ލ.ގަމުގައި ކެންސަރ ހޮސްޕިޓަލެއް، އަތޮޅު ތެރޭގައި މެންޓަލް ހެލްތު ސެންޓަރ ގެ ޔުނިޓުތަކެއް، އަންނަ އަހަރު!
ކެންސަރ ހޮސްޕިޓަލް ވެގެންދާނީ ސަރުކާރުން ހިފާފައިވާ އަމާޒަށް ވާސިލުވުމަށް މުހިންމު މަޝްރޫއަކަށް
ނައިބްރައީސް ފައިސަލް ނަސީމް އަދި ހެލްތް މިނިސްޓަރ އަހުމަދު ނަސީމް- އަންނަ އަހަރު ސިއްޙީ ދާއިރާއިން ގިނަ އިންވެސްޓްމަންޓުތަކެއް ރޭވިފައިވޭ
ލ ގަމުގައި ކެންސަރ ހޮސްޕިޓަލެއް ޤާއިމު ކުރުމަށް ނިންމާފައިވާ ކަމަށް މިނިސްޓަރ އޮފް ފިނޭންސް އިބްރާޙިމް އަމީރު ވިދާޅުވެއްޖެއެވެ.
އަންނަ އަހަރަށް ލަފާ ކުރާ ދައުލަތުގެ ބަޖެޓް މަޖިލީހަށް އިއްވަވަމުން މިނިސްޓަރ ވިދާޅުވީ، ސިއްހީ ދާއިރާއިން އަލަށް ފެށުމަށް ކަނޑައަޅާފައިވާ މުހިންމު އެއް މަޝްރޫއަކީ ލ.ގަމުގައި ކެންސަރ ހޮސްޕިޓަލެއް ގާއިމުކުރުމުގެ މަޝްރޫއު ކަމަށެވެ. އެގޮތުން މި މަޝްރޫއު ވެގެންދާނީ ކެންސަރާއި، އެހެނިހެން ގައިންގަޔަށް ނާރާ ބަލިތަކުން މަރުވާ އަދަދު 2018 ގައި ހުރި މިންވަރުން 15 އިންސައްތަ ދަށް ކުރުމަށް ސަރުކާރުން ހިފާފައިވާ އަމާޒަށް ވާސިލުވުމަށް މުހިންމު މަޝްރޫއަކަށް ކަމަށް މިނިސްޓަރ ވިދާޅުވިއެވެ.
އޭގެ އިތުރުން، ދުޅަހެޔޮ ރައްޔިތެއް ބިނާ ކުރުމަށްޓަކައި ހަށިގަނޑުގެ ދުޅަހެޔޮ ކަމުގެ އިތުރުން ނަފްސާނީ ދުޅަހެޔޮކަން ގެންނަން ޖެހޭކަން ފާހަގަ ކުރައްވައި މިނިސްޓަރ ވަނީ އެކަމާ ގުޅޭގޮތުންވެސް ވާހަކަ ދައްކަވާފައެވެ.
މިނިސްޓަރ ވިދާޅުވީ، ވަށައިޖެހޭ ނިޒާމެއްގެ ތެރެއިން ޤައުމީ ފެންވަރެއްގައި، ނަފްސާނީ ބަލީގެ މީހުންނަށް އޯގާތެރިކަމާއެކު ފަރުވާ ކުރެވޭނެ އިންތިޒާމެއް ހަމަޖެއްސުމަކީ މި ސަރުކާރުގެ މުހިންމު ވައުދެއް ކަމަށެވެ. އެގޮތުން 2019 ވަނަ އަހަރުގެ ތެރޭގައި ސެންޓަރ ފޯ މެންޓަލް ހެލްތު ޤާއިމު ކޮށްފައިވާކަން ފާހަގަ ކުރައްވައި މިނިސްޓަރ ވިދާޅުވީ، 2021 ވަނަ އަހަރުގެ ބަޖެޓުގައި މެންޓަލް ހެލްތު ސެންޓަރ ގެ ޔުނިޓުތައް އަތޮޅުތެރޭގައި ގާއިމުކުރުމަށް ރޭވިފައިވާނެ ކަމަށެވެ.
ނަފްސާނީ ދުޅަހެޔޮކަން ދަމަހައްޓައި އެކަމަށް އާންމުން ހޭލުންތެރި ކުރުވުމަށް މި ސަރުކާރުން ގިނަ މަސައްކަތްތަކެއް ދަނީ ކުރަމުންނެވެ.
އެގޮތުން ނެޝަނަލް މެންޓަލް ހެލްތު ސެންޓަރެއް އުފައްދައި، ނަފްސާނީ ބަލިތަކަށް ދެވޭ ފަރުވާ ފުޅާކޮށް، އެ ފަރުވާ އާސަންދައިގެ ދަށުން ކަވަރު ކުރެވޭނެ ގޮތް މި ސަރުކާރުން ވަނީ ހަމަޖައްސައިދީފައެވެ. ކޮވިޑް-19 އާ ގުޅިގެން ނަފްސާނީ މައްސަލަތައް ތިންގުނައަށް ރާއްޖޭގައި އިތުރުވެފައިވާ ކަމަށް ކަމާ ބެހޭ ފަރާތްތަކުން ވިދާޅުވެއެވެ.
