ނޭޝަނަލް އިންޓެގްރިޓީ ކޮމިޝަންގެ މެމްބަރު ކަމަށް ހަތަރު ބޭފުޅަކު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހް، އައްޔަން ކުރައްވައިފިއެވެ.
އެގޮތުން ނޭޝަނަލް އިންޓެގްރިޓީ ކޮމިޝަންގެ މެންބަރު ކަމުގެ މަޤާމަށް އައްޔަން ކުރެއްވި ހަތަރު ބޭފުޅުންނަކީ، ގާސިމް ޢަބްދުލްކަރީމާއި، އާމިނަތު ޝާދިޔާއާއި، އޒ. އާޝިޔަތު ޝިއުނާގެ އިތުރުން އޒ. ޝުއައިބު އަބްދުއްރަހްމާނެވެ.
ހޯމަ ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައި ނޭޝަނަލް އިންޓެގްރިޓީ ކޮމިޝަންގެ މެންބަރު ކަމަށް ޢައްޔަން ކުރެއްވި ކަމުގެ ލިޔުން، ރައީސުލްޖުމްހޫރިއްޔާ އެ ބޭފުޅުންނާ ހަވާލު ކުރެއްވިއެވެ.
މި ހަތަަރު ބޭފުޅުން މަގާމާ ހަވާލުވެ ވަޑައިގަތުމުން ނެޝަނަލް އިންޓެގްރިޓީ ކޮމިޝަންގައި ގާނޫނު ބުނާ އަދަދަށް، ފަސް މެމްބަރުން މިހާރު ތިއްބަވާނެއެވެ. މި ކޮމިޝަނުގައި ކުރިން ހުންނެވީ ކާނަލް (ރޓޑ) އަހުމަދު ޖިހާދު އެކަންޏެވެ. ކުރިން އެ ކޮމިޝަނުގައި ތިއްބެވި މެމްބަރުން މަގާމުން އިސްތިއުފާ ދެއްވީ، ރައްޔިތުންގެ މަޖިލިހުން އެ މެމްބަރުންގެ މައްސަލަތަކެއް ބަލަމުން ގެންދަނި ކޮށެވެ.
