ކޮވިޑް-19 ޖެހިގެން ރާއްޖެއިން އިތުރު ދިވެއްސަކު ނިޔާވެއްޖެ
14 ނޮވެމްބަރު 2020 | ހޮނިހިރު 12:40ނިޔާވެފައި ވަނީ 57 އަހަރުގެ ދިވެހި ފިރިހެނެއް
ކޮވިޑަށް ފަރުވާ ދިނުމަށް ރާއްޖޭގައި ހަދާފައިވާ ކޮވިޑް ފެސިލީޓީއެއް
ކޮވިޑް-19 އަށް ޕޮޒިޓިވް ވެގެން، ހުޅުމާލެ ކޮވިޑް ފެސިލިޓީގައި ފަރުވާދެމުން ދިޔަ 57 އަހަރުގެ ދިވެހި ފިރިހެނަކު ނިޔާވެއްޖެ އެވެ.
މި ބަލީގައި ރާއްޖެއިން 42 މީހަކު ނިޔާވެފައިވާއިރު، މިއީ މި މަސް ތެރޭގައި ރާއްޖެއިން މި ބަލީގައި ނިޔާވި ހަތަރުވަނަ މީހާ އެވެ. މިއާއެކު މި ބަލީގައި މިހާތަނަށް 34 ދިވެހިންނާއި 8 ބިދޭސީއަކު ވަނީ ރާއްޖެއިން ނިޔާވެފަ އެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ)އިން މައުލޫމާތު ދޭ ގޮތުގައި، ހުޅުމާލެ ކޮވިޑް ފެސިލިޓީގައި ފަރުވާދެމުންދިޔަ އެމީހާ ނިޔާވީ އައިސީޔޫގައި ފަރުވާ ދެމުންދަނިކޮށެވެ. އަދި އެ މީހާ ނިޔާވެފައި ވަނީ ހޮނިހިރު ދުވަހު 2:27 ހާއިރު ކަަމަށް ވެސް އެޗްޕީއޭ އިން އެޗްޕީއޭއިން މައުލޫމާތުދެ އެވެ.
ރާއްޖެއިން ކޮވިޑް-19 ޖެހުނު މީހުންގެ އަދަދު 12,112 އަށް އަރާފައިވާއިރު، 821 މީހަކަށް އަންނަނީ ފަރުވާ ދެމުންނެވެ. މީގެ ތެރެއިން ހޮސްޕިޓަލްގައި ފަރުވާދެމުން ދަނީ 51 މީހަކަށެވެ.
ރާއްޖޭގައި ކޮވިޑް-19 ފެތުރުން ކޮންމެވެސް ވަރަކަށް މަޑުޖެހިފައިވީ ނަމަވެސް، ރައްކާތެރިކަމުގެ ގޮތުން އަޅަންޖެހޭ ފިޔަވަޅުތަކަށް ސަމާލުވުމަށް އެޗްޕީއޭއިން އަންނަނީ ނަސޭހަތްތެރިވަމުންނެވެ.
