ފިޔަވަޅު މޯލްޑިވްސް: ފަތުރުވެރިކަމަށް އައު މަންޒިލެއް
މިވަގުތު 44 ވިލާ ވަނީ ހުޅުވާފައި
ފިޔަވަޅު މޯލްޑިވްސް
ރާއްޖޭގެ ފަތުރުވެރިކަމަށް "ފިޔަވަޅު މޯލްޑިވްސް" ގެ ނަމުގައި މުޅިން އައު ރިސޯޓެއް ހުޅުވައިފިއެވެ.
އދ. މަންދޫގައި ތަރައްގީކޮށްފައިވާ އެ ރިސޯޓަކީ އެރަށުގެ ވަކި ސަރަހައްދެއްގައި ތަރައްގީކޮށްފައިވާ ރިސޯޓަކަށްވާއިރު، އެތަން ހުޅުވައިދެއްވީ ޓުއަރިޒަމް މިނިސްޓަރ ޑރ. އަބްދުﷲ މައުސޫމެވެ.
އަންގާރަ ދުވަހު ހުޅުވި އެ ރިސޯޓަށް ފަތުރުވެރިން ޒިޔާރަތްކުރަން ފަށާފައިވާއިރު، މިވަގުތު 44 ވިލާ ވަނީ ހުޅުވާފައެވެ. އެހެން ނަމަވެސް ކުރިއަށް އޮތް ތަނުގައި 100 ވިލާއަށް އެ ރިސޯޓް ތަރައްގީ ކުރުމަށް ވަނީ ނިންމާފައެވެ. އެގޮތުން ފަސް ކެޓަގަރީއެއް ހިމެނޭއިރު، އެ ރިސޯޓުގައި ގާރޑެން ވިލާ، ޑިލަކްސް ގާރޑެން ވިލާ، ބީޗް ވިލާ، ޑިލަކްސް ބީޗް ވިލާ އަދި ޕޫލް ވިލާ ހުރެއެވެ.
ދިވެހި ވަންތަ ރަހަތަކާއެކު އެ ރިސޯޓުގައި ކޮވެލި ރެސްޓޯރަންޓާއި، އަދި ރިޔާ ކެފޭގެ ޚިދުމަތް ލިބިގެންދާނެއެވެ. އަދި ކުޑަކުދިންނަށް ހާއްސަ މެނޫވެސް ހިމެނޭ ކަމަށް ފިޔަވަޅު ރިސޯޓުން މައުލޫމާތުދެއެވެ.
މި ރިސޯޓުގައި ވޯޓަރ ސްޕޯޓްސް ސެންޓަރެއްވެސް ގާއިމުކޮށްފައިވާއިރު، އިންޑޯ ކުޅިވަރުތަކަށް ހާއްސަކޮށްފައިވާ ތަނެއްވެސް ހުރެއެވެ.
