ކުޅުދުފުއްޓަށް ދަތުރުކުރާ ފަރާތްތަކުން ހޯމް ކަރަންޓީން ހުއްދައަށް އެދުމުގެ އުސޫލުތަކަށް ބަދަލު ގެނެސްފި
3 ނޮވެމްބަރު 2020 | އަންގާރަ 08:23ރަޖިސްޓަރ ވާނީ ހާލުބެލުން ޕޯޓަލް މެދުވެރިކޮށް
ކުޅުދުއްފުށި
ކުޅުދުފުއްޓަށް ދަތުރުކުރާ ފަރާތްތަކުން ހޯމް ކަރަންޓީން ހުއްދައަށް އެދުމުގެ އުސޫލުތަކަށް ބަދަލު ގެނަސްފިއެވެ.
ކުޅުދުއްފުށި ކައުންސިލުން ހޯމަ ދުވަހު ނެރުނު އިއުލާނެއްގައި ބުނީ ކޮވިޑް19 ރޯގާއާ ގުޅިގެން ކުޅުދުއްފުއްޓަށް ދަތުރު ކުރާނަމަ ހޯމް ކަރަންޓީންވުމަށް ހުއްދަ ހޯދަން އެ ކައުންސިލަށް އެދުމުގެ އުސޫލަށް ވަނީ ބަދަލު ގެނެވިފައިކަމަށެވެ. އެގޮތުން 02 ނޮވެމްބަރ 2020 ވަނަ ދުވަހުން ފެށިގެން ދަތުރުކުރުމުގެ ހުއްދައަށް އެދޭއިރު ދަތުރުކުރަން ބޭނުންވާ ތާރީހްގެ ރަސްމީ 03 ދުވަސް ކުރިން ހާލުބެލުން ޕޯޓަލް މެދުވެރިކޮށް ހުއްދައަށް އެދި ރަޖިސްޓަރ ވުމަށް އެރަށު ކައުންސިލުން ވަނީ އެދިފައެވެ.
ކަރަންޓީން ވުމަށް އެދޭ ގެ ޗެކް ކުރުމާއި ގުޅުންހުރި ލިޔެކިޔުން ތައްޔާރު ކުރުމަށް އެކަށީގެންވާ ވަގުތު އެ އިދާރާއަށް ދިނުމަށް އިލްތިމާސް ކުރާކަމަށްވެސް މި އިއުލާނުގައި ވެއެވެ. މިގޮތަށް އުސޫލު ބަދަލުކުރެވިފައި ވަނީ ހުއްދަ ދޫކުރުމުގައި ހުރިހާ ރައްޔިތުންނަށްވެސް އެއް ދުވެއްޔެއްގައި ހިދުމަތް ފޯރުކޮށްދެވޭކަން ކަށަވަރުކުރުމުގެ އިތުރުން ދުވަހުން ދުވަހަށް ހުއްދަތައް ދޫކުރުމުގައި އެކަށީގެންވާ ވަގުތު ނުލިބުމުގެ ސަބަބުން އިންތިހާއަށް ދަތިތަކެއް ކުރިމަތިވަމުން ދާތީ ކަމަށްވެސް ބުނެއެވެ.
މީގެ އިތުރުންވެސް ހުއްދަ ހޯދުމުގެ މަރުހަލާ އަވަސްކުރުމަށް، ހުރިހާ ގުޅުން ހުރި ލިޔުންތައް ހަމަކުރުމަށްފަހު 9531312 އަށް ވައިބަރ ކުރުމަށް ނުވަތަ އެ ރަށުގެ ރަސްމީ އީމެއިލް އެޑްރެހަށް ދުރާލާ މެއިލް ކުރުމަށް ވަނީ ހަނދާން ކޮށްދީފައެވެ.
