ފަހަކަށް އައިސް ސްޓްރޯކް ޖެހޭ މީހުންގެ އަދަދު ގިނަކަން ފާހަގަކުރެވޭ: ޑރ. ރަޝީދު
އޮކްޓޯބަރު 29 ވަނަ ދުވަހަކީ ވޯލްޑް ސްޓްރޯކް ޑޭ
ދަރުމަވަންތަ ހޮސްޕިޓަލް
ރާއްޖޭގައި ފަހަކަށް އައިސް ސްޓްރޯކް ޖެހޭ މީހުންގެ އަދަދު ގިނަވަމުންދާކަން ފާހަގަ ކުރެވޭ ކަމަށް އައިޖީއެމްޗްގެ ނިއުރޮލޮޖިސްޓް ޑރ. އަހުމަދު ރަޝީދު ވިދާޅުވެއްޖެ އެވެ.
ވޯލްޑް ސްޓްރޯކް ޑޭ އާއި ގުޅޭގޮތުން ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން ޑރ. ރަޝީދު ވިދާޅުވީ ސްޓްރޯކަށް ދެވެންހުރި ފަރުވާ ރާއްޖޭގައިވެސް ދަނީ ދުވަހުން ދަވަހަށް ދެމުން ކަމަށާއި ކުރިން ރަޢްޖޭގައި ދެވެން ނެތް ފަރުވާތައް މިހާރު ރާއްޖޭއިންވެސް ދެވެން ހުރި ކަމަށެވެ. އަދި ސްޓްރޯކް ޖެހޭ ސަބަބު ދެނެގަންނަން ކުރިން ނެހެދޭ އައު ޓެސްޓްތައްވެސް މިހާރު ހެދެން ހުރިކަމަށް ޑޮކްޓަރ ވިދާޅުވިއެވެ.
ކޮންމެ އަހަރެއްގެ ވެސް އޮކްޓޯބަރު 29 ވަނަ ދުވަހަކީ ދުނިޔޭގައި ފާހަގަ ކުރާ ވޯލްޑް ސްޓްރޯކް ޑޭ އެވެ.
ކުރިން ރާއްޖޭގައި މިދުވަސް ކުލަ ގަދަކޮށް ފާހަގަ ނުކުރި ނަމަވެސް ދެން ކޮންމެ އަހަރަކުވެސް ރާއްޖޭގައި މިދުވަސް ފާހަގަ ކުރަމުންދާނެ ކަމަށް ޑޮކްޓަރ ވިދާޅުވިއެވެ.
ޖެހޭ ހުރިހާ ސްޓްރޯކެއްގެ ތެރެއިން 90 ޕަސެންޓް ސްޓްރޯކް އަކީ ޕްރިވެންޓް ކުރެވެން ހުންނަ ސްޓްރޯކްކަން ޑރ، ފާހަގަ ކުރެއްވިއެވެ.
ޑރ. ރަޝީދު ވިދާޅުވީ މިއަހަރުގެ ސްޓްރޯކް ދުވަހުގެ ތީމް އަކީ "ޖޮއިން ދަ މޫވްމަންޓް" ކަމަށާއި އޭގެ މާނަ އަކީ ހަރަކާތްތެރިވެ ހެލިފެލިވެ ކަސްރަތު ކުރުން ކަމަށެވެ.
މިދުވަސް ފާހަގަ ކުރުމުގެ ބޭނުމަކީ ސްޓްރޯކާއި ބެހޭގޮތުން ހޭލުންތެރިކަން އިތުރުކުރުން ކަމަށެވެ. ސްޓްރޯކަކީ ކޮބައިކަމާއި، ސްޓްރޯކެއް ޖެހިއްޖެނަމަ އަމަލު ކުރާނެ ގޮތާއި، ސްޓްރޯކުން ދުރުވާނެ ގޮތްތަކާއި އަދި ސްޓްރޯކަކަށްފަހު ދިރިއުޅުން ބައްޓަން ކުރާނެ ގޮތަށް މީހުން ހޭލުންތެރިކަން އިތުރުކުރުން ކަަމަށެވެ.
