ބާސާގެ ރައީސްގެ މަގާމުން ބާޓޮމެއޫ އިސްތިއުފާ ދެއްވައިފި

އިތުބާރު ނެތްކަމުގެ ވޯޓުނަގަން ނިންމާފައިވަނިކޮށް ބާސެލޯނާގެ ރައީސްގެ މަގާމުން ޖޯސެފް މާރިއާ ބާޓޮމެއޫ އިސްތިއުފާ ދެއްވައިފިއެވެ.

ބާޓޮމެއޫ އާއި އެ ކުލަބުގެ ހުރިހާ ބޯޑު މެންބަރުން މަގާމުން އިސްތިއުފާ ދެއްވުމަށް ނިންމެވީ އަންގާރަ ދުވަހުގެރޭ ބޭއްވި ބޯޑު މެންބަރުންގެ ބައްދަލުވުމުގައެވެ.

ބާޓޮމެއޫ މަގާމުން އިސްތިއުފާ ދެއްވީ މިދިޔަ ސެޕްޓެމްބަރު މަހުގެ 17 ވަނަ ދުވަހު ބާސާގެ މެންބަރުން 20,687 މީހުންގެ ސޮޔާއެކު ބާޓޮމެއޫގެ އިތުބާރު ނެތްކަމުގެ ވޯޓެއް ނަގަން ހުށަހަޅާފައި ވަނިކޮށެވެ. ބާސާގެ ގަވާއިދު ބުނާ ގޮތުން އިތުބާރު ނެތްކަމުގެ ވޯޓެއް ނެގުމަށް ބޭނުންވަނީ 16,520 މީހުންގެ ސޮޔެވެ. އެހެންކަމުން ބާޓޮމެއޫގެ އިތުބާރު ނެތްކަމުގެ ވޯޓެއް ނަގަން ބޭނުންވާ ވަރަށް ސޮއި ހަމަވިކަން ބާސާއިން މީގެ ކުރިން ހާމަކުރިއެވެ.

އަންގާރަ ދުވަހުގެރޭ ބޭއްވި ބައްދަލުވުމަށްފަހު ބާޓޮމެއޫ އިސްތިއުފާ ދެއްވި ނަމަވެސް، މިދިޔަ ހޯމަ ދުވަހު އޮތް ބާސާގެ ބޯޑު މެންބަރުންގެ ބައްދަލުވުމަށްފަހު ބާޓޮމެއޫ ވަނީ އިސްތިއުފާ ނުދެއްވާނެ ކަމަށް ބުނެފައެވެ. އެ ދުވަހު ބާޓޮމެއޫ ވިދާޅުވީ ބާސާގައި ވަރަށް ޝައުގުވެރިވާ މަޝްރޫއުތަކެއް އެބަހުރި ކަމަށާއި، އެ މަޝްރޫއުތައް ހުއްޓައި އިސްތިއުފާ ދިނުމަށް އޭނާގެ ހިޔާލަށްވެސް ނާންނަ ކަމަށެވެ. އެކަމަކު އިތުބާރު ނެތް މައްސަލައިގެ ވޯޓުގައި ނިންމާ ނިންމުމަކަށް މަރުހަބާ ކިޔާނެ ކަމަށް ވިދާޅުވިއެވެ.

އެހެން ވިދާޅުވުމަށްފަހު ބާޓޮމެއޫ މަގާމުން އިސްތިއުފާ ދެއްވިއިރު، އޭނާއަށް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އޭގެ ތެރޭގައި ބާސާގެ ކެޕްޓަން ލިއޮނެލް މެސީ އާއި މީގެ ކުރިން ބާސާއަށް ކުރިން ކުޅުނު ގިނަ ކުޅުންތެރިންތަކެއްވެސް ހިމެނެއެވެ. އެގޮތުން ކުރީގެ ކޯޗު ޕެޕް ގާޑިއޯލާ އާއި ޒަވީ ހެނާންޑޭޒް އަދި އަންދްރެސް އިނިއެސްޓާވެސް ވަނީ މީގެ ކުރިން ބާޓޮމެއޫއަށް ފާޑުކިޔާފައެވެ. އަދި ރިޕޯޓުތައް ބުނާގޮތުން ޖެނުއަރީ މަހު ބާސާގެ ކޯޗުކަމާ ހަވާލުވާން ޒަވީއަށް ލިބުނު ފުރުސަތު އޭނާ ދޫކޮށްލީވެސް ބާޓޮމެއުއާ މެދު ހިތްހަމަނުޖެހޭތީއެވެ.

ބާސާގެ ރައީސްގެ މަގާމުން ބާޓޮމެއޫ އިސްތިއުފާ ދެއްވުމާ ގުޅިގެން އެ ކުލަބުގެ އައު އިންތިޚާބު ކުރިއަށް އޮތް 40 ދުވަހާއި ތިން މަހުގެ މުއްދަތުގެ ތެރޭގައި ބާއްވަން ޖެހޭނެއެވެ. އެހެންކަމުން ބާސާގެ އިންތިޚާބު އަންނަ އަހަރުގެ ޖެނުއަރީ މަހު ބާއްވާނެ ކަމަށް މީޑިއާތަކުން ވަނީ ރިޕޯޓުކޮށްފައެވެ.

ބާޓޮމެއޫ އިސްތިއުފާ ދެއްވިއިރު، މީގެ ކުރިން ބާޓޮމެއޫ ކުލަބު ހިންގާ ގޮތާ މެދު ހިތްހަމަނުޖުން ފާޅުކޮށް، ބާސާގެ ޑިރެކްޓަރުންގެ ބޯޑުގެ ހަ މެންބަރަކު ވަނީ މި އަހަރުގެ އޭޕްރީލް މަހުގެ ތެރޭގައި އިސްތިއުފާ ދެއްވާފައެވެ.

ބާޓޮމެއޫ އަކީ އެ ކުލަބުގެ 40 ވަނަ ރައީސެވެ. އޭނާ އެންމެ ފުރަތަމަ ބާސާގެ ރައީސްގެ މަގާމާ ހަވާލުވީ 2014 ވަނަ އަހަރު އޭރުގެ ރައީސް ސަންޑްރޯ ރޮސެލް މަގާމުން އިސްތިއުފާ ދެއްވުމުންނެވެ. އޭގެ ފަހުން 2015 ވަނަ އަހަރު ބޭއްވި އިންތިޚާބު ބާޓޮމެއޫ ކާމިޔާބުކުރެއްވިއެވެ.