ސީރިޔާ ހަނގުރާމައަށް ދިޔަ މީހުން އަންނަ އަހަރު ގެންނާނަށް، ސަރުކާރުގެ ޕޮލިސީއަކަށް ބަދަލެއް ނާދޭ: އިމްރާން
11 ނޮވެމްބަރު 2020 | ބުދަ 16:57އެފަދަ ތަނަކަށް ދިވެއްސަކު ދިއުމުގެ ފުރުސަތު ނުލިބޭ ވަރަށް ފިޔަވަޅުތައް ހަރުދަނާ ކޮށްފިން
ހޯމް މިނިސްޓަރ ރާއްޖެޓީވީއަށް ދެއްވި އިންޓަވިއުގެ ތެރެއިން
ސީރިޔާގައި ހިނގާ ދާހިލީ ހަނގުރާމައިގައި ބައިވެރިވި ފަރާތްތައް އަންނަ އަހަރު ގެންނާނެކަމަށާއި އެކަމުގައި ސަރުކާރުގެ ޕޮލިސީ ބަދަލުނުވާކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
ސަރުކާރަށް ދެ އަހަރު ފުރުމާއި ގުޅިގެން ރާއްޖެޓީވީއަށް ދެއްވި ހާއްސަ އިންޓަވިއުއެއްގައި މިނިސްޓަރ އިމްރާން ވިދާޅުވީ، ފާއިތުވެގެންދިޔަ ދައުރުގައި ސަރުކާރުގައި ހިމެނޭ ބައެއް ފަރާތްތަކުގެ އިހުމާލުން، ޒިންމާއަދާނުކުރެވުމުގެ ސަބަބުން ބައެއް ފަރާތްތަކުން އެ ސަރަހައްދުތަކަށް ދަތުރުކޮށްފައިވާކަމަށެވެ.
މި ސަރުކާރުން މި މައްސަލައާއި ގުޅިގެން އަޅާފައިވާ އެންމެ މުހިންމު ފިޔަވަޅަކީ، އެފަދަ ތަނަކަށް ދިވެއްސަކު ދިއުމުގެ ފުރުސަތު ނުލިބޭ ވަރަށް ފިޔަވަޅުތައް ހަރުދަނާކުރުންކަމަށެވެ. މިނިސްޓަރ ވިދާޅުވީ އެ ސަރަހައްދުގައި ތިބި މީހުންގެ ތެރެއިން، ހާއްސަކޮށް އަންހެނުންނާއި ކުޑަކުދިންގެ އިންސާނިއްޔަތުގެ ހާލަތައްޓަކައި އާއިލާތަކުގެ އެދުމުގެ މަތިން އެފަރާތްތައް ގެނެސް ރިހިބިލިޓޭޓް ކުރުމަށް ވަރަށް ހާއްސަ އިސްކަމެއް ސަރުކާރުން ދީ އެންއާރްސީ ގާއިމްކޮށްފައިވާކަމަށެވެ. އަދި، މިއަދު މިތިބީ އެގޮތަށް ގެނެވޭ ފަރާތްތައް ރިސީވް ކުރުމަށް ތައްޔާރައްކަމަށާއި މަރުކަޒުގެ ހާލަތު އެވަރަށް ގެންދެވިފައިވާކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ އަންނަ އަހަރު ފެށޭއިރަށް އެތަނުގެ ޕްރޮގްރާމްތަކާއި އެހެނިހެން ކަންކަންވެސް ފެށިގެންދާގޮތަށް ހަމަޖެހޭނެކަމަށެވެ. އަދި ސަރުކާރުން ގަބޫލުކޮށްގެން ތިބީ، މިއަހަރުގެ ތެރޭގައި ކޮންމެވެސް ވަރަކަށް ހަނގުރާމައަށް ދިޔަ ފަރާތްތައް އަނބުރާ ގެނެވޭނެކަމަށެވެ. ނަމަވެސް އެ މީހުން ނުގެނެވުނި ސަރަހައްދުގެ، ހާލަތައް އައި ބަދަލާއި ހަނގުރާމަވެރި ހަރަކާތްތަކަށް އައި ބދަލުގެ އިތުރުން ޕެންޑެމިކާއި ގުޅިގެން ދަތުރުފަތުރު ކުރުމަށް އައި ގޮންޖެހުންތަކާއި ގުޅިގެން ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ އިތުރަށް ވިދާޅުވީ އަންނަ އަހަރު ހާލަތު ބަދަލުވެއްޖެނަމަ، ބައެއް އާއިލާތައް އަނބުރާ ގެންނާނެކަމަށެވެ. މި އަހަރުގެ ތެރޭގައި ފުރަތަމަ ފަހަރަށް ނޭޝަނަލް ރީއިންޓަގްރޭޝަން ސެންޓަރުގައި މީހަކު ބަންދު ކޮށްގެން ވަނީ ރިހެބިލިޓޭޓް ކުރަން ފަށަފައިފައެވެ.
ރީއިންޓަގްރޭޝަން ސެންޓަރުގައި އޭނާ ބަންދު ކުރެވުނު ހޯމް މިނިސްޓްރީން ސިފަކޮށްފައިވަނީ ޓެރަރިޒަމްގެ ނުރައްކަލުން ރައްޔިތުން ރައްކާތެރި ކުރުމަށް އެޅުނު މުހިއްމު ފިޔަވަޅެއްގެ ގޮތުގައެވެ. އެގޮތުން ހަރުކަށިފިކުރު ފެތުރުން ހުއްޓުމަށް ހޯމް މިނިސްޓްރީގެ ދަށުން ހިނގަމުންއަންނަ މުއައްސަސާތަކާއި ސަރުކާރުގެ އެހެން މުއައްސަސާތައް ގުޅިގެން ކުރަމުން އަންނަ މަސައްކަތަށް ލިބިގެންދިޔަ ކުރިއެރުމެއް ކަމަށް މިނިސްޓްރީން ބުންޏެވެ.
ޓެރަރިޒަމް މަނާ ކުރުމުގެ ގާނޫނުގެ ދަށުން ގާއިމް ކުރެވިފައިވާ ރީއިންޓަގްރޭޝަން ސެންޓަރަކީ މި ފަދަ ހަނގުރާމަތަކުގައި ބައިވެރި ވުމަށް ފަހު އަނބުރާ ރާއްޖެ އަންނަ ފަރާތްތައް މުޖުތަމައުއަށް ދޫކޮށްލުމުގެ ކުރިން ރިހެބިލިޓޭޓް ކުރުމަށް ގެންދާ މަރުކަޒުތަކެކެވެ.
