ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން އެއިންޓްރެކްޓް ފްރެންކްފަޓް އަތުން އެންމެ ފަހުން ޗެމްޕިއަން ބަޔާން މިއުނިކް ބޮޑު މޮޅެއް ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ބަޔާން މޮޅުވީ 5-0 ނަތީޖާއަކުންނެވެ.

ބަޔާނުގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އެ ޓީމުން ލީޑު ނަގާފައިވަނީ މެޗު ފަށައިގެން 10 ވަނަ މިނެޓުގައެވެ. ކިންގްސްލީ ކޯމަނުގެ އެހީއާއެކު މި ލަނޑު ބަޔާނަށް ކާމިޔާބުކޮށްދިނީ ފަހަކަށް އައިސް ތަފާތު މޮޅު ކުޅުމެއް ދައްކަމުން އަންނަ ފޯވާޑް ރޮބަޓް ލެވަންޑޯސްކީއެވެ. އަދި މެޗުގެ 26 ވަނަ މިނެޓުގައި ޖޯޝުއާ ކިމިޗުގެ އެހީއާއެކު ލެވަންޑޯސްކީ ވަނީ ބަޔާނަށް ލީޑު ފުޅާކޮށްދީފައެވެ.

މެޗުގެ ދެވަނަ ހާފުގައިވެސް ބަޔާނުން ރަނގަޅު ކުޅުމެއް ދެއްކިއިރު، މެޗުގެ 60 ވަނަ މިނެޓުގައި ޑަގްލަަސް ކޮސްޓާގެ އެހީއާއެކު ލެވަންޑޯސްކީ ވަނީ އިތުރު ލަނޑެއް ޖަހާ އޭނާގެ ހެޓްރިކް ފުރިހަމަ ކޮށްފައެވެ. މިއީ މި ސީޒަނުގެ ޖަރުމަން ލީގުގައި މިހާތަނަށް ކުޅުނު ފަސް މެޗުގައި ލެވަންޑޯސްކީ ކާމިޔާބުކުރި 10 ވަނަ ލަނޑެވެ.

މި މެޗުގައި ބަޔާނުން ކާމިޔާބުކުރި ހަތަރުވަނަ ލަނޑު މެޗުގެ 72 ވަނަ މިނެޓުގައި ލެރޯއި ސާނޭ ކާމިޔާބުކޮށްދިންއިރު، އެ ޓީމުގެ ފަސްވަނަ ލަނޑު އިތުރު ވަގުތުގައި ޖަހައިދިނީ ޖަމާލް މުސިއާލާއެވެ.

މި މޮޅާއެކު ތާވަލުގެ ދެވަނައިގައި އޮތް އެންމެ ފަހުގެ ޗެމްޕިއަން ބަޔާން އާއި ތިންވަނައިގައި އޮތް ބޮރޫޝިއާ ޑޯޓްމުންޑަށްވެސް ވަނީ ކުޅުނު ފަސް މެޗުން 12 ޕޮއިންޓް ލިބިފައެވެ. ހޮނިހިރު ދުވަހުގެރޭ ޑޯޓްމުންޑުން ވަނީ އަމިއްލަ ދަނޑުގައި ޝާލްކާ އަތުން 3-0 ން މޮޅުވެފައެވެ.

މީގެ އިތުރުން ޖަރުމަން ލީގުގެ ތާވަލުގެ އެއްވަނައިގައި އޮތީ ހޮނިހިރު ދުވަހުގެރޭ ހާތާ ބާލިން އަތުން 2-1 ން މޮޅުވީ އާރްބީ ލެއިޕްޒީގެވެ. އެ ޓީމަށް ވަނީ ފަސް މެޗުން 13 ޕޮއިންޓް ލިބިފައެވެ.