ފަތުރުވެރިކަމާއި ސުވެނިއަރ ޝޮޕްތަކާއި ބޮޑަށް ގުޅުވާލުމުގެ ގޮތުން ރާއްޖޭގައި ހިންގާ ސުވެނިއަރ ފިހާރަތަކުގެ ޑައިރެކްޓަރީއެއް އެކުލަވާލުމަށް ނިންމައި ރެޖިސްޓަރވުމުގެ ފުރުސަތު ވިޔަފާރިވެރިންނަށް ހުޅުވާލައިފިއެވެ.

ޓޫރިޒަމް މިނިސްޓްރީން ބުނީ، ސްވެނިއަރ ވިޔަފާރިއަކީ ފަތުރުވެރިކަމާއި ގުޅުންހުރި ވިޔަފާރިތަކުގެ ތެރެއިން މުހިންމު ވިޔަފާރިއެއްކަމަށާއި އެފަދަ ފިހާރަތައް ހިންގާ ފަރާތްތަކަށް ފަތުރުވެރިކަމުގެ މަންފާ ލިބޭނެ މަގު އިތުރަށް ތަނަވަސްވުމަކީ މިމިނިސްޓްރީގެ ވަރަށް ބޮޑު އެދުމެއްކަމަށެވެ. އަދި، ފަތުރުވެރިންނަށް ސްވެނިއަރ ޝޮޕްތަކުން ލިބިދޭ ޚިދުމަތްތައް އެންމެ ފުރިހަމަ ގޮތެއްގައި ލިބިދިނުމަކީ ރާއްޖޭގެ ފަތުރުވެރިކަން ކުރިއެރުވުމަށް ލިބޭނެ ފުރުޞަތަކަށް ވާނެކަމަށާއި ފަތުރުވެރިކަމާއި ސުވެނިއަރ ޝޮޕްތަކާއި ބޮޑަށް ގުޅުވާލުމުގެ ގޮތުން ރާއްޖޭގައި ހިންގާ ސުވެނިއަރ ފިހާރަތަކުގެ ޑައިރެކްޓަރީއެއް އެކުލަވާލުމަށް މަސައްކަތް ކުރަމުން އަންނަކަމަށެވެ.

އެގޮތުން، ސްވެނިއަރ ވިޔަފާރި ދަފްތަރުގައި ހިމެނުމަށް ބޭނުންވާ ވިޔަފާރިތަކުން މިނިސްޓްރީގެ ވެބްސައިޓްގައިވާ ފޯމް ފުރިހަމަކޮށް، ނޮވެމްބަރު މަހުގެ 8ގެ ކުރިން އީ-މެއިލް ކުރުމަށް މިނިސްޓްރީއިން ވަނީ އެދިފައެވެ.