ޒަރޫރީ ބޭނުމެއް ނެތް ނަމަވެސް ރަށް ރަށަށް ދިއުމުގެ ހުއްދަ ދީފި
8 ނޮވެމްބަރު 2020 | އާދީއްތަ 14:29ކުރީގެ އުސޫލުތަކާ އެއްގޮތަށް 14 ދުވަހަށް ކަރަންޓީނުވާން ޖެހޭނެ
މާލެއިން ރަށަކަށް ދިއުމަށް ބަޔަކު ލޯންޗަށް އަރަނީ
ވަކި ޒަރޫރީ ބޭނުމެއް ނެތް ނަމަވެސް، ރާއްޖޭގެ ކޮންމެ ރަށަކަށްވެސް ދެވޭނެ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.
ކޮވިޑް-19 ގެ ސަބަބުން މާލެ ސަރަޙައްދު ލޮކްޑައުން ކުރުމާ ގުޅިގެން މާލެއިން ރަށްރަށަށް ދިއުމަށް ވަކި އުސޫލެއް ހަމަޖެއްސި ނަމަވެސް، ފަހުން ލުއިތަކެއް ދިނުމަށްފަހު ރަށް ރަށަށް ދެވޭނީ ވަކި ހުއްދައެއް ނަގައިގެން ކަމަށް އެޗްޕީއޭއިން ވަނީ ބުނެފައެވެ.
އެޗްޕީއޭއިން ބުނީ އާދިއްތަ ދުވަހުން ފެށިގެން ހުރިހާ ބޭނުމަކަށް ވެސް ރަށް ރަށަށް ދެވޭނެ ކަމަށާއި ނަމަވެސް ކުރީގެ އުސޫލުތަކާ އެއްގޮތަށް 14 ދުވަހަށް ކަރަންޓީނުވާން ޖެހޭނެ ކަމަށެވެ.
ރަށް ރަށަށް ދިއުމަށް އެޗްޕީއޭގެ ހާލު ބެލުން ޕޯޓަލް މެދުވެރިކޮށް ހުއްދައަށް އެދެންޖެހޭއިރު، ކަރަންޓީނުގައި ހުރެވޭނީ ރަށު ކައުންސިލް އާއި ރަށުގެ އާރްއާރްޓީ ޓީމުގެ ބެލުމުގެ ދަށުންނެވެ. އަދި ރަށަށް ދާން ހުއްދަ ވެސް ދޭނީ ކަރަންޓީންވާން އެކަށީގެންވާ ތަނެއް ހުރިތޯ ބަލައި ކައުންސިލުން އެތަނެއް ފާހަގަކޮށްފަ އެވެ.
ރަށްރަށަށް ދާ މީހުން ކަރަންޓީން ވާން ޖެހުނު ނަމަވެސް، ރައްޔިތުންނަށް ކޮންމެހެން ދޭންޖެހޭ ހިދުމަތްތައް ދިނުމަށް އޮފީސްތަކާއި ކުންފުނިތަކުގެ ފަރާތުން ކުރު މުއްދަތަށް ރަަށްރަށަށް ދާ މީހުން ކަރަންޓީން ވާކަށް ނުޖެހެއެވެ. އަދި ކަރަންޓީން ނުވެ ރަށެއްގައި އެންމެ ގިނަވެގެން ހުރެވޭނީ ފަސް ދުވަހު އެވެ.
ކޮވިޑް-19 ގެ ކޭސްތައް ރިޕޯޓްކުރާ މިންވަރު މަދުވެ، އެޗްޕީއޭއިން ގެންދަނީ ބަލި ކޮންޓްރޯލްކުރުމަށް އެޅި ފިޔަވަޅުތަކަށް ލުއި ދެމުންނެވެ. އެގޮތުން މާލެ ސަރަހައްދު މަގުތަކުގައި ނޫޅެވޭ ވަގުތަށްވެސް ބަދަލުތަކެއް ގެނެސްފައިވެއެވެ.
