ގަލްފް އެއަރ ގެ ދަތުރުތައް އަލުން ރާއްޖެއަށް ފެށުމަށް ނިންމައިފި
އަންނަ މަހުގެ 12 އިން ފެށިގެން ރާއްޖެ އަށް ދަތުރުތައް ފެށުމަށް ނިންމާފައިވޭ
ގަލްފް އެއަރ ގެ ފްލައިޓެއް ރަންވޭއަށް ޖައްސަނީ
ބަހްރެއިންގެ ޤައުމީ އެއަރލައިން, ގަލްފް އެއަރ ގެ ދަތުރުތައް އަލުން ރާއްޖެއަށް ފެށުމަށް ނިންމައިފިއެވެ.
އެ އެއާލައިނުން ބުނީ އަންނަ މަހުގެ 12 އިން ފެށިގެން ރާއްޖެ އަށް ދަތުރުތައް ފެށުމަށް ނިންމާފައިވާ ކަމަށެވެ. މި އެއަރލައިން އިން ހަފްތާ އަކު ދެ ފްލައިޓު ބާއްވާނެ ކަމަށްވެސް ވަނީ ބުނެފައެވެ.
މި އެއަރލައިނުން ރާއްޖެއަށް ދަތުރުތައް ފަށަން ނިންމާފައިވާއިރު ރާއްޖޭގެ ބޯޑަރު ޖުލައި މަހުގެ 15 ވަނަ ދުވަހު ހުޅުވާލުމާއިއެކު ބޮޑެތި އެހެން އެއަރލައިން ތަކުންވެސް ދަނީ ރާއްޖެއަށް ދަތުރުތައް ފަށަމުންނެވެ. މީގެ ތެރޭގައި އޭރޯފްލޮޓް، އެއަރ އިންޑިއާ، ބްރިޓިޝް އެއަރވޭސް، އެޑްލްވެއިސް، އެމިރޭޓްސް، އިއްތިހާދު އެއަރވޭސް އަދި އޮސްޓްރިއަން އެއަރލައިން، ގޯ އެއަރ، އަދި ލުފްތަންސާ ހިމެނެއެވެ.
ފިނިމޫސުމާ ދިމާކޮށް މިމަހުގެ ބާކީއޮތް ދުވަސްތަކާއި އަންނަމަހުގެ ތެރޭގައިވެސް ރާއްޖެއަށް ގިނަ އެއަރލައިން ތަކަކުން ދަތުރުތައް ފެށުމަށް މިހާރު ވަނީ ޝެޑިއުލްކޮށްފައެވެ. އޭގެތެރޭގައި ހިމެނެނީ ނޯޑްވިންޑް، އަޒުރު އެއަރ ރަޝިއާ އަދި ޗައިނާ ސަދަން އެއަރލައިން ހިމެނެއެވެ.
އެގޮތުން ޓޫރިޒަމް މިނިސްޓަރ ޑރ. އަބްދުﷲ މައުސޫމް ވެސް ވަނީ، ނޮވެމްބަރު މަސް ނިމެންވާއިރަށް މަދުވެގެން ބައިނަލްއަޤްވާމީ 18 އެއަރލައިނަކުން ދަތުރުތައް ފަށާނެކަމަށް މީގެކުރިން ވިދާޅުވެފައެވެ.
