ސަރަޙައްދީ ވިއުގައަކުން ލ.ގަމަށް ކަރަންޓު ފޯރުކޮށްދިނުމުގެ 90 އިންސައްތަ މަސައްކަތް ނިމިއްޖެ
6 ނޮވެމްބަރު 2020 | ހުކުރު 18:03ގަމަށް ކަރަންޓު ފޯރުކޮށްދިނުމުގެ މަޝްރޫއުގެ 90 އިންސައްތަ މަސައްކަތް ވަނީ ނިމިފައި
ލ. ގަމުގައި ފެނަކައިން ހެދި ސެންޓްރަލް ޕަވަރ ހައުސް ނުވަތަ ސަރަޙައްދީ އިންޖީނުގެ
ލ. ގަމަށް ދިމާވެފައިވާ ކަރަންޓުގެ ދަތިކަމަށް ހައްލު ހޯދައި ދިނުމަށް ސަރުކާރުން ފެށި މަޝްރޫއާއެކު އެ ރަށުގެ ތިން އަވަށަށް އެއް ވިއުގައަކުން ކަރަންޓުގެ ހިދުމަތް ދިނުމަށް ކުރިއަށްގެންދާ މަޝްރޫއުގެ 90 އިންސައްތަ މަސައްކަތް ނިމިފައިވާ ކަމަށް ގަމު ފެނަކައިގެ މެނޭޖަރ ފާރޫގް ހުސައިން ވިދާޅުވެއްޖެ އެވެ.
ގަމުގެ 3 އަވަށުގައި ވަކިވަކިން ބޭނުން ކުރަމުން އައި އިންޖީނުގެތަށް އެއްކޮށްލައި ސެންޓްރަލް ޕަވަރ ހައުސް ނުވަތަ ސަރަޙައްދީ އިންޖީނުގެއިން ކަރަންޓު ފޯރުކޮށްދިނުމުގެ މަސައްކަތުގެ ތެރެއިން އިންސްޓޯލް ކޮށްފައިވާ 1.2 މެގަވޯޓުގެ ޖަނަރޭޓަރު ވަނީ ހުކުރު ދުވަހު ޓެސްޓްކޮށްފަ އެވެ.
ރާއްޖެއެމްވީ އަށް މައުލޫމާތު ދެއްވަމުން ފާރޫގް ވިދާޅުވީ، ތިން އަވަށަށް ކަރަންޓު ފޯރުކޮށްދޭން ކުރަމުންދާ މަސައްކަތުގެ ތެރެއިން ކޭބަލް އެޅުމުގެ 95 އިންސައްތަ މަސައްކަތް ނިންމާ، ޓްރާންސްފޯމަރުތަކަށް ކޭބަލް ގުޅާލުމުގެ މަސައްކަތް ކުރަމުންދާ ކަމަށެވެ.
ފާރޫގް ވިދާޅުވީ، މިހުރިހާ މަސައްކަތެއް އެއްކޮށް ނިންމާ، މުޅި ރަށަށް ކަރަންޓުގެ ހިދުމަތް ފޯރުކޮށްދެވޭނެ ކަމަށް ލަފާ ކުރެވެނީ ނޮވެމްބަރު މަހުގެ 20 ވަނަ ދުވަހު ކަމަށެވެ.
ލ.ގަމުގައި ކަރަންޓު ވިއުގަ ގުޅާލުމުގެ މަސައްކަތް ފަށާފައިވަނީ މިދިޔަ އަހަރުގެ ޖުލައި މަހުއެވެ.
އެރަށަށް ކަރަންޓު ފޯރުކޮށްދިނުމަށް އެއް ވިއުގައަކުން ގުޅާލާފައިވަނީ މުކުރިމަގު، މަތިމަރަދޫ އަދި ތުނޑީ އަވަށުގައެވެ. ތިން އަވަށުގައި ވަކިވަކިން ހިންގަމުންއައި އިންޖީނުގެތަކާއި، އިދާރީ އޮފީސްތައް، އައު އިމާރާތަކަށް ބަދަލުކޮށް މިހާރު ޚިދުމަތްދެނީ އެއް ފުރާޅެއްގެ ދަށުންނެވެ.
