ބަޖެޓް 2021: އިޖުތިމާއީ ރައްކާތެރިކަމަށް 3.7 ބިލިއަން ރުފިޔާ!
9 ނޮވެމްބަރު 2020 | ހޯމަ 04:59ޤަޢުމީ އޮނިގަނޑުގެ ތެރެއިން ދެވެމުންދާ އެހީތައް 2021 ވަނަ އަހަރުގައި ކުރިއަށް ދާނެ
އާސަންދަ އޮފީސް: އާސަންދަ ސްކީމަށް ވަނީ 718 މިލިއަން ރުފިޔާ ހިމަނާފައި
އަންނަ އަހަރަށް ލަފާ ކުރާ ދައުލަތުގެ ބަޖެޓުގައި އިޖުތިމާއީ ރައްކާތެރިކަމުގެ ސްކީމުތަކަށް 3.7 ބިލިއަން ރުފިޔާ ހިމަނާފައިވާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެ އެވެ.
ހޯމަ ދުވަހުގެ ޖަލްސާގައި އަންނަ އަހަރަށް ލަފާ ދައުލަތުގެ ބަޖެޓު ހުށައަޅުއްވާދެއްވަމުން ފިނޭންސް މިނިސްޓަރ ވިދާޅުވީ އިޖުތިމާއީ ރައްކާތެރިކަމުގެ ޤަޢުމީ އޮނިގަނޑުގެ ތެރެއިން ދެވެމުންދާ އެހީތައް 2021 ވަނަ އަހަރުގައި ކުރިއަށް ދާނެ ކަމަށެވެ.
އެގޮތުން ތަކެތީގެ އަގުހެޔޮ ކުރުމަށްދޭ އެހީއާއި ނުކުޅެދުންތެރިކަން ހުންނަ ފަރާތްތަކަށް ދޭ އެހީއާއި، އުމުރުން ދުވަސްވީ ފަރާތްތަކަށް ދޭ އެހީގެ އިތުރުން އެކަނިވެރި މައިންނާއި ބަފައިންނަށް ދޭ އެހީ ހިމެނޭ ކަން ފާހަގަކުރައްވާ އަމީރު ވިދާޅުވީ 2021 ވަނަ އަހަރު އާސަންދަ ސްކީމަށް ވަނީ 718 މިލިއަން ރުފިޔާ ބަޖެޓު ކޮށްފައި ވާކަމަށެވެ.
އަމީރު ވިދާޅުވީ ޚަރަދު ބޮޑުވުމަށް މި ނިޒާމުގެ ތެރެއިން އިންސެންޓިވް ތަކެއް އުފެދޭކަމަށެވެ. އަދި ގަބޫލުކުރަންޖެހޭ ހަޤީޤަތަކީ މި ފައިސާއަކީ ވެސް ޓެކްސް އާމްދަނީ އިން ނުވަތަ ދަރަނި ނަގައިގެން ހަމަޖައްސަން ޖެހޭ ޚަރަދުތަކެއް ކަމަށެވެ. އެހެންކަމުން 2021 ވަނަ އަހަރު ވެގެންދަނީ ސިއްހީ އިންޝުރެންސްގެ ނިޒާމުގައި ހުރި އިންއެފިޝަންސީތައް ރަނގަޅުކުރުމަށް ގިނަ މަސައްކަތްތަކެއް ކުރެވިގެންދާ އަހަރެއްގެ ގޮތުގައި މިނިސްޓަރ ސިފަކުރެއްވި އެވެ.
އަދި އާސަންދަ އާއި އެހެނިހެން އިޖުތިމާއީ ރައްކާތެރިކަމުގެ ސްކީމުތަކަށް ޖުމްލަކޮށް 2021 ވަނައަހަރުގެ ބަޖެޓުގައި ވަނީ 3.7 ބިލިއަން ރުފިޔާ ކަނޑައަޅާފައިވާކަން ހާމަކުރެއްވި އެވެ.
