ޔުއެފާ ޔޫރޮޕާ ލީގުގައި ބުރާސްފަތި ދުވަހުގެރޭ ކުޅުނު މެޗުތަކުން އާސެނަލާއި ޓޮޓެންހަމް ހޮޓްސްޕާވެސް މޮޅުވެއްޖެއެވެ.

އާސެނަލް މޮޅުވީ ރަށުން ބޭރުގައި ފަހަތުން އަރައި ރެޕިޑް ވިއެން އަތުން 2-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފު ފަށައިގެން ހަވަނަ މިނެޓުގައި ރެޕިޑް ވިއެނުން ވަނީ ލީޑު ނަގާފައެވެ. އާސެނަލުގެ ގޯލްކީޕަރު ބާން ލެނޯއަށް ހެދުނު ގޯހެއްގެ ފައިދާ ނަގައި މި ލަނޑު ރެޕިޑް ވިއެނަށް ކާމިޔާބުކޮށްދިނީ ޓަކްސިއާކިސް ފޯންޓަސްއެވެ.

މެޗުގައި އާސެނަލުން ނަތީޖާ އެއްވަރުކޮށްފައިވަނީ 70 ވަނަ މިނެޓުގައި ޑެވީޑް ލުއިޒް ކާމިޔާބުކުރި ލަނޑުންނެވެ. އަދި އޭގެ ހަތަރު މިނެޓު ފަހުން އާސެނަލުގެ ކެޕްޓަން ޕިއޭ-އެމެރިކް އޮބާމަޔަން ވަނީ އެ ޓީމަށް ލީޑު ނަގައިދީފައެވެ.

އާސެނަލުން އަތުން އަމިއްލަ ދަނޑުގައި ރެޕިޑް ވިއެން ބަލިވިއިރު، މިއީ މިދިޔަ އަށް އަހަރު ތެރޭ ޔޫރޮޕާ ލީގުގެ ގްރޫޕް ސްޓޭޖު މެޗަކުން އަމިއްލަ ދަނޑުގައި ރެޕިޑް ވިއެން ބަލިވި ފުރަތަމަ ފަހަރެވެ.

މި މުބާރާތުގައި ބުރާސްފަތި ދުވަހުގެރޭ ކުޅުނު މެޗުން ޓޮޓެންހަމް މޮޅުވީ ލާސްކް އަތުން 3-0 ގެ ނަތީޖާއަކުންނެވެ.

ގަރެތު ބޭލް މުޅިން އަލަށް ފުރަތަމަ އެގާރައިގައި ހިމަނައިގެން ކުޅުނު ޓޮޓެންހަމުން އަމިއްލަ ދަނޑުގައި ކުޅުނު މި މެޗުގައި ލީޑު ނަގާފައިވަނީ މެޗުގެ 18 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ލޫކަސް މޯރާއެވެ. އަދި މެޗުގެ 27 ވަނަ މިނެޓުގައި ޓޮޓެންހަމުން ވަނީ ލީޑު ފުޅާކޮށްފައެވެ. މިއީ ލާސްކްގެ އަންދްރެސް އަންޑްރާޑޭ އަތުން ބައިކޮޅަށް ވަން ލަނޑެކެވެ.

މެޗުގައި ޓޮޓެންހަމުން ކާމިޔާބުކުރި ތިންވަނަ ލަނޑު އެ ޓީމުން ޖަހާފައިވަނީ މެޗު ނިމެން ހަ މިނެޓަށް ވެފައި ވަނިކޮށެވެ. މި ލަނޑު އެ ޓީމަށް ކާމިޔާބުކޮށްދިނީ މި ސީޒަނުގައި ތަފާތު މޮޅު ކުޅުމެއް ދައްކަމުން އަންނަ ސޮން ހުއެން-މިންއެވެ.

މީގެ އިތުރުން ބުރާސްފަތި ދުވަހުގެރޭ ކުޅުނު މެޗުން ލެސްޓާ ސިޓީ ޒޯރްޔާ ލުހަންސްކް އަތުން 3-0 ން މޮޅުވެފައެވެ.