ޝިޔާމްގެ ސިއްޙީ ހާލުކޮޅު އަންނަނީ ރަނގަޅުވަމުން: ޕީޕީއެމް
28 އޮކްޓޯބަރު 2020 | ބުދަ 04:41އޭނާ އަށް ފަރުވާދެމުންދަނީ އޭޑީކޭ ހޮސްޕިޓަލުގައި
ޝިޔާމްގެ ހާލުކޮޅު ގޯސްވެފައިވަނީ އޭނާ މަޖިލީހުގައި އިންނަވަނިކޮށް
ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަޙްމަދު ޝިޔާމްގެ ސިއްޙީ ޙާލުކޮޅު އަންނަނީ ރަނގަޅުވަމުން ކަމަށް އިދިކޮޅު ޕީޕީއެމުން ބުނެފިއެވެ.
ޝިޔާމް މަޖިލީހުގައި ހުންނަވަނިކޮށް ޞިއްޙީ ޙާލުކޮޅު ދެރަވެގެން އޭޑީކޭ ހޮސްޕިޓަލަށް ގެންދެވިފައިވަނީ އަންގާރަ ދުވަހުގެ ހެނދުނުގެ ވަގުތެއްގައެވެ. ޕީޕީއެމުން ބުނީ ޝިޔާމްގެ ޓެސްޓްތަކެއް ހަދާ އިތުރަށް ޗެކްކޮށްލަން ޑޮކްޓަރު ބޭނުންވާތީ އޭޑީކޭ ހޮސްޕިޓަލްގައި އެޑްމިޓްކުރެވިފައިވާ ކަމަށެވެ. އަދި ޓެސްޓުތަކުން ކޮވިޑް-19ށް ނެގެޓިވްކަމާށާއި ޙާލުކޮޅު ރަނޅުވަމުން އަންނަ ކަމަށެވެ.
މީގެ އިތުރުން 2 ޖޫން 2020 ވަނަ ދުވަހުގެ ދަންވަރު 1:30 ގައި ބޭއްވި ރައްޔިތުންގެ މަޖިލީހުގެ ޖަލްސާގައި، މަޖިލީހުގެ ތަޅުމުގައި ޕީޕީއެމްގެ ނައިބުރައީސް ނައިފަރު ދާއިރާގެ މެންބަރު އަޙްމަދު ޝިޔާމަށް ދިން ޙަމަލާގައި މައިބަދައަށް ލިބުނު އަނިޔާތަކާ ގުޅިގެން، ސިއްޙީ އެކިއެކި މައްސަލަތައް ކުރިމަތިވަމުންދާކަމަށެވެ.
އަދި ޝިޔާމްގެ ސިއްޙީ ޙާލުކޮޅު ގޯސްވުމާ ގުޅިގެން އަވަސް ޝިފާއަކަށް އެދި މެސެޖް ފޮނުއްވަމުން ގެންދަވާ ހުރިހާ ފަރާތްތަކަށް ޝުކުރު އަދާކުރާ ކަމަށާއި، ހޮސްޕިޓަލަށް ގެންދިއުމަށް އެހީތެރިވެވަޑައިގެންނެވި ރައްޔިތުންގެ މަޖިލީހުގެ ހުރިހާ މެންބަރުންނަށް ވެސް ޕީޕީއެމުން ވަނީ ޝުކުރު އަދާކޮށްފައެެވެ.
"ރާއްޖެއެމްވީ" އަށް މައުލޫމާތު ލިބިފައިވާގޮތުގައި އަންގާރަ ދުވަހު ޝިޔާމް މަޖިލީހުގެ ތަޅުމަށްވެސް ވަޑައިގެންނެވި އެވެ. ނަމަވެސް ޝިޔާމްގެ ހާލުކޮޅު ގޯސްވެފައިވަނީ އޭނާ މަޖިލީހުގެ ތަޅުމުން ނުކުމެވަޑައިގެން ގޯތިތެރޭގައި ހުންނަވަނިކޮށެ އެވެ.
