މިއީ ވަކި ޕާޓީއެއްގެ ސަރުކާރެއް ނޫން، މިއީ ރައްޔިތުންގެ ސަރުކާރެއް: ރައީސް ސޯލިހު
11 ނޮވެމްބަރު 2020 | ބުދަ 06:40މިހާތަނަށް އެއްވެސް ޕާޓީއަކަށް 50 އިންސައްތަ އަގުލަބިއްޔަތުން ވެރިކަމަށް އާދެވިފައެއް ނުވޭ
ރިޔާސީ އިންތިހާބުގެ ކެމްޕެއިންގެ ތެރެއިން ރައީސް އިބްރާހީމް މުހައްމަދު ސޯލިހު ރައްޔިތުންނާ ސަލާމް ކުރައްވަނީ
މި ސަރުކާރަކީ ވަކި ޕާޓީއެއްގެ ސަރުކާރެއް ކަމަށް ދެކެވެމުންދާ ވާހަކަތަކަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރައްދުދެއްވައިފިއެވެ.
މި ސަރުކާރަކީ ހަމައެކަނި 'އެމްޑީޕީ ސަރުކާރެއް' ކަމަށް ދޭހަވާ މޭރުމުން އެ ޕާޓީގެ ބައެއް މެމްބަރުން ގެންދަވަނީ ވާހަކަދައްކަމުންނެވެ.
ޖުމްހޫރީ ދުވަހުގެ މުނާސަބަތުގައި ރާއްޖެޓީވީގެ ފަށާއިރު ޕްރޮގްރާމްގައި އެކަމާ ގުޅޭގޮތުން ވާހަކަދައްކަވަމުން ރައީސް ސޯލިހު ވިދާޅުވީ، މިހާތަނަށް އެއްވެސް ޕާޓީއަކަށް 50 އިންސައްތަ އަގުލަބިއްޔަތުން ވެރިކަމަށް އާދެވިފައި ނުވާ ކަމަށެވެ.
އެމްޑީޕީއަކީ ރާއްޖޭގެ އެންމެ ބޮޑު ޕާޓީކަން ފާހަގަކުރައްވާ ރައީސް ސޯލިހު ވިދާޅުވީ އެހެންނަވަމެސް، އެ ޕާޓީއަށް ވެސް ރިޔާސީ އިންތިހާބު ކާމިޔާބުކުރެވިފައިވަނީ ކޯލިޝަނަކުން ކަމަށެވެ. މި ސަރުކާރުގެ ކޯލިޝަންގެ މައި ޕާޓީކަމަށް އެމްޑީޕީ ވީނަމަވެސް މިއީ ހަމައެކަނި ވަކި ޕާޓީއެއްގެ ވެރިކަމެއް ކަމަށް ނުދަންނަވާނެ ކަމަށެވެ. މިކަން ފާހަގަކުރައްވާ ރައީސް ވިދާޅުވީ މިއީ ރައްޔިތުންގެ ވެރިކަމެއް ކަމަށެވެ.
