭ އެހީ ލިބޭނެ ކަމަށް އަންދާޒާ ކޮށްފައިވާ މިންވަރަށް ނުލިބިއްޖެ ނަމަ ހިންގުމުގެ ހަރަދަށް ދާ މިންވަރު ހަމަނުޖެއްސޭނެ ކަމަށް ވެސް އޭނާ ވަނީ ވިދާޅުވެފައެވެ.
ގަވަރުނަރު ވިދާޅުވީ ދައުލަތުގެ ހިންގުމުގެ ހަރަދު އާމްދަނީއަށް ވުރެ ބޮޑުވާ ކަމަށާއި އެ ހާލަތް މެދުވެރި ވަނީ ހުރި ވަސީލަތްތައް އެންމެ ރަނގަޅަށް ބޭނުން ނުކުރެވޭތީ ކަމަށެވެ.
އަންނަ އަހަރަށް ލަފާކުރާ ދައުލަތުގެ ބަޖެޓްގެ ޖުމްލަ އަދަދަކީ 34.7 ބިލިއަން ރުފިޔާއެވެ. މީގެ ތެރެއިން ޚަރަދުގެ ގޮތުގައި ހިނގާނެކަމަށް ބެލެވެނީ 33.3 ބިލިއަން ރުފިޔާއެވެ. މި ފައިސާގެ 62.3 އިންސައްތަ ހޭދަވަނީ ރިކަރަންޓް ހަރަދަށެވެ. އަދި ކެޕިޓަލް އެކްސްޕެންޑިޗަރއަށް ހަރަދުވަނީ 37.7 އިންސައްތައެވެ. ބާކީ 1.5 ބިލިއަން ރުފިޔާ ހަރަދުކުރުމަށް ކަނޑައަޅާފައިވަނީ ދައުލަތުގެ ދަރަނި އަދާކުރުމަށެވެ.
