ދަރުބާރުގޭގެ ކުރިމަތީ ގޯޅި ތެރޭގައި ހުންނަ، ހ. ހަންޑްރެޑް ފްލާވާސް, ޖައިލަމް އަހުމަދު ޝާކިރުގެ މަރުގެ މައްސަލައިގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި އަންގާރަ ދުވަހު ކްރިމިނަލް ކޯޓުގައި ކުރިއަށް ގެންދިޔަ ޝަރީއަތުގެ އަޑުއެހުމުގައި މައްސަލަ ބައްލަވާ ގާޒީ އިސްމާއިލް ރަޝީދު ވަނީ ދައުވާ ސާބިތު ކުރުމަށް ދައުލަތުން ހުށައަޅާފައިވާ ސިއްރު ހެކިވެރިޔާގެ ހެކިބަސް ނެގުމަށް ތާވަލު ކޮށްފައިވާއިރު، ސިއްރު ހެކިވެރިޔާ ހާޒިރު ނުކުރެވުނީ ކީއްވެތޯ ސުވާލު ކުރައްވާފައެވެ.

އެކަމާ ގުޅޭގޮތުން ދައުލަތުން ބުނީ، ސިއްރު ހެކިވެރިޔާ 1 ހުރީ މާލޭގައި ނޫން ކަމަށާއި، އެހެން ތަނަކަށް ހާޒިރު ކޮށްގެންވެސް ހެކި ހާޒިރު ކުރެވޭނެ އިންތިޒާމު ދައުލަތަށް ހަމަޖެހިފައި ނުވާ ކަމަށެވެ. އަދި ހާޒިރު ނުކުރެވުނު ސަބަބު ހާމަ ކޮށްފިނަމަ ސިއްރު ހެކިވެރިޔާގެ މައުލޫމާތު އެނގިދާނެކަން ފާހަގަކޮށް ދައުލަތުން ބުނީ، އެކަން ވަކިން ޝަރީއަތަށް އަންގާނެ ކަމަށެވެ.

އެކަމާ ގުޅޭގޮތުން ދިފާއުން ބުނީ، ސިއްރު ހެކިވެރިޔާ 1 ހާޒިރު ކުރުމަށް މީގެ ކުރިންވެސް މަސައްކަތްކޮށް، އެކަން ނާކާމިޔާބު ވެފައިވާއިރު، ނިމިދިޔަ ޖެނުއަރީ މަހު ބޭއްވި އަޑުއެހުންވެސް ކުރިއަށް ނުގެންދެވުނީ އެކަމާ ގުޅިގެން ކަމަށެވެ. އަދި މައްސަލަ ލަސްވެގެން ދާ ދިއުމަށް ރިއާޔަތްކޮށް ދިފާއުން ބުނީ، ސިއްރު ހެކި 1 ބަލައި ނުގަތުމަށް ދިފާއުން އެދޭ ކަމަށެވެ.

އޭގެ އިތުރުން، މި މައްސަލަ ޤާނޫނުގައި ބަޔާން ކޮށްފައިވާ އެކަށީގެންވާ މުއްދަތެއްގައި ނިންމުމަށްވެސް ދިފާއުން ވަނީ އެދިފައެވެ. އެއާއެކު، މި މައްސަލަ މެދުނުކެނޑި ހިނގާ (ކޮންޓިނިއަސް) ޝަރީއަތެއްގެ ގޮތުގައި ކުރިއަށް ގެންދިއުމަށް ދިފާއީ ވަކީލު ވަނީ އެދިފައެވެ. އަދި މި މައްސަލައަށް އެތައް އަހަރެއް ވެގެންދާއިރު، ހެކި ހުށައަޅަން ދައުލަތަށް އެކަށީގެންވާ މިންވަރަށް އެތައް ފުރުސަތުތަކެއް ދީފައިވާކަންވެސް ދިފާއުން ފާހަގަ ކުރިއެވެ.

ޖައިލަމްގެ މަރުގެ މައްސަލައިގައި ތޫނު އެއްޗެއް ބޭނުން ކޮށްގެން ޤަސްތުގައި މީހަކު މެރުމުގެ ކުށުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ނަސީބު ސައީދު، އިސްމާއިލް އަނީޤު، އަލީ އިރުފާން އަދި މުޙައްމަދު ހުމައިދުއެވެ.

މި މައްސަލައިގައި ދައުވާ ލިބޭ މީހުންގެ ބަންދާމެދު ދައުލަތުން ބުނީ، އެ 4 މީހުންވެސް ބަންދުގައި ބަހައްޓާފައިވާ ސަބަބަށް ބަދަލެއް ނާންނަ ކަމަށާއި، އެއާއެކު ބަންދު ރިވިއު ކުރެވެން ނެތް ކަމަށެވެ.

އޭގެ އިތުރުން، މައްސަލައިގައި ދެ ފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އިސްމާއިލް ރަޝީދު ވަނީ އަންނަ ނޮވެމްބަރު މަހުގެ 9 ވަނަ ދުވަހު ސިއްރު ހެކިވެރިޔާ 1 ހާޒިރު ކުރުމަށް ދައުލަތަށް އިތުރު ފުރުސަތެއް ދެއްވައި ޝަރީއަތުގެ މަޖިލިސް ނިންމަވާފައެވެ.

ކްރިމިނަލް ކޯޓުގެ ޝަރީއަތްތައް އަވަހަށް ނިންމުމަށްޓަކައި، ޖިނާއީ އިޖުރާއަތުގެ ޤާނޫނުގެ 142 ވަނަ މާއްދާގެ (ށ) ގައި ބަޔާން ކުރާ "މެދު ނުކެނޑި ޝަރީއަތް ކޮށް ނިންމުން" (ކޮންޓިނިއަސް ހިއަރިންގ) މަފްހޫމްގެ ދަށުން ކޯޓުގެ މައްސަލަތައް ކުރިއަށް ގެންދިއުމަށް ކްރިމިނަލް ކޯޓުގެ ގާޒީންގެ އާންމު މަޖިލީހުން މިހާރު ވަނީ ނިންމާފައެވެ. އެގޮތުން ކޮންޓިނިއަސް ޝަރީއަތް ކުރިއަށްދާއިރު، ދައުވާއަށް އިންކާރު ކުރާނަމަ ޚުލާސާ ބަޔާން އިއްވާތާ 30 ދުވަސްތެރޭ ޙުކުމް ކުރާނެއެވެ.

މި މަފްހޫމުގެ ދަށުން ކްރިމިނަލް ކޯޓުން ވަނީ މެދު ނުކެނޑި ހިނގާ ޝަރީއަތްތައް ކުރިއަށް ގެންދަން ފަށާފައެވެ. އެގޮތުން އޮޅުވާލައިގެން "ގްރޫމް" ކޮށްގެން ކުޑަކުއްޖަކަށް ޖިންސީ ގޯނާ ކުރި މައްސަލައެއްގައި 8 ގަޑިއިރު ވަންދެން ޝަރީއަތް ކުރިއަށް ގެންގޮސް، 14 ހެކިންގެ ހެކިބަސް ނަގާފައި ވެއެވެ.