ސަރުކާރަށް ޓެކުހުން ލިބުނު އާމްދަނީ 37 އިންސައްތަ ދަށަށް

ސަރުކާރަށް ޓެކުހުން ލިބުނު އާމްދަނީ 37 އިންސައްތަ ދަށަށް ގޮސްފިއެވެ.

ފިނޭންސް މިނިސްޓްރީ އިން އާންމު ކޮށްފައިވާ ވީކްލީ ސްޓެޓިސްޓިކްސް ދައްކާ ގޮތުން އޮކްޓޫބަރ މަހުގެ 29 ވަނަ ދުވަހުގެ ނިޔަލަށް ޓެކުހުގެ ގޮތުގައި ސަރުކާރަށް ލިބިފައި ވަނީ 8.8 ބިލިއަން ރުފިޔާއެވެ. ފާއިތުވި އަހަރުގެ މި މުއްދަތުގައި ސަރުކާރަށް ޓެކުހުގެ ގޮތުގައި 14 ބިލިއަން ރުފިޔާ ވަނީ ލިބިފައެވެ.

ފިނޭންސްގެ ތަފާސްހިސާބުތައް ދައްކާ ގޮތުން މި އަހަރުގެ މިހާތަނަށް ސަރުކާރަށް ނަން ޓެކްސް ރެވެނިއުގެ ގޮތުގައި ލިބިފައި ވަނީ 2.1 ބިލިއަން ރުފިޔާއެވެ. މިއީ ފާއިތުވި އަހަރުގެ މި މުއްދަތުގައި ލިބުނު 5.3 ބިލިއަން ރުފިޔާ އާއި އަޅާބަލާއިރު 60 އިންސައްތައިގެ ދަށްވުމެކެވެ.

މީގެ އިތުރުން، 2019 ވަނަ އަހަރުގެ އޮކްޓޫބަރ މަހުގެ 29 ވަނަ ދުވަހުގެ ނިޔަލަށް ކެޕިޓަލް ރިސީޕްޓްސް ގެ ގޮތުގައި ސަރުކާރަށް 17.8 މިލިއަން ރުފިޔާ ލިބިފައިވާ އިރު، މި އަހަރުގެ މި މުއްދަތުގައި ލިބިފައި ވަނީ 7.6 މިލިއަން ރުފިޔާއެވެ. އަދި ގްރާންޓްސްގެ ގޮތުގައި 2019 ވަނަ އަހަރުގެ މި މުއްދަތުގައި 1.1 ބިލިއަން ރުފިޔާ ލިބިފައިވާ އިރު، މި އަހަރުގެ މި މުއްދަތުގައި ލިބިފައި ވަނީ 603.8 މިލިއަން ރުފިޔާ ކަމަށް ފިނޭންސްގެ ތަފާސްހިސާބުތަކުން ދައްކައެވެ.

ފިނޭންސްގެ އެންމެ ފަހުގެ ތަފާސްހިސާބުތައް ދައްކާ ގޮތުން ފާއިތުވި އަހަރުގެ އޮކްޓޫބަރ މަހުގެ 29 ގެ ނިލަށް އާމްދަނީގެ ގޮތުގައި ޖުމްލަ 23 ބިލިއަން ރުފިޔާ ސަރުކާރަށް ލިބިފައިވާ އިރު، މި އަހަރުގެ މި މުއްދަތުގައި ލިބިފައި ވަނީ 22.5 ބިލިއަން ރުފިޔާއެވެ.