މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ އަހަރީ އާންމު ޖަލްސާގައި ބައިވެރިވާ އެތުލީޓްސް ކޮމިޝަނަށް ރާއްޖޭގެ އެންމެ ކާމިޔާބު ފިރިހެން އެތުލީޓް ހަސަން ސާއިދާއި ކާމިޔާބު ފެތުންތެރިޔާ އައިމިނަތު ސަޖަން ހޮވައިފިއެވެ.

އެތުލީޓްސް ކޮމިޝަނަކީ 2009 ވަަނަ އަހަރު އެމްއޯސީއަށް މެންބަރުން އިންތިޚާބުކުރަން ފެށުނުއިރުއްސުރެންވެސް ހިމެނޭ ބައެކެވެ. އެކަމަކު މީގެ ކުރިން އެ ކޮމިޝަން އެކްޓިވް ބައެއްގެ ގޮތުގައި ނެތެވެ. އެކަމަކު އެމްއޯސީގެ ހިންގާ ގަވާއިދުގައި އެތުލީޓުންނަށް ބާރު ލިބޭގޮތަށް އެތުލީޓްސް ކޮމިޝަން އުފައްދައި، އެމްއޯސީގެ އަސާސީ ގަވާއިދަށް ގިނަ ބަދަލުތަކެއް ގެންނަން ގައުމީ ކުޅިވަރު އެސޯސިއޭޝަންތަކުގެ ފުރިހަމަ ތާއީދާއެކު ފާސްކޮށްފައިވަނީ މިދިޔަ އަހަރުގެ ނޮވެމްބަރު މަހު ބޭއްވި އެމްއޯސީގެ އަހަރީ އާންމު ޖަލްސާގައެވެ.

މިދިޔަ އަހަރު ފާސްކުރި ގަވާއިދުގެ ދަށުން ރާއްޖޭގެ ގައުމީ ޓީމުތަކުގެ އެތުލީޓުންގެ ތެރެއިން ވޯޓަކުން ހޮވޭ މެންބަރުން އަންނައިރު، އަހަރީ އާންމު ޖަލްސާގައި ބައިވެރިވުމުގެ ހައްގު އެ އެތުލީޓުންނަށް ލިބިގެންދެއެވެ. ހަމަ އެއާއެކު އެމްއޯސީގެ ހިންގާ ކޮމިޓީއަށް މީހުން އައްޔަނުކުރުމުގެ ބާރުވެސް އެތުލީޓުންނަށް ވަނީ ލިބިގެންގޮސްފައެވެ.

އެއާއެކު މި އަހަރު އެމްއޯސީން ބާއްވާ އަހަރީ އާންމު ޖަލްސާގައި އެތުލީޓްސް ކޮމިޝަން ތަމްސީލުކުރުމަށް ސާއިދާއި ސަޖަން ވަނީ ހޮވާފައެވެ. އެއާއެކު މި ދެ އެތުލީޓުން ވެފައިވަނީ ރާއްޖޭގެ ކުޅިވަރުގެ ތާރީޚުގައި އެމްއޯސީގެ އަހަރީ އާންމު ޖަލްސާގައި ބައިވެރިވާ ފުރަތަމަ ދެ އެތުލީޓުންނަށެވެ.

މީގެ ތެރެއިން ސާއިދަކީ ރާއްޖެ ދުށް އެންމެ ކާމިޔާބު ފިރިހެން އެތުލީޓެވެ. އެގޮތުން 2015 ވަނަ އަހަރު އޮތް އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ 100 މީޓަރު ދުވުމުން ރަން މެޑަލް ހޯދައި ރާއްޖެއަށް ބައިނަލްއަގުވާމީ ގޭމްސްއަކުން ފުރަތަމަ ރަން މެޑަލް ހޯދައިދިނީ ސާއިދެވެ. އަދި އެ ގޭމްސްގެ 200 މީޓަރު ދުވުމުން އެ ފަހަރު އޭނާ ރިހި މެޑަލްވެސް ހޯދިއެވެ.

އަދި އޭގެ ފަހުން ސާއިދު ވަނީ 2016 ވަނަ އަހަރުގެ ސައުތު އޭޝިއަން ގޭމްސްގެ 100 މީޓަރާއި 200 މީޓަރު ދުވުމުން ރިހި މެޑަލް އާއި، މިދިޔަ އަހަރުގެ އައިއޯއައިޖީގެ 200 މިޓަރު ދުވުމުން ރިހި މެޑަލް އާއި، ސައުތު އޭޝިއަން ގޭމްސްގެ 100 މީޓަރު ދުވުމުން ރަން މެޑަލް އަދި 200 މިޓަރުން ލޯ މެޑަލް ހޯދާފައެވެ. އަދި އޭނާ ވަނީ އިންޑިއަން ގްރޯން ޕްރީ އާއި މެލޭޝިއަން އޯޕަންއިން ރަން މެޑަލްވެސް ހޯދާފައެވެ.

މީގެ އިތުރުން 2016 ވަނަ އަހަރުގެ އޮލިމްޕިކް ގޭމްސްގެ 100 މީޓަރު ދުވުމުގެ ޕްރިލިމިނަރީ ބުރުގެ އެއްވަނަ ހޯދި ސާއިދަކީ ދުނިޔޭގެ އެންމެ ބޮޑު ކުޅިވަރު ގޭމްސްގެ ޕްރިލިމިނަރީ ބުރެއް ފަހަނައަޅައި ދިޔަ ރާއްޖޭގެ ދެވަނަ އެތުލީޓެވެ.

ސާއިދާއެކު އެތުލީޓްސް ކޮމިޝަނަށް ހޮވުނު ސަޖަން އަކީވެސް ބައިނަލްއަގުވާމީ މައިދާނުގައި ވިދާލި އެތުލީޓެކެވެ. އެގޮތުން 2016 ވަނަ އަހަރުގެ ސައުތު އޭޝިއަން ގޭމްސްގެ 800 މީޓަރު ފްރީސްޓައިލް ފެތުމުގެ އިވެންޓުން ރާއްޖެއަށް ލޯ މެޑަލް ހޯދައިދީ، ސަރަހައްދުގެ ގޭމްސްއެއްގައި ފެތުމުން ރާއްޖެއަށް ގެނައި ފުރަތަމަ މެޑަލް ހޯދައިދިން ފެތުންތެރިޔަކީ ސަޖަނެވެ. އަދި އޮލިމްޕިކްސްގައި ރާއްޖޭގެ ދިދަ އުފުލާލުމުގެ އިތުރުން، އެ މުބާރާތުގައިވެސް ވާދަކުރި ސަޖަން ވަނީ ރާއްޖޭގެ މޮޅު ފެތުންތެރިޔާގެ މަގާމު ހޯދުމުގެ އިތުރުން، ރާއްޖޭގެ ގިނަ ފެތުމުގެ ރިކޯޑުތައްވެސް މީގެ ކުރިން ހަދާފައެވެ.