ހުޅުމާލޭގައި ދިވެހި އުފެއްދުންތައް ވިއްކާ ފިހާރައެއް ހުޅުވައިފި
13 ނޮވެމްބަރު 2020 | ހުކުރު 06:08ބީސީސީން ވަނީ އެއާޕޯޓުގައި ވެސް ފިހާރައެއް ހުޅުވާފައި
ދިވެހި އުފެއްދުންތަކަށް ހާއްސަކޮށްގެން ބީސީސީން ހުޅުމާލޭ ގައި ހުޅުވި ފިހާރަ
ދިވެހި އުފެއްދުންތަކަށް ހާއްސަކޮށްގެން ބިޒްނަސް ސެންޓަރ ކޯޕަރޭޝަން (ބީސީސީ) އިން ހުޅުމާލޭ ގައި ފިހާރައެއް ހުޅުވައިފި އެވެ.
ހުޅުމާލޭ ސެންޓްރޯލް މޯލް ގައި ހުންނަ މި ފިހާރަ ހުޅުވުމުގެ ރަސްމިއްޔާތުގައި ހެރިޓޭޖް މިނިސްޓަރު ޔުމްނާ މައުމޫން، އިކޮނޮމިކް މިނިސްޓަރު ފައްޔާޒު އިސްމާއިލްގެ އިތުރުން ޔޫތް މިނިސްޓަރު އަހުމަދު މަހްލޫފު ބައިވެރިވެވަޑައިގެންނެވި އެވެ.
ބީސީސީން ބުނީ، ހުޅުމާލޭގައި ހުޅުވި އޮތެންޓިކް މޯލްޑިވްސް ފިހާރައިން ތަފާތުު އެކި ވައްތަރުގެ ދިވެހި އުފެއްދުންތައް ލިބޭނެ ކަމަށެވެ.
ދިވެހި އުފެއްދުންތަކަށް ހާއްސަކޮށްގެން ބީސީސީން ހުޅުމާލޭގައި ފިހާރައެއް ހުޅުވާފައިވާއިރު، ދިވެހި އުފެއްދުންތައް ވިއްކަން ކުދި ވިޔަފާރިތަކަށް އަމާޒުކޮށްގެން އެ ކޯޕަރޭޝަނުން ވަނީ އެއާޕޯޓުގައި ޑިއުޓީ ފްރީ ގައިވެސް ފިހާރައެއް ހުޅުވާފަ އެވެ.
އޮތެންޓިކް ފިހާރަތަކުގެ މައިގަނޑު މަގްސަދަކީ ދިވެހި އަތްތެރި މަސައްކަތް ކުރާ ފަރާތްތަކަށް އަމާޒުކޮށްގެން ސަރުކާރުގެ ކުދި އަދި މެދު ފަންތީގެ ސިޔާސަތުގެ ދަށުން އެފަދަ ވިޔަފާރިތައް ކުރިއެރުވުމުގެ މަގްސަދުގައި އަދި އެފަދަ ފަރާތްތަކަށް ތަކެތި ވިއްކަން ފަހި މާހައުލެއް ގާއިމު ކުރުމެވެ.
