ދެވަނަ ކުއާޓަރ ގައި އެންމެ މަދުން ކުށް ރިޕޯޓް ކޮށްފައިވަނީ ވާވު އަތޮޅުން

މިއަހަރުގެ ދެވަނަ ކުއާޓަރ ގައި ފުލުހުންނަށް އެންމެ މަދުން ކުށް ރިޕޯޓް ކޮށްފައިވަނީ ވާވު އަތޮޅުން ކަމަށް ފުލުހުން ބުނެފި އެވެ.

އޭޕްރީލް 1ން ޖޫން 30 އަށް ފުލުހުންނަށް ހުށައެޅިފައިވާ މައްސަލަތަކުގެ ތަފާސްހިސާބުތައް ހޯމަ ދުވަހު ފުލުހުން ވަނީ އާންމު ކޮށްފަ އެވެ. އެގޮތުން ފުލުހުންގެ ތަފާސްހިސާބުތައް ދައްކާ ގޮތުން މިއަހަރުގެ ދެވަނަ ކުއާޓަރގައި އެންމެ މަދުން ކުށް ރިޕޯޓް ކޮށްފައިވަނީ ވާވު އަތޮޅުންނެވެ. އަދި މާލެ ސިޓީ ފިޔަވައި އެންމެ ގިނައިން ކުށް ރިޕޯޓް ކޮށްފައިވަނީ އައްޑޫ ސިޓީންނެވެ.

މިއަހަރުގެ ދެވަނަ ކުއާޓަރ ގައި ވާވު އަތޮޅުން ރިޕޯޓް ކޮށްފައިވަނީ 2 މައްސަލަ އެވެ. އަދި އައްޑޫ ސިޓީން 186 މައްސަލަ ފުލުހުންނަށް ރިޕޯޓް ކޮށްފައިވާއިރު، ފުވައްމުލަކު ސިޓީންވެސް 128 މައްސަލައެއް ފުލުހުންނަށް ރިޕޯޓް ކޮށްފައިވެ އެވެ.

އޭގެ އިތުރުން، ހދ އަތޮޅުން 125 މައްސަލައެއް ރިޕޯޓް ކޮށްފައިވާއިރު، މާލެ ސިޓީ ފިޔަވައި ކ އަތޮޅުގެ ރަށްތަކުން ރިޕޯޓް ކޮށްފައިވަނީ 101 މައްސަލައެވެ. އަދި ދެން ހުރި އަތޮޅުތަކުގައި ކުށް ރިޕޯޓް ކުރެވުނު މިންވަރު އުޅެނީ 100ށް ވުރެ ދަށުގައެވެ.

މާލެސިޓީއަށް ބަލާއިރު، މިއަހަރުގެ ދެވަނަ ކުއާޓަރގައި ޖުމުލަ 1050 މައްސަލައެއް ފުލުހުންނަށް ހުށައެޅިފައިވެ އެވެ. އޭގެ ތެރޭގައި ހިމެނެނީ މާލެ ސިޓީން ރިޕޯޓް ކުރި 800 މައްސަލައަކާއި، ހުޅުމާލެއިން ރިޕޯޓް ކުރި 200 މައްސަލައާއި، ވިލިމާލެއިން ރިޕޯޓް ކުރި 47 މައްސަލައެކެވެ. އޭގެ ތެރޭގައި އެންމެ ގިނައީ ވައްކަމާ ގުޅޭ މައްސަލަތަކެވެ.

މިއަހަރުގެ ދެވަނަ ކުއާޓަރގައި ފުލުހުން ވަނީ 311 މައްސަލައެއް ތަހުޤީޤުކޮށް ނިންމައި ދައުވާކޮށްދިނުން އެދި ޕްރޮސެކިއުޓަރ ޖެނެރަލް (ޕީޖީ) އޮފީހަށް ފޮނުވާފަ އެވެ. އޭގެ ތެރޭގައި އެންމެ ގިނައީ މަސްތުވާތަކެއްޗާ ގުޅޭ މައްސަލައެކެވެ.