ފާއިތުވި އޮކްޓޯބަރ މަހު ރާއްޖޭގައި 1،148 އެއަރ ޓްރެފިކް މޫވްމަންޓް ހިނގާފައިވާ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ބުނެފިއެވެ.

އެގޮތުން އެމްއޭސީއެލްއިން ބުނީ ރާއްޖޭގެ ބައިނަލްއަގްވާމީ ބޯޑަރުގައި ޖުމްލަ 640 އެއަރ ޓްރެފިކް މޫވްމަންޓް ހިނގާފައިވާ ކަމަށެވެ. އަދި ބައިނަލްއަގްވާމީ ބޯޑަރުން 25،520 ފަސިންޖަރުން ރާއްޖެ އައިސްފައި ވާއިރު 22،828 މީހަކު ވަނީ ފުރައިގެން ގޮސްފައެވެ.

ޑޮމެސްޓިކް ދަތުރުތަކަށް ބަލާއިރު، އެމްއޭސީއެލްއިން ބުނީ ޑޮމެސްޓިކް ބޯޑަރުން 6،416 ފަސިންޖަރުން އައިސްފައިވާ ކަމަށާ 6،284 ފަސިންޖަރުން ފުރާފައިވާ ކަމަށެވެ. އަދި ޖުމްލަ ޑޮމެސްޓިކް ބޯޑަރުގައި 508 އެއަރ ޓްރެފިކް މޫވްމަންޓް ހިނގާފައިވާ ކަމަށް ވަނީ ބުނެފައެވެ.

ފާއިތުވި އޮކްޓޫބަރު މަހަކީ، ރާއްޖޭގެ ބޯޑަރުތައް ފަތުރުވެރިންނަށް އަލުން ހުޅުވާލި ފަހުން އެންމެ ގިނަ އަދަދެއްގެ ފަތުރުވެރިން ރާއްޖެއަށް ޒިޔާރަތްކުރި މަހެވެ. އެގޮތުން ސެޕްޓެމްބަރު މަހާ އަޅާކިޔާއިރު ރާއްޖެއަށް ޒިޔާރަތްކުރި ފަތުރުވެރިންގެ އަދަދުތައް ވަނީ ދެގުނައަށް ވުރެ އިތުރުވެފައެވެ.

މިއާއި ގުޅިގެން ސަރުކާރުން އަހަރު ނިމުމުގެ ކުރިން ކަނޑައަޅާފައިވާ 450،000 ފަތުރުވެރިންގެ އަމާޒަށް ވާސިލުވެވޭނެ ކަމުގެ އުއްމީދުތައް ވަނީ އިތުރުވެފައެވެ. ރާއްޖެއަށް އަންނަ ފަތުރުވެރިން އިތުރުވުމުގެ ފަހަތުގައި ކޮވިޑުގެ ހާލަތު ކޮންޓްރޯލް ވުމާއި، ސޭފް ޓްރެވަލް ލިސްޓަށް އެރުމުގެ އިތުރުން ގެސްޓްހައުސް ވިޔަފާރި ހުޅުވާލުން ހިމެނެއެވެ.