އީޕީއެސްއެސް އިން ތަޢުލީމު ހާސިލުކުރި ދަރިވަރުންތަކެއް އިސްނަގައިގެން "އީޕީއެސް ހަނދާން" ގެ ނަމުގައި މަޖައްލާއެއް ނެރެފިއެވެ.
އާދިއްތަ ދުވަހު ސްޓެލްކޯގެ ޖަލްސާކުރާ މާލަމުގައި ބޭއްވި ޖަލްސާގައި މި މަޖައްލާ އިފްތިތާޙްކޮށްދެއްވީ ރައީސުލް ޖުމްހޫރިއްޔާގެ ނައިބު ފައިޞަލް ނަސީމްއެވެ.
"އީ.ޕީ.އެސް ހަނދާން" މަޖައްލާއާއި ބެހޭ ގޮތުން ވާހަކަފުޅު ދައްކަވަމުން އެ މަޖައްލާގެ އެކްޒެކްޓިވް އެޑިޓަރ ޑރ. ސުނީނާ ރަޝީދު ވިދާޅުވީ 1968 ވަނަ އަހަރުގެ ޖޫން މަހުގެ 21 ވަނަ ދުވަހު ހުޅުވުނު އީ.ޕީ.އެސް ސްކޫލުގެ 26000 ށް ވުރެއް ގިނަ ދަރިވަރުންގެ ހުވަފެނުގައި މިއަދު ކުލަ ޖެހިގެން ގޮސްފިކަމަށެވެ.
މި މައްޖައްލާ ނެރުމުގެ މައިގަނޑު ތިން މަޤްސަދެއް ވާކަން ފާހަގަ ކުރައްވާ ސުނީނާ ވިދާޅުވީ ފުރަތަމަ މަޤްސަދަކީ ސުކޫލުގެ ނަން ދިރުވާއާލާ ކުރުމާއި އިސްލާމް ދީނާއި ގައުމިއްޔަތު އާލާ ކުރުން ކަމުގައެވެ. ދެވަނަ މަޤްސަދަކީ މުޖުތަމައުގައި ގައުމީ ލޯތްބާއި އެއްބައިވަންތަކަމާއި ރިވެތި އަހުލާގާއި ސުލޫކު ގާއިމް ކުރުން ކަމަށެވެ.
އަދި ތިންވަަނަ މަޤްސަދު ފާހަގަ ކުރައްވާ ވިދާޅުވީ ފެންވަރު ރަނގަޅު ދިވެހި ލިޔުންތައް މުޖުތަމައުގައި ބޭނުން ހިފޭ ގޮތަށް ނެރުން ކަމަށެވެ.
"އީ.ޕީ.އެސް ހަނދާން" މަޖައްލާ އެޑިޓަރ އީ.ޕީ.އެސް ސުކޫލާއި ބެހޭ ގޮތުން މައުލޫމާތު ދެއްވަމުން އަލްފާޞިލް މުހައްމަދު ވަޖީހު ވިދާޅުވީ އެ ސުކޫލަކީ އަގުހުރި ހުނަރުވެރި އެތައް ދަރިންނެއް މުޖުތަމައުއަށް ނެރެދީފައިވާ ސުކޫލެއް ކަމަށެވެ.
މީގެ އިތުރުން އީ.ޕީ.އެސް އަކީ އެންމެ ފުރަތަމަ އިންގްލިޝް މީޑިއަމް އަށް ކިޔަވައިދޭން ފެށި އަމިއްލަ ސުކޫލު ކަމަށާއި, އެންމެ ފުރަތަމަ ޕްރީސްކޫލުގެ ހިދުމަތް ދިން އަމިއްލަ ސުކޫލު ކަމަށާއި, އެންމެ ފުރަތަމަ ލައިބްރަރީއެއް އަދި ލެބޯރަޓަރީއެއް ގާއިމް ކުރި އަމިއްލަ ސްކޫލް ކަމަށެ އެވެ. މީގެ އިތުރުން ވެސް އެތައްކަމެއް ފާހަގަ ކޮއްފައިވެއެވެ.
މި ޖަލްސާގައި ވާހަކަފުޅު ދައްކަވަމުން ނައިބު ރައީސް ވަނީ ދަރިވަރުންގެ ތަޢުލީމާއި ތަރުބިއްޔަތަށް އީޕީއެސް ސްކޫލުން ކޮށްދީފައިވާ މަސައްކަތްތައް ފާހަގަކުރައްވައި އެ ސްކޫލުގެ ކުރީގެ ހިންގުންތެރިންނާއި މުދައްރިސުންނަށް ޝުކުރު އަދާކުރައްވާފައެވެ.
"އީ.ޕީ.އެސް ހަނދާން" މަޖައްލާ ނެރެން ހަމަޖެހިފައިވަނީ އަހަރަކު ހަތަރު ފަހަރެވެ. މި މަޖައްލާާ އީ.ޕީ.އެސް ފައުންޑޭޝަން ގެ ވެބްސައިޓްWww.epsfoundationmv.orgއިންވެސް ލިބިވަޑައިގަންނަވާނެއެވެ.
