ތިމާވެށި ހިމާޔަތް ކުރުމާއި އުމްރާނީ ތަރައްޤީގެ މަސައްކަތައް ކުރިއަށް ގެންދަން ޖެހިފައި އޮތީ އެއްމަގަކުން ކަމަށް ވިދާޅުވި
ރަށެއްގެ ބިން ހިއްކަނީ
ތިމާވެށި ހިމާޔަތް ކުރުމާއި އުމްރާނީ ތަރައްޤީގެ މަސައްކަތް އެއްމަގަކުން ގެންދިއުމަކީ އުނދަގޫކަމެއް ކަމަށް އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ) އިން ބުނެފިއެވެ.
ހޯމަ ދުވަހުގެ ރޭ ރާއްޖެޓީވީގެ "ފަލަ ސުރުޚީ'' ޕްރޮގްރާމުގައި ވާހަކަ ދައްކަވަމުން އީޕީއޭގެ ޑެޕިއުޓީ ޑިރެކްޓަރ ޖެނެރަލް ޑރ. އިބްރާހިމް މުހައްމަދު ވިދާޅުވީ ތަރައްޤީއާއި ތިމާވެށި ހިމާޔަތްކުރުން އެއްމަގަކުން ގެންދިއުމަކީ ހަލަބޮލި އަދި ގިނަ ގޮންޖެހުންތަކެއް ކުރިމަތިވާކަމެއް ކަމަށެވެ.
ނަމަވެސް ތިމާވެށި ހިމާޔަތް ކުރުމާއި އުމްރާނީ ތަރައްޤީގެ މަސައްކަތައް ކުރިއަށް ގެންދަން ޖެހިފައި އޮތީ އެއް މަގަކުން ގުޅިލާމެހިފައިވާ ކަމެއްގެ ގޮތުގައި ކަމަށް އޭނާ ވިދާޅުވިއެވެ.
އިތުރަށް ޑރ. އިބްރާހިމް ވިދާޅުވީ ބިނާވެށީގެ ޕްލޭންތަކާއި ތަރައްޤީ މަޝްރޫއުތައް ހިންގަން ޖެހޭނީ ދިވެހިރާއްޖެއަކީ ޖަޒީރާ ޤައުމަކަށް ވުމުން ޖަޒީރާ ގައުމުތަކުގެ ނާޒުކު ކަމާއި ތަނުގެ ހާލަތަށް ބަލައި ރަނގަޅަށް ދިރާސާ ކޮށްގެން ކަމަށެވެ. އެގޮތަށް މަޝްރޫއުތައް ހިންގާއިރު ކަނޑައަޅަންޖެހޭ ވަކި ހުދޫދުތަކެއް އެބަ އޮތްކަން އޭނާ ފާހަގަ ކުރެއްވިއެވެ.
މި ހުދޫދުތަކާއި މިންގަނޑުތައް މިއީ ނާޒުކު ވެއްޓަށް އެންމެ ރަނގަޅަށް ދެމެހެއްޓެނިވި ގޮތެއްގައި ތަންތަން ބެލެހެއްޓޭނެ ގޮތަކަށް ކަނޑައެޅިފައިވާ މިންގަނޑުތަކެއްތޯ ޔަގީންކުރަން ޖެހޭނެ ކަމަށެވެ.
ތަރައްޤީގެ މަޝްރޫއުތައް ރާވާ ހިންގަން ޖެހޭނީ މި ހުދޫދުތަކުގެ ތެރެއިން ބޭރު ވެގެން ނުދާގޮތަށް ކަމަށް އޭނާ ވިދާޅުވިއެވެ.
