އިންޑިއާއާއެކު 100 މިލިއަން ޑޮލަރުގެ ގްރާންޓް އެގްރިމެންޓްގައި ސޮއިކުރާނީ
8 ނޮވެމްބަރު 2020 | އާދީއްތަ 11:02ރާއްޖޭގައި ކުރިއަށް ގެންދިއުމަށް ހަމަޖެހިފައިވާ އެޗް.އައި.ސީ.ޑީ.ޕީ އާއި ގުޅޭ 2 އެމް.އޯ.ޔޫ އެއްގައި ސޮއިކުރާނެ
ފޮރިން މިނިސްޓަރ ޝާހިދު އިންޑިއާއަށް ކުރެއްވި ރަސްމީ ދަތުރުފުޅެއްގައި ހަރޝް ވަރްދާންއާ ބައްދަލު ކުރައްވަނީ
އިންޑިއާގެ ފޮރިން ސެކްރެޓަރީ ޝްރީ ހަރީޝް ޝްރިންގްލާ ރާއްޖެއަށް ކުރައްވާ ރަސްމީ ދަތުރުފުޅުގައި އިންޑިއާއިން ރާއްޖެއަށް ފޯރުކޮށްދޭ 100 މިލިއަން ޑޮލަރުގެ ގްރާންޓް އެގްރީމެންޓެއްގައި ދިވެހި ސަރުކާރުން ސޮއިކުރާނެކަމަށް ހާރިޖީ ވުޒާރާއިން ބުނެފިއެވެ.
އިންޑިއާގެ ފޮރިން ސެކްރެޓަރީގެ ދަތުރުފުޅާ ގުޅޭގޮތުން މައުލޫމާތު ހިއްސާ ކުރުމަށް ފޮރިން މިނިސްޓްރީން ނެރުނު ނޫސް ބަޔާނުގައިވާ ގޮތުގައި، މި ފައިސާ ބޭނުންކުރެވިގެން ދާނީ ގްރޭޓަރ މާލޭ ކަނެކްޓިވިޓީ މަޝްރޫއު ފައިނޭންސް ކުރުމަށެވެ.
އޭގެ އިތުރުން ރާއްޖޭގައި ކުރިއަށް ގެންދިއުމަށް ހަމަޖެހިފައިވާ ހައި-އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓް (އެޗްއައިސީޑީޕީ) އާއި ގުޅޭ ދެ އެމްއޯޔޫއެއްގައި ސޮއިކުރަން ވަނީ ހަމަޖެހިފައެވެ.
އިންޑިއާގެ ފޮރިން ސެކްރެޓަރީގެ މި ދަތުރުފުޅުގައި ރާއްޖޭގެ 67 ރަށެއްގައި ގާއިމްކުރެވޭ ކުޑަކުދިންގެ ޕާކަށް ބޭނުންވާ އިކުއިޕްމެންޓް ހަވާލުކުރުމުގެ ރަސްމިއްޔާތުގައި ބައިވެރިވެވަޑައިންނަވާނެ ކަމަށް ވެސް ފޮރިން މިނިސްޓްރީއިން ބުނެއެވެ. އަދި އިންޑިއާގެ ގްރާންޓް އެހީގެ ދަށުން ތަރައްގީ ކުރެވެމުންދާ އެކުވެނި ޓްރެކް ބައްލަވައިލައްވާނެ ކަމަށް ވެސް މިނިސްޓްރީން ބުނެއެވެ.
މި މަހުގެ 8 ވަނަ ދުވަހުން 10 ވަނަ ދުވަހަށް އިންޑިއާގެ ފޮރިން ސެކްރެޓަރީ ކުރައްވާ މި ދަތުރުފުޅަކީ 2020 ވަނަ އަހަރު ދެ ގައުމުގެ އިސްވެރިންގެ މެދުގައި ބޭއްވޭ މިފަދަ ފުރަތަމަ ބައްދަލުވުމެވެ.
މި ދަތުރުފުޅުގެ ތެރެއިން ދިވެހި ސިޔާސީ ލީޑަރުންނާއި ބައްދަލު ކުރުމުގެ ފުރުސަތު ފޮރިން ސެކްރެޓަރީއަށް ލިބިވަޑައިންނަވާނެ ކަމަށާއި ދިވެހި ފޮރިން މިނިސްޓަރާއެކު ދެ ގައުމު ގުޅިގެން ކުރެވޭ ހުރިހާ ބައިލެޓަރަލް މަސައްކަތްތަކަށް ނަޒަރުހިންގަވައިލައްވާ، ކެބިނެޓްގެ އިސްވެރިންނާއި ބައްދަލުކުރައްވާނެ ކަމަށް ފޮރިން މިނިސްޓްރީން ބުނެއެވެ.
