ކޯނީ ރިޕޯޓްގައި ހުރި ކަންކަން ތަންފީޒު ނުކުރާހާ ހިނދަކު އިތުރު ބަޢާވާތެއް ކޮށްފާނެ: ނަޝީދު

ބަޢާވާތަކުން ވެރިކަން ވައްޓާލުމަށް ބަޔަކު ނުނިކުންނާނެކަން ކަށަވަރު ކުރުމަށް ކޮމިޝަން އޮފް ނޭޝަނަލް އިންކުއަރީން ތައްޔާރުކުރި ރިޕޯޓް (ކޯނީ ރިޕޯޓް) ގައި ބަޔާން ކޮށްފައިވާ ކަންކަން ތަންފީޒު ކުރަންޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

7 ފެބްރުއަރީގައި ރައީސް ނަޝީދުގެ ވެރިކަން ބަދަލުވި ގޮތް ބެލުމަށް އުފެއްދި ކޮމިޝަނުން އެ މައްސަލަ ތަހުޤީޤުކޮށް، ތަންފީޒުކުރަންޖެހޭ ކަންކަން ބަޔާން ކޮށްފައިވާއިރު، ކޯނީ ރިޕޯޓްގައި ބަޔާން ކޮށްފައިވާ ފަރާތްތަކާމެދު ފިޔަވަޅު އަޅަންޖެހޭ ކަމަށް އެމްޑީޕީގެ މެމްބަރުންވެސް ދަނީ ގޮވާލަމުންނެވެ.

އެކަމާ ގުޅޭގޮތުން ބުރާސްފަތި ދުވަހު ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ސަލާމަތީ ބާރުތަކުން އޭރު ޤައުމަށް ވެފައިވާ ޢައްދާރީ ތަކުރާރުވިޔަ ނުދިނުމަށްޓަކައި ކޯނީ ރިޕޯޓްގައި ބަޔާން ކޮށްފައިވާ ކަންކަން ތަންފީޒު ކުރަންޖެހޭ ކަމަށެވެ. އަދި އެކަންކަން ނުކުރާހާ ހިނދަކު އަނެއްކާވެސް ސަލާމަތީ ބާރުތަކުން ވެރިކަން ވައްޓާލުމަށް ނުނިކުންނާނެ ކަމަށް ވިދާޅުވަން ކެރިވަޑައިނުގަންނަވާ ކަމަށް ރައީސް ނަޝީދު ވިދާޅުވިއެވެ.

ރައީސް ނަޝީދު އެހެން ވިދާޅުވެފައިވާއިރު، ބުރާސްފަތި ދުވަހު ރާއްޖެޓީވީގެ ފަށާއިރު ޕްރޮގްރާމަށް ދެއްވި އިންޓަރވިއުއެއްގައި ކޮމިޝަނަރ އޮފް ޕޮލިސް (ސީޕީ) މުޙައްމަދު ހަމީދު ވަނީ އެއްވެސް ސަރުކާރެއް ވައްޓާލަން ދެން ފުލުހުން ނުނިކުންނާނެ ކަމުގެ ޔަޤީންކަން ދެއްވާފައެވެ.

ސީޕީ ވިދާޅުވީ، އެއީ މާޒީ ކަމަށާއި، އެ މާޒީން ފުލުހުންނަށް ވަރަށް ގިނަ އިބުރަތްތަކެއް ލިބިގެން ގޮސްފައިވާ ކަމަށެވެ. އަދި ފުލުހުންގެ މުއައްސަސާގައި މިއަދު ތިބި ފަރާތްތަކާއި، ކުރިއަށް އޮތް ތަނުގައި ފުލުހުންގެ މުއައްސަސާއަށް ގުޅެން ތިބި ފަރާތްތައްވެސް އެފަދަ ކަމެއް ނުކުރައްވާނެ ކަމުގެ ޔަޤީންކަން ދެއްވާކަމަށް ސީޕީ ވިދާޅުވިއެވެ.

2012 ވަނަ އަހަރުގެ ފެބްރުއަރީ 7 ގައި ފުލުހުންނާއި ސިފައިން ސަރުކާރާ ދެކޮޅުވެ، ވެރިކަން ވައްޓާލުމަށް ނުކުތުމާ ގުޅިގެން އޭރު ފުލުހުންނަށް ގިނަ ފާޑުކިއުންތަކެއް އަމާޒުވެގެން ދިޔައެވެ. އެގޮތުން ހަތެއް ފެބްރުއަރީގައި ގިނަ އަދަދެއްގެ ސިފައިންނާއި ފުލުހުން ރައީސް ނަޝީދާ ދެކޮޅަށް ނިކުތެވެ.