ރާއްޖޭގެ ރަށްތަކަށް ކަރަންޓު ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ތެރެއިން، ހަތަރު ރަށެއްގައި އަލަށް ހެދުމަށް ހަމަޖެހިފައިވާ ފެނަކައިގެ އިމާރާތްތަކެއްގެ ބިންގާ އަޅައިފި އެވެ.

ބުރާސްފަތި ދުވަހު އަލަށް އިމާރާތްކުރުމަށް ބިންގާ އަޅާފައިވަނީ ނ. ފޮއްދޫގައި އިމާރާތްކުރާ ފެނަކަ އިންޖީނުގެ އާއި، އެ އަތޮޅު މަނަދޫގައި އިމާރާތްކުރުމަށް ހަމަޖެހިފައިވާ ފެނަކަ އޮފީސް އިމާރާތާއި، ށ. ފޭދޫގައި އިމާރާތްކުރުމަށް ހަމަޖެހިފައިވާ ފެނަކަ އޮފީސް އިމާރާތުގެ އިތުރުން އެ އަތޮޅު މާއުނގޫދޫގައި އިމާރާތްކުރުމަށް ހަމަޖެހިފައިވާ ފެނަކަ އިންޖީނުގޭ އޮފީސް އިމާރާތުގަ އެވެ.

މި ހަތަރު ރަށުގެ އޮފީސް އިމާރާތްތަކާއި އިންޖީނުގޭގެ ބިންގާ އަޅުއްވާ ދެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދާއި މި ރަށްތައް ހިމެނޭ ދާއިރާތަކުގެ މަޖިލިސް މެންބަރުންނެވެ.

ބުރާސްފަތި ދުވަހު މަނަދޫގައި އެޅުމަށް ހަމަޖެހިފައިވާ ފެނަކައިގެ އޮފީސް އިމާރާތް އެޅުމުގެ ރަސްމިއްޔާތުގައި ވާހަކަދައްކަވަމުން އެ ކުންފުނީގެ މެނޭޖިންގ ޑިރެކްޓަރ އަޙްމަދު ސަޢީދު ވިދާޅުވީ އެރަށުގައި ފެނަކައިގެ އޮފީސް އެޅުމުގެ ސަބަބުން އެސަރަހައްދުގެ ރަށްތަކަށްވެސް އެކަމުގެ ފައިދާ ލިބިގެންދާނެ ކަމަށެވެ. އަދި މިމަޝްރޫއަކީ ސަރުކާރުން ރަށްރަށުގައި ދެމުންދާ ކަރަންޓުގެ ހިދުމަތްތައް ފުޅާކޮށް، ހަރުދަނާ ގޮތެއްގައި ދިނުމަށް ގާއިމްކުރެވޭ އޮފީހެއް ކަމަށެވެ.

ފެނަކައިން އަންނަނީ މިއަހަރު ނިމެންވާއިރަށް 28 ރަށެށްގެ އިންޖީނުގެ އައުކޮށް ޒަމާނީ ފެންވަރަށް ބަދަލުކޮށް، ކުރިއަށް އޮތް 3 އަހަރު ތެރޭގައި 56 ރަށެއްގެ އިންޖީނުތައް އަޕްގްރޭޑުކޮށް އިންޖީނުގެތައް ރީލޮކޭޓުކުރުމުގެ މަސައްކަތް އެއްކޮށް ނިމާލުމަށް އަމާޒު ހިފާފަ އެވެ.

މީގެ އިތުރުން އެ ކުންފުނިން އަންނަނީ އިންޖީނުގެތަކާއިއެކު އޮފީސް އިމާރާތްތަކަށްވެސް ބޮޑެތި ބަދަލުތަކެއް ގެންނަމުންނެވެ.