ދެމެހެއްޓެނެވި ގޮތަށް ތަރައްގީ ނުކުރެވިއްޖެނަމަ ގޮންޖެހުންތަކާ ކުރިމަތިލާން ޖެހޭނެ: އީޕީއޭ
ގުދުރަތީ ކާރިސާތަކުގެ ސަބަބުން ރަށްތަކުގެ ރައްކާތެރިކަން ވަރަށް ފަސޭހައިން ނެތިގެންދޭ
އީޕީއޭގެ ޑެޕިއުޓީ ޑިރެކްޓަރ ޖެނެރަލް ޑރ. އިބްރާހިމް މުހައްމަދު އަދި އީޕީއޭގެ އިންޖިނިއަރ އަލީ މިޝާލް
ރާއްޖޭގެ ތަރައްގީގެ ކަންތައްތައް ދެމެހެއްޓެނެވި ގޮތަކަށް ކުރިއަށް ނުގެންގޮސްފިނަމަ ގިނަ ގޮންޖެހުންތަކަކާއި ކުރިމަތިލާން ޖެހޭނެ ކަމަށް އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) ގެ ޑެޕިއުޓީ ޑިރެކްޓަރ ޖެނެރަލް ޑރ. އިބްރާހިމް މުހައްމަދު ވިދާޅުވެއްޖެއެވެ.
ރާއްޖެޓީވީގެ "ފަލަސުރުހީ" ޕްރޮގްރާމްގައި ޖަޒީރާ ގައުމެއްގެ ގޮތުގައި ރާއްޖެ އޮވެ، ތިމާވެށީގެ ދާއިރާގައި ކުރިމަތިވާ ގޮންޖެހުންތަަކާއި ގުޅޭ ގޮތުން ވާހަކަ ދައްކަވަމުން ޑރ. އިބްރާހިމް ވަނީ ރާއްޖޭގެ ޖަޒީރާ ރަށްތައް އުފެދިފައި ވަނީ ވަރަށް ނާޒުކު ނިޒާމެއްގެ ތެރެއިން ކަމަށާއި މި ނިޒާމުގެ ތެރޭގައި އެެތައްހާސް އަހަރެއް ވަންދެން މި ރަށްތައް ދެމި އޮތްކަން ފާހަގަކުރައްވާފައެވެ.
އެގޮތުން ގުތުރަދީ ނިޒާމަށް ކުޑަ ވެސް ބަދަލެއް އައިސްފިނަމަ ނުވަތަ ގުދުރަތީ ކާރިސާތަކުގެ ސަބަބުން މި ރަށްތަކުގެ ރައްކާތެރިކަން ވަރަށް ފަސޭހައިން ނެތިގެން ދާކަން ފާހަގަކޮށް ޑރ. އިބްރާހިމް ވަނީ ރަށްތައް ހިމާޔަތްކުރުމަށް މަސްނޫއީ ނިޒާމެއްގެ ތެރެއިން އަމަލުކުރަން ޖެހުމުން ވަރަށް ބޮޑު ހަރަދެއް ކުރަން ޖެހޭ ކަމަށް ފާހަގަކޮށްފައެވެ. އެގޮތުން ދުރު ވިސްނުމެއްނެތި ހިންގާ ބަނދަރު ހެދުމުގެ މަޝްރޫއުތަކާއި ގުޅިގެން ގޮނޑުދޮށް ގިރުން ފަދަ ކަންތައްތަކުގެ ސަބަބުން ރަށްތައް ރައްކާތެރިކުރަން އެތައް ބިލިއަން ފައިސާއެއް ހަރަދުކުރަން ޖެހޭ ކަމަށް ވިދާޅުވިއެވެ.
މީގެ އިތުރުން، އިންސާނުންގެ އަމަލުތަކުގެ ސަބަބުން މޫސުމަށް އަންނަ ބަދަލު ތަކުގެ ސަބަބުން ވެސް ރާއްޖޭގެ ރަށްތަކަށް ގިނަ ގެއްލުންތަކެއް ވަމުން އަންނަ ކަމަށާއި އެހެންނަމަވެސް މިއީ ދިވެހިންގެ އަތުން ރަށްތަކަށް ލިބޭ ގެއްލުން ނޫން ކަމަށާއި މިއީ ބޮޑެތި ގައުމުތަކުން އެ ގައުމުތަކުގެ ނަފާއަށް ދޫކުރާ ވިހަ ގޭސްތަކުގެ ސަބަބުން ލިބޭ ގެއްލުން ކަމަށް ޑރ. އިބްރާހިމް ވަނީ ފާހަގަކޮށްފައެވެ.
އަދުގެ ޖީލަށް ލިބިފައިވާ ގުދުރަތީ ވަސީލަތްތައް ހަމަހަމަކަން މަތީ ކުރިއަށް އޮތް ޖީލުތަކަށް ގެންގޮސް ދޭން ޖެހޭނެ ކަމަށާާއި މިހާރު ކުރިއަށް ގެންދާ ތަރައްގީގެ ހުރިހާ މަޝްރޫއެއް ވެސް ކުރިއަށް ގެންދަން ޖެހޭނީ ގުދުރަތީ ވަސީލަތްތަކުގެ ބޭނުން އެންމެ ފުރިހަމަ ގޮތުގައި ހިފޭނެ ގޮތަށް ކަމަށް ވެސް ޑރ. އިބްރާހިމް ވިދާޅުވިއެވެ.
މީގެ އިތުރުން ރާއްޖޭގެ ރަށްތަކުގެ ނާޒުކުކަން ވިސްނުމުގައި ބަހައްޓައިގެން ބިނާވެށި ޕްލޭން އަދި ތަރައްގީގެ މަޝްރޫއުތައް ކުރިއަށް ގެންދިއުމުގެ މުހިންމު ކަން ޑރ. އިބްރާހިމް ފާހަގަކުރައްވާފައިވާއިރު، އުމްރާނީ ތަރައްގީގެ މަޝްރޫއުތައް ކުރިއަށް ގެންދަން ޖެހޭނީ ކަނޑައެޅިފައިވާ މިންގަޑެއްގެ ތެރެއިން ކަމަށް ވެސް ވިދާޅުވިއެވެ.
ތަރައްގީގެ މަޝްރޫއުތައް ކުރިއަށް ގެންދާއިރު، އޭގެ ސަބަބުން ތިމާވެއްޓަށް ކޮށްފާނެ ނޭދެވޭ އަސަރުތައް ދެނެގަންނަން ޖެހޭނެ ކަމަށާއި އެގޮތުން ސްޓްރެޓެޖިކް އެންވަޔަރަމެންޓަލް ޕްލޭނެއް ގެންގުޅުމަކީ މުހިންމު ކަމެއް ކަމަށް ވިދާޅުވިއެވެ. އަދި މަޝްރޫއު ފެށުމުގެ ކުރިން ތިމާވެއްޓަށް އަސަރު ފޯރާ މިންވަރު ދެނެގަތުމަށް ދިރާސާކޮށް ބަލައި ރިޕޯޓް ހަދަން ޖެހޭނެ ކަަމަށް ފާހަގަކުރެއްވިއެވެ.
