ނައިފަރު ފެނުގެ މަޝްރޫއުގެ ނުނިމި ހުރި މަސައްކަތް ކުރުމަށް ހަވާލުކޮށްފި
27 އޮކްޓޯބަރު 2020 | އަންގާރަ 06:18ފެން ހޮޅި ވަޅުނުލާހުރި ތަންތަނުގައި ފޮންހޮޅި ވަޅުލާނެ
އެއްބަސްވުމުގައި ސޮއިކުރި ރަސްމިއްޔާތުގެ ތެރެއިން
ޅ.ނައިފަރުގެ ފެނުގެ މަޝްރޫއުގެ ނުނިމި ހުރި މަސައްކަތް ކުރުމަށް މާލޭ ވޯޓަަރ އެންޑް ސްވަރޭޖް ކޮމްޕެނީ (އެމްޑަބްލިޔުއެސްސީ)އާއި ހަވާލުކޮށްފިއެވެ.
ހޯމަ ދުވަހު މިކޮންޓެކްޓްގައި މިނިސްޓްރީ އޮފް ނޭޝަނަލް ޕްލޭނިންގ، ހައުސިން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫގެއެވެ. މާލޭ ވޯޓަރ އެންޑް ސްވަރޭޖް ކޮމްޕެނީ ޕްރައިވެޓް ލިމިޓެޑްގެ ފަރާތުން ސޮއިކުރެއްވީ ހަސަން ޝާހެވެ.
ފަސް މަސް ދުވަހުން ނިންމާ ގޮތަށް މިމަޝްރޫއު އެމްޑަބްލިޔުއެސްސީއާ ހަވާލުކޮށްފައިވަނީ 13،136،034.10 ރުފިޔާއަށެވެ.
މިމަޝްރޫއާއި ބެހޭ ގޮތުން އިންފްރާސްޓްރަކްޗަރ މިނިސްޓްރީން ބުނީ ފެނުގެ މަޝްރޫއުގެ ދަށުން މިހާރު ނުނިމި ހުރި ހުރިހާ މަސައްކަތެއް ނިންމުމާއި ސައިޓުގައި މަރާމާތު ކުރަން ޖެހޭ ހުރިހާ މަސައްކަތެއް މަރާމާތު ކުރުން ހިމެނޭ ކަމަށެވެ.
މީގެ ތެރޭގައި މައިގަނޑު މަސައްކަތުގެ ގޮތުގައި ފެން ހޮޅި ވަޅުނުލާހުރި ތަންތަނުގައި ފެންހޮޅި ވަޅުލުމާއި، އާރް.އޯ.ޕްލާންޓް އިންސްޓޯލް ކުރުމާއި، ސްޓޯރޭޖް ޓޭންކު މަރާމާތު ކުރުން، ގޭގެއަށް ފެން ގުޅައި ދިނުމާއި، އައުޓްފޯލް އެޅުން ހިމެނެއެވެ. އަދި މީގެ އިތުރަށް އެޑްމިން އަދި އާރް.އޯ ބިލްޑިންގ މަރާމަތު ކުރުމާއި، ފެން ޓެސްޓު ކުރާނެ ވަސީލަތްތަކާއިއެކު ލެބޯރެޓަރީއެއް ހެދުން ހިމެނޭ ކަމަށް މިނިސްޓްރީން ބުނެއެވެ.
މިމަޝްރޫއަށް ފަންޑު ކުރަނީ އޯޕެކް ފަންޑް ފޮރ އިންޓަނޭޝަނަލް ޑިވެލޮޕްމަންޓް (އޮޕިޑް) ފޭސް 2 އިންނާއި ދިވެހި ސަރުކާރުގެ ބަޖެޓުންނެވެ. އޮޕިޑް ފަންޑް އިން 79 އިންސައްތަ އަދި ދިވެހި ސަރުކާރު 21 އިންސައްތައެވެ.
