ޕޮމްޕެއޯގެ ދަތުރުފުޅު: ސަލާމަތީ ކަންކަން ބެލެހެއްޓުމުގައި ފުލުހުންގެ ދައުރު ވަރަށް ބޮޑު!
29 އޮކްޓޯބަރު 2020 | ބުރާސްފަތި 12:52ފުލުހުން ވަރަށް ފުރިހަމަ އަދި ޕްރޮފެޝަނަލް މަސައްކަތްތަކެއް ކޮށްފައިވޭ
ސަލާމަތީ ކަންކަން ބެލެހެއްޓުމުގައި ފުލުހުން ހަރަކާތްތެރިވަނީ
އެމެރިކާގެ ސެކްރެޓަރީ އޮފް ސްޓޭޓް މައިކަލް ރިޗަރޑް ޕޮމްޕެއޯ ރާއްޖެއަށް ކުރެއްވި ރަސްމީ ދަތުރުފުޅުގެ ސަލާމަތީ ކަންކަން ބެލެހެއްޓުމުގައި ދިވެހި ފުލުހުންގެ ދައުރު ވަރަށް ބޮޑު ކަމަށް ކޮމިޝަނަރ އޮފް ޕޮލިސް، މުހައްމަދު ހަމީދު ވިދާޅުވެއްޖެއެވެ.
ފުލުހުންގެ މަސައްކަތްތަކަށް ވަރަށް ބޮޑަށް ތައުރީފް ކުރައްވައި ސީޕީ ހަމީދު ވިދާޅުވީ ޕޮމްޕެއޯ ރާއްޖެއަށް ކުރެއްވި ރަސްމީ ދަތުރުފުޅުގެ ސަލާމަތީ ކަންކަން ބެލެހެއްޓުމުގައި ފުލުހުން ވަރަށް ފުރިހަމަ އަދި ޕްރޮފެޝަނަލް މަސައްކަތްތަކެއް ކޮށްފައިވާ ކަމަށެވެ.
ސަރުކާރުގެ އެހެނިހެން ސަލާމަތީ ބާރުތަކާ ގުޅިގެން ފުލުހުން ކުރި މިންނެތް މަސައްކަތްތަކަށް ވަނީ ޝުކުރު ދަންނާވާފައެވެ.
އެމެރިކާގެ ސެކްރެޓަރީ އޮފް ސްޓޭޓުގެ ދަތުރުފުޅާ ގުޅިގެން ބުދަ ދުވަހު ވަނީ މާލެ ސިޓީގެ ހަތަރު ސަރަހައްދެއް ސަލާމަތީ ސަބަބުތަކަށްޓަކައި އެކި ވަގުތުތަކުގައި ބަންދުވެސް ކޮށްފައެވެ. އެގޮތުން މަގުތަކުގެ ރައްކާތެރިކަން ކަށަވަރު ކުރުމަށް ކުރި މަސައްކަތްތަކުގައި އާންމު ރައްޔިތުންގެ ފަރާތުން ފުލުހުންނަށް ދީފައިވާ އެއްބާލުން ވެސް ވަނީ ފާހަގަކޮށްފައެވެ.
އެމެރިކާގެ ސެކްރެޓަރީ އޮފް ސްޓޭޓްގެ މި ދަތުރުފުޅަކީ 1992 ވަނަ އަހަރުގެ ޖުލައި މަހުގެ 24 ވަނަ ދުވަހު އެމެރިކާގެ އޭރުގެ ޚާރިޖީ ވަޒީރު ޖޭމްސް އެޑިސަން ބޭކަރ ރާއްޖެއަށް ކުރެއްވި ރަސްމީ ދަތުރުފުޅަށްފަހު، އެމެރިކާ ސަރުކާރުގެ ފަރާތުން ރާއްޖެއަށް ކުރެއްވި އެންމެ މަތީ ފަންތީގެ ދަތުރުފުޅެވެ.
