ސީޝެލްސްގެ ނައިބް ރައީސަކަށް އަފީފްގެ ދަރިކަލުން

ރައީސް އިބްރާހިމް ނާސިރުގެ ދައުރުގައި ދެކުނުގެ ހަތަރު އަތޮޅު ގުޅިގެން މައި އުފެއްދި ސުވައިދީބު ޖުމްހޫރިއްޔާގެ ރައީސް އަބްދުﷲ އަފީފްގެ ދަރިކަލުން، އަހުމަދު އަފީފް، ސީޝެލްސްގެ ނައިބް ރައީސް ކަމަށް އިންތިހާބުވެ ވަޑައިގެންފިއެވެ.

ސީޝެލްސްގެ ރިޔާސީ އިންތިހާބު ބާއްވާފައި ވަނީ މި މަހުގެ 22 އިން 24 އަށެވެ. 74،000 މީހުން ވޯޓުލި އިންތިހާބުގައި ނައިބް ރައީސް ކަމުގެ މަގާމަށް އަފީފް ހޮވިވަޑައިގެންނެވީ އިންތިހާބު ކާމިޔާބު ކުރެއްވި ވެވެލް ރަމްކަލަަވަންގެ ރަނިން މޭޓްގެ ހައިސިއްޔަތުންނެވެ. ރަމްކަލަވަން، އިންތިހާބު ކާމިޔާބު ކުރެއްވީ ވޯޓުލީ މީހުންގެ 54.9 އިންސައްތަ ވޯޓު ހޯދައި ގެންނެވެ.

ސިޔާސީ މަސައްކަތްތަކުގައި ގިނަ ދުވަސްތަކެއް ހޭދަ ކުރައްވަމުން ގެންދަވާ އަހުމަދު އަފީފް ވަނީ މީގެ ކުރިން ޝީޝެލްގެ ގާނޫނު ހަދާ މަޖިލީހުގެ މެމްބަރު ކަމާއި، މަޖިލީހުގެ ނައިބް ރައީސް ކަމުގެ މަގާމު ވެސް ފުރުއްވާފައެވެ. އޭގެ ކުރިން އެމަނިކުފާނު ވަނީ އެ ގައުމުގެ ސެންޓްރަލް ބޭންކު، ފިނޭންސް މިނިސްޓްރީގެ އިތުރުން ކެބިނެޓްގެ އެކި މަގާމުތައް ފުރުއްވާފައެވެ.