އެމްޓީސީސީގެ އަމާޒަކީ ރައްޔިތުންނަށް ލުއިފަސޭހަ ހޯދުން، ދެ އަހަރު ތެރޭގައި އެކަން ދެއްކިއްޖެ: އާޒިމް
2 އަހަރުގެ ތެރޭގައި 50 ޕްރޮޖެކްޓުގެ މަސައްކަތް ވަނީ ނިންމާފައި
އެމްޓީސީސީގެ ސީއީއޯ އާދަމް އާޒިމް ހޯރަފުއްޓަށް ވަޑައިގަތުމުން މަރުހަބާ ދަންނަވަނީ
އެމްޓީސީސީގެ އަމާޒަކީ ސަރުކާރުން ހަވާލުކުރާ ރައްޔިތުންނާއި ގުޅުންހުރި ޕްރޮޖެކްޓްތައް އަވަހަށް ނިންމާ ރައްޔިތުންނަށް އެކަމުގެ ލުއިފަސޭހަތައް ހޯދުން ކަމަށާއި، ދެ އަހަރު ތެރޭގައި އެކަން ކޮށްދެއްވާފައިވާނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ސަރުކާރަށް ދެ އަހަރު ފުރުމާއި ގުޅިގެން އެމްޓީސީސީގެ މަސައްކަތްތަކާއި ގުޅޭ ގޮތުން "ރާއްޖެއެމްވީ" އަށް ދެއްވި އެކްސްކްލޫސިވް އިންޓަރވިއުގައި އާޒިމް ވިދާޅުވީ އެމްޓީސީސީ އެކަނި އޮވެގެން އެއްވެސް މަސައްކަތެއް ނުކުރެވޭނެ ކަމަށެވެ. ނަމަވެސް މިހާ ހިސާބަށް އާދެވުނީ އެމްޓީސީސީގެ ޓީމާއި ބޯޑު އަދި ދިވެހި ސަރުކާރާއެކު ކުރެވުނު މަސައްކަތުގެ ތެރެއިން ކަމަށާއި، މިނިސްޓްރީތަކާއި ރައީސް އޮފީހުން ކަންކަމަށް ދޭ އެއްބާރުލުމުގެ ސަބަބުން ކަމަށެވެ.
ވަކިން ހާއްސަކޮށް ކަންކަމުގައި ރައީސްގެ ފަރާތްޕުޅުން ލިބިވަޑައިގަންނަވާ އިރުޝާދާއި އެކު ކާމިޔާބު ލިބެމުން އަންނަ ކަމަށާއި، ޓީމެއްގެ ގޮތުގައި މަސައްކަތް ކޮށްގެން މެނުވީ ކާމިޔާބީއެއް ނުހޯދޭނެ ކަމަށެވެ. އަދި އެމްޓީސީސީން މަސައްކަތް ކުރަނީ ކުންފުންޏަކީ ފައިދާވާ އަދި ހިންގާ ޕްރޮޖެކްޓްތަކަކީ އަވަހަށް ނިމި އޭގެ ފައިދާ ރައްޔިތުންނަށް ވީހާ ވެސް އަވަހަށް ހެދުމަކީ ކުންފުނީގެ ފޯކަސް ކަމަށެވެ.
އެމްޓީސީސީން ކުރާ މަސައްކަތުން ދައްކައިދެނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބޭނުންފުޅުވަނީ ނަމަކަށް ކަން ކުރެއްވުން ނޫން ކަމަށާއި، ކުރާ ކަމަކުން ރައްޔިތުންނަށް އެއިން ނަފާ ލިބޭނެ ގޮތަށް ކަން ކުރެއްވުން ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ރައީސް ސޯލިހުގެ ވިޝަންއަކީ ކަންކަން އަވަހަށް ރައްޔިތުން ބޭނުންވާ ގޮތަށް ކޮލިޓީކޮށް މަސައްކަތް ނިންމެވުން ކަމަށާއި، އެމްޓީސީސީގެ އަމާޒަކީ ރައީސްގެ އިރުޝާދުފުޅާއެކު ކަންކަން ކުރުން ކަމަށެވެ. އަދި ދިވެހި ސަރުކާރާއި ރައީސް އަދި ރައްޔިތުންނަށް ދޭން ބޭނުންވަނީ, ލަސްވާނެ އެއްވެސް ކަމެއް އޮތްނަމަ އެކަމެއްގައި މަޝްވަރާ ކުރަން ޖެހޭ ފަރާތްތަކާއި މަޝްވަރާކޮށް އެކަމެއް ކުރިއަށް ދާނެ ކަމުގެ ޔަގީންކަން ކަމަށް ވިދާޅުވިއެވެ.
ކުންފުނީގެ ގާބިލްކަމާއި މެދު ޔަގީންކަން ދެއްވަމުން އާޒިމް ވިދާޅުވީ އެމްޓީސީސީއަކީ މެރިން ކޮންސްޓްރަކްޝަން ކުންފުންޏެއް ކަމަށާއި، މީގެ ކުރިން ކުރަމުން އައީ ބަނދަރު ކޮނުމާއި ބިން ހިއްކުން ފަދަ މަސައްކަތް ކަމަށެވެ. އެހެންނަމަވެސް މިހާރު ބޮޑު ހިލަޖެހުމާއި، އެއަރޕޯޓު އެޅުމުން ފެށިގެން ހޮސްޕިޓަލް އިމާރާތްކުރުމުގެ މަސައްކަތް ވެސް ކުރަމުން ގެންދާ ކަމަށާއި، ވަކި ދާއިރާއެއްގެ މަސައްކަތް ކުރުމަކީ އެމްޓީސީސީގެ އަމާޒެއް ނޫން ކަމަށެވެ.
ރާއްޖޭގެ 24،000 ހިއްސާދާރުންނާއި ދިވެހި ސަރުކާރުގެ ބޮޑު ހިއްސާއެއް ހިމެނޭ ކުންފުންޏެއްކަން ފާހަގަކުރައްވާ އާޒިމް ވިދާޅުވީ ކުންފުންޏަށް ރަނގަޅު އާމްދަނީއެއް ހޯދައި ދިނުމަކީ މަޖްބޫރުކަމެއްގެ ގޮތުގައި ދެކިވަޑައިގަންނަވާ ކަމަށެވެ. އަދި ކުންފުނީގެ އަމާޒަކީ މިހާރު ހޯދަމުންދާ ކާމިޔާބީތައް ދެމެހެއްޓުމަށްޓަކައި އިތުރު މަސައްކަތްތައް ކުރުން ކަމަށް ވިދާޅުވިއެވެ.
އާޒިމް ވިދާޅުވީ ކުންފުނި ހިންގޭނީ ރަނގަޅު ހިއުމަން ރިސޯސަސް ވަރުގަދަ ކުރެވިގެން ކަމަށާއި، މިހާރުގެ އަމާޒަކީ އެކަން ކުރެއްވުން ކަމަށެވެ. އެގޮތުން ފެންވަރު ރަނގަޅު ގައުމުގައި ފާހަގަކޮށްލެވޭ ފަދަ މުވައްޒަފުން ތިބިތަނަކީ އެމްޓީސީސީއަށް ހެދުމަކީ އުއްމީދެއް ކަމަށް އާޒިމް ވިދާޅުވިއެވެ.
އެމްޓީސީސީން ވަނީ ނިމިގެން ދިޔަ 2 އަހަރު ދުވަހުގެ ތެރޭގައި 51 ޕްރޮޖެކްޓެއްގެ މަސައްކަތް އެއްކޮށް ނިންމާލާފައެވެ. އަދި މިހާރުވެސް 100 އާ ގާތްކުރާ އަދަދަކަށް ޕްރޮޖެކްޓްގެ މަސައްކަތް އެމްޓީސީސީން އަންނަނީ ކުރަމުންނެވެ. މި މަސައްކަތްތަކުގެ ތެރޭގައި ބަނދަރު ހެދުމާއި، ބިން ހިއްކުމާއި، އެއަރޕޯޓު އެޅުމާއި، ހޮސްޕިޓަލް ހެދުމާއި މަގު ހެދުމުން ހިމެނެއެވެ.
