ށ އަތޮޅު ހޮސްޕިޓަލުން ބޮޑު ސާޖަރީއެއް ކާމިޔާބުކަމާއެކު ނިންމާލައިފި
6 ނޮވެމްބަރު 2020 | ހުކުރު 14:00ހޮސްޕިޓަލުން ކުރިއަށް ގެންގޮސްފައިވަނީ "ސަބްމެންޑިބިއުލަރ ސަޔަލޯޑިނެކްޓޮމީ" ސާޖަރީއެއް
ށ ފުނަދޫ އަތޮޅު ހޮސްޕިޓަލުން ކުރިއަށް ގެންދިޔަ ސަރޖަރީގެ ތެރެއިން
ރާއްޖޭގައި މަދުން ނޫނީ ނުކުރާ ބާވަތުގެ ސާޖަރީއެއް ށ ފުނަދޫ، އަތޮޅު ހޮސްޕިޓަލުން ކާމިޔާބު ކަމާއެކު ނިންމާލައިފިއެވެ.
އެކަމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން ށ އަތޮޅު ހޮސްޕިޓަލުގެ މެނޭޖަރ، އަހުމަދު ޒުމްރަތު ވިދާޅުވީ، މިއީ ރާއްޖޭގައިވެސް މަދުން ނޫނީ ނުކުރާ ބާވަތުގެ ސާޖަރީއެއް ކަމަށާއި، މިއީ ހޮސްޕިޓަލަށްވެސް ލިބިގެންދިޔަ ބޮޑު ކުރިއެރުމެއް ކަމަށެވެ.
ޒުމްރަތު ވިދާޅުވީ، މިހާރު އަތޮޅު ހޮސްޕިޓަލުން ފަރުވާ ހޯދާ މީހުންގެ އަދަދުވެސް އިތުރުވެފައިވާ ކަމަށެވެ. އެގޮތުން ކުރިއާ ޚިލާފަށް މިހާރު މަހަކު 24 ސާޖަރީ ހޮސްޕިޓަލުން ކުރާ ކަމަށް އޭނާ ވިދާޅުވިއެވެ.
ށ ފުނަދޫ އަތޮޅު ހޮސްޕިޓަލުން ކުރިއަށް ގެންގޮސްފައިވަނީ "ސަބްމެންޑިބިއުލަރ ސަޔަލޯޑިނެކްޓޮމީ" ސާޖަރީއެއް ކަމަށް ހޮސްޕިޓަލުން މައުލޫމާތު ދެއެވެ. އެގޮތުން މިއީ ހަށިގަނޑުގެ ކުޅު އުފައްދާ "ސަލައިވަރީ ގްލޭންޑް" ނެގުމަށް ހެދި ސާޖަރީއެއްކަމަށް ހޮސްޕިޓަލުން މައުލޫމާތު ދެއެވެ.
އޮންލައިން ނޫސް "މިހާރު" އަށް މައުލޫމާތު ދެއްވަމުން ސާޖަރީ ކުރިއަށް ގެންދެވި ޑޮކްޓަރ އަސްލަމް އަހުމަދު ޒަކަރިއްޔާ ވިދާޅުވެފައިވަނީ މިއީ ސަލައިވަރީ ގްލޭންޑް ދުޅަ ވުމުގެ ސަބަބުން އެ ގްލޭންޑް ނެގުމަށް ހެދި ސާޖަރީއެއް ކަމަށާއި، ޕޭޝަންޓަކީ 39 އަހަރުގެ ދިވެހި ފިރިހެނެއް ކަމަށެވެ. އަދި ސާޖަރީއަށްފަހު އޭނާގެ ޙާލު ރަނގަޅުވަމުން އަންނަ ކަމަށް ޑޮކްޓަރ ވިދާޅުވިއެވެ.
