މެސީއާއެކު މަސައްކަތް ކުރަން އުނދަގޫ ކަމެއް ނެތް: ކޫމަން

ބާސެލޯނާގެ ކެޕްޓަން ލިއޮނަލް މެސީއާއެކު މަސައްކަތް ކުރުމަށް އެއްވެސް އުނދަގޫ ކަމެއް ނެތް ކަމަށް އެ ޓީމުގެ ކޯޗު ރޮނާލްޑް ކޫމަން ބުނެފިއެވެ.

ކޫމަން މިހެން ބުނެފައިވަނީ ބާސާއަށް މީގެ ކުރިން ކޯޗުކަން ކޮށްދިން ކިކޭ ސެޓިއެން މެސީއާ ގުޅުވައިގެން ދެއްކި ވާހަކަތަކަށް ރައްދު ދެމުންނެވެ. ދާދި ފަހުން ސެޓިއެން ވަނީ މެސީ އަކީ ކޯޗުންގެ ބަސް ގަބޫލުނުކުރާ ކުޅުންތެރިއެއް ކަމަށާއި، އޭނާއާއެކު މަސައްކަތް ކުރަން އުނދަގޫވި ކަމަށް ބުނެފައެވެ.

ޔުއެފާ ޗެމްޕިއަންސް ލީގުގައި ބުދަ ދުވަހުގެރޭ ޑީނަމޯ ކިއެވްއާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި މެސީ ދިފާއުކޮށް ކޫމަން ބުނީ އެހެން މީހުންގެ ވިސްނުން ތަފާތުވި ނަމަވެސް، އޭނާ އެކަމަށް އިހުތިރާމުކުރާ ކަމަށާއި، އޭނާއަށް މެސީއާއެކު މަސައްކަތް ކުރުމަށް އެއްވެސް ދަތިކަމެއް ނެތް ކަމަށެވެ. އަދި ކޮންމެ މެޗެއްގެ ކުރިންވެސް ކެޕްޓަން މެސީއާ ވާހަކަދައްކާ ހިޔާލު ބަދަލުކުރާ ކަމަށްވެސް ކޫމަން ވަނީ ބުނެފައެވެ.

މީގެ ކުރިން ކޫމަން ވަނީ މެސީއަށް ތާރީފުކޮށް ވާހަކަދައްކާފައެވެ. އެގޮތުން މީގެ ކުރިން ކޫމަން ބުނީ ޓްރާންސްފާގެ މައްސަލަ ނިމި ފުރަތަމަ ދުވަހުން ފަށައިގެން ޓީމަށާއި ޓީމުގެ ހުރިހާ ކުޅުންތެރިންނަށްވެސް މެސީ އެންމެ ފުރިހަމައަށް އެއްބާރުލުން ދެމުން އަންނަ ކަމަށެވެ. އަދި އެކަން ދަނޑުމަތީގައިވެސް އޭނާ ސާބިތުކޮށްދެމުން އަންނަ ކަމަށާއި، މިހާތަނަށް މެސީއާ މެދު އެއްވެސް ޝަކުވާއެއްވެސް ނެތް ކަމަށްވެސް ކޫމަން ވަނީ ބުނެފައެވެ. އެކަމަކު އޭގެ ފަހުން ކޫމަން ވަނީ މި ދަނޑިވަޅުގައި މެސީގެ ކުޅުން އަދި އިތުރަށް ރަނގަޅު ކުރެވިދާނެ ކަމަށްވެސް ބުނެފައެވެ.

މި ފަހަރުގެ ޓްރާންސްފާ ބާޒާރުގައި މެސީ ބާސާ ދޫކޮށްލަން ނިންމި ނަމަވެސް، އޭނާގެ އެއްބަސްވުމަށް ލުއި ދިނުމަށް ބާސާގެ މެނޭޖުމަންޓުން އެއްބަސްނުވުމާ ގުޅިގެން، މެސީ ވަނީ ނިންމުން ބަދަލުކޮށް މި ސީޒަނުގައި ބާސާގައި މަޑުކުރުމަށް ނިންމާފައެވެ. މި ސީޒަނުގައި މެސީއަށް އަދި މިހާތަނަށް އެންމެ އެދެވޭ ކުޅުމެއް ދެއްކިފައި ނުވާއިރު، އޭނާއަށް މިހާތަނަށް ކުޅުނު އަށް މެޗުގައި ޖެހިފައިވަނީ އެންމެ ތިން ލަނޑެވެ. އެ ތިން ލަނޑުވެސް މެސީ ޖެހީ ޕެނަލްޓީތަކުންނެވެ.

ޗެމްޕިއަންސް ލީގުގެ ގްރޫޕް ޖީގައި ހިމެނޭ ބާސާއިން މިހާތަނަށް ކުޅުނު ދެ މެޗުންވެސް މޮޅުވެފައިވާއިރު، އެ ޓީމު އޮތީ ގްރޫޕުގެ އެއްވަނައިގައި ހަ ޕޮއިންޓާއެކުއެވެ. ދެވަނައިގައި އޮތް ޔުވެންޓަސްއަށް ދެ މެޗުން ލިބިފައިިވަނީ ތިން ޕޮއިންޓެވެ. އަދި ތިންވަނައިގައި އޮތް ޑީނަމޯ ކިއެވް އާއި ފުލުގައި އޮތް ފެރެންސްވަރޯސް އަށް ލިބިފައިވަނީ ދެ މެޗުން އެންމެ ޕޮއިންޓެވެ.

ބާސާގެ ދަނޑުގައި ބުދަ ދުވަހުގެރޭ ޑީނަމޯ ކިއެވްއާ ދެކޮޅަށް ކުޅޭ މެޗު ފަށާނީ ރާއްޖެ ގަޑިން ދަންވަރު 01:00 ގައެވެ.