ބްރޯޑްކާސްޓް ކުރުމުގެ ހަމަތަކާއި ޚިލާފްވާ މީޑިއާތަކާއި މެދު ހަރުކަށި ފިޔަވަޅު އަޅާނަން: އެމްއެމްސީ
6 ނޮވެމްބަރު 2020 | ހުކުރު 00:45ނޫސްވެރިކަމުގެ ޕްރިފެޝަނަލިޒަމް ދަމަހައްޓަން ޖެހޭކަމަށް ވަނީ ބުނެފައި
މޯލްޑިވްސް މީޑިއާ ކައުންސިލް
ބްރޯޑްކާސްޓް ކުރުމުގެ ހަމަތަކާއި ޚިލާފްވާ މީޑިއާތަކާއި މެދު ހަރުކަށި ފިޔަވަޅު އަޅާނެކަމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ބުނެފިއެވެ.
އެމްއެމްސީން ބުރާސްފަތި ދުވަހުގެ ރޭ ބަޔާނެއްގައި ބުނެފައި ވަނީ ފަހަކަށް އައިސް ބައެއް މީޑިއާތަކުން ބަދުއަޚްލާޤީ އަމަލުތަކާއި ޖިންސީ ވާހަކަތަކާއި ޖިންސީ އަމަލުތަކަށް ހިތްވަރުލިބޭފަދަ މޭރުމުން މީޑިއާ ކޮންޓެންޓް ތައްޔާރުކޮށް ޝާއިއުކުރާކަން އެ ކައުންސިލަށް ފާހަގަވެފައިވާ ކަމަށެވެ.
މޯލްޑިވްސް މީޑިއާ ކައުންސިލްގެ ޤާނޫނުގެ ދަށުން 31 ޖެނުއަރީ 2011 ގައި ގެޒެޓްކޮށް އަމަލުކުރަމުން އަންނަ "ދިވެހި މީޑިއާގެ ހަމަތަކާއި އަޚްލާޤީ މިންގަނޑު" ގެ 9 ވަނަ މާއްދަގައި ބަޔާންކޮށްފައި ވަނީ "ބަރަހަނާ މަންޒަރާއި ޖިންސީ ވާހަކަތަކާއި ޖިންސީ އަމަލުތަކަށް ހިތްވަރުދޭ ވާހަކަތަކާއި އެފަދަ ކަންކަން ސިފަކޮށްދޭ އެއްވެސް އެއްޗެއް ޝާއިއުކުރުމުން ދުރުހެލިވާނެ" މިފަދައިން ކަމަށާއި އަދި އެ މިންގަނޑުގެ 10 ވަނަ މާއްދަގައި ބަޔާންކޮށްފައި ވަނީ، "ޚަބަރާއި މައުލޫމާތު ޝާޢިއުކުރުމުގައި، އާންމު އިޖުތިމާއީ މިންގަނޑުތަކަށް ނުފެތޭ، ހަޑިހުތުރު ބަސް ބޭނުންކުރުމުން ދުރުހެލިވާނެ" މިފަދައިންކަން ކަމަށް ބަޔާނުގައި ވެއެވެ.
"ދިވެހި މީޑިއާގެ ހަމަތަކާއި އަޚްލާޤީ މިންގަނޑު" އާ އެއްގޮތްވާ ގޮތުގެ މަތިން ޙަބަރާއި މައުލޫމާތު ގެނެސްދިނުމަށް ވަނީ އެ ކައުންސިލުން ވަނީ އިލްތިމާސްކޮށްފައެވެ.
އެމްއެމްސީން ބުނީ އިންޓަނެޓްގެ ޒަރިއްޔާއިން ވެބްސައިޓާއި، މީސް މީޑިއާގެ އެކި ވަސީލަތްތައް ބޭނުންކޮށްގެން ޚަބަރާއި މައުލޫމާތު ފެތުރުން ފުޅާވެފައިވާ ޒަމާނެއްގައި، ބަރަޖަނާ މަންޒަރާއި ޖިންސީ ވާހަކަތަކާއި، ޖިންސީ އަމަލުތަކަށް ހިތްވަރުދޭ ވާހަކަތަކާއި އެފަދަ ކަންކަން ސިފަކޮށްދޭ އަޚްލާޤީގޮތުން ދަށްފެންވަރުގެ ލިޔުންތައް އާންމުވުމުގެ ސަބަބުން ސޯޝަލް މީޑިއާއާއި އިންޓަނެޓްގެ ޒަރިއްޔާއިން ފުރާވަރުގެ ކުދިންނަށް ނޭދެވޭ އަސަރު ކުރާކަމުގެ ކަންބޮޑުވުން ކަމާއި ގުޅިންހުރި ފަރާތްތަކުން އެ ކައުންސިލާއި ހިއްސާކުރަމުންދާ ކަމަށެވެ. އަދި ބައެއްފަހަރު މިފަދަ ކޮންޓެންޓްތައް އެ ކޮންޓެންޓެއް ތައްޔާރުކުރި މީޑިއާއަކުން ނެގި ނަމަވެސް އިންޓަނެޓްގެ ޒަރިއްޔާއިން ޝެއަރކުރެވޭތީ ޒަމާންތަކެއްވަންދެން އެފަދަ ލިޔުންތައް އާންމުންނަށް ފެންނަންކަމަށާއި މިއީ މި ކައުންސިލުން ނުހަނު ކަންބޮޑުވާ ކަމެއް ކަމަށެވެ.
މީގެ އިތުރުން ބައެއް މީޑިއާތަކުން ނޫސްވެރިކަމުގެ އަޚްލާޤީ މިންގަނޑުތަކާއި ޚިލާފު ލިޔުންތަކާއި އިންސާނީ ކަރާމާތަށް އުނިކަން ލިބޭފަދަ ލިޔުންތައް އަދި މި ނޫނަސް އެއްވެސް ހަޤީގަތެއްނެތް ތޯތޯ ވާހަކަތަކުގެ މައްޗަށް ބިނާކޮށްވެސް އެކި ބާވަތްތަކުގެ ލިޔުންތައް ޝާއިއުކުރާކަން ފާހަގަކުރެވިފައިވާ ކަމަށާއި އަދި އެފަދަ ކަންކަމުގެ ޝަކުވާ އާންމު ފަރާތްތަކުން އެކައުންސިލްގެ ސަމާލުކަމަށް ގެންނަމުންދާ ކަމަށް ބަޔާނުގައި ވެއެވެ.
އެމްއެމްސީން ބުނީ ދިވެހި މީޑިއާގައި މަސައްކަތްކުރާ އެންމެހާ ފަރާތްތަކުން ވެސް އަބަދުވެސް އިސްލާމްދީނާއި ދިވެހިރާއްޖޭގެ ޤަނޫނުތަކަށް ހުރުމަތްތެރިކޮށް ހިތައި، އިންސާނީ ހައްގުތަކަށް ހުރުމަތްތެރިކޮށް ހިތުމާއިއެކު އިޖުތިމާއި އަޚްލާގު ދަމަހައްޓައި ޒިންމާދާރު ކަމާއިއެކު ނޫސްވެރިކަމުގެ ޕްރިފެޝަނަލިޒަމް ދަމަހައްޓަން ޖެހޭ ކަމަށެވެ. އަދި މުޖުތަމައުގެ އާންމު މަސްލަހަތު ހިމާޔަތްކުރަން ޖެހޭ ކަމަށާއި، މުޖުތަމައުގައި ރުޅިވެރިކަމާއި ފިތުނަ ފަސާދަ އުފެއްދުމާއި އަޚުލާޤި ގޮތުން ދަށުދަރަޖައިގެ ވާހަކަތަކާއި ލިޔުންތަކަކީ ނޫސްވެރިކަމުގެ އެތިކްސް ނުވަތަ އަޚްލާޤީ ހަމަތަކާ ކަނޑައެޅިގެން ޚިލާފު ކަމެއް ކަމަށެވެ.
އެހެންކަމުން ނޫސްވެރިކަމުގެ ނަމުގައި ރާއްޖޭގައި ރަޖިސްޓްރީކޮށްގެންވިޔަސް އަދި ނުކޮށްވިޔަސް އުސޫލުން ބޭރުން މީޑިއާގެ އެކި ވަސީލަތްތައް ހިންގަމުންދިއުމަކީ އެ ކައުންސިލަށް ބަލައިގަނެވޭނެ ކަމެއް ނޫން ކަމަށެވެ. އޭގެ ސަބަބުން އިޚްލާސްތެރިކަމާއިއެކު ނޫސްވެރިކަމުގެ މަސައްކަތްކުރާ އެތައް ބަޔަކަށް ބަދުނާމާއި ނުހަނު ގިނަގުނަ ގެއްލުންތަކާއި ކުރިމަތިލާންޖެހޭ ކަމަށް އެމްއެމްސީން ބުނެއެވެ.
ދިވެހި މީޑިއާގެ ހަމަތަކާއި އަޚްލާޤީ މިންގަނޑާއި މުޖުތަމައުގެ އާއްމު އަޚްލާޤީ މިންގަނޑުގެ ބޭރުން އިންޔާވެރިކަމާއި ރުޅިވެރިކަމާއި ނަފުރަތު އުފެއްދުމަށް އަމަލުކުރާ މީޑިއާތަކާއި، ބަދުއަޚްލާޤީ އަމަލުތަކަށް ހިތްވަރުދީ އެފަދަކަންކަމަށް މަގުފަހިވާފަދަ ގޮތަކަށް އަމަލުކުރާ މީޑިއާތަކާއި މެދު އެކައުންސިލުން އެޅެންއޮތް އެންމެ ހަރުކަށި ފިޔަވަޅު އަޅާނެ ކަމަށް އެމްއެމްސީން ބުނެއެވެ.
