ނިއު ޒީލެންޑުގެ ބަދަލުގައި އިންގްލެންޑުން ނުކުންނާނީ އަޔަލެންޑާ ދެކޮޅަށް

އިންގްލެންޑުގެ ވެމްބްލީ ސްޓޭޑިއަމުގައި ކުޅެން ހަމަޖެހުނު ބައިނަލްއަގުވާމީ އެކުވެރިކަމުގެ މެޗުގައި ނުކުޅެން ނިއު ޒީލެންޑުން ނިންމުމުން، އަޔަލެންޑާ ދެކޮޅަށް ކުޅެން އިންގްލެންޑުން ނިންމައިފިއެވެ.

އިންގްލެންޑާއި ނިއު ޒީލެންޑުގެ މެޗު ކުރިން ތާވަލުކުރީ އަންނަ ނޮވެމްބަރު މަހުގެ 11 ވަނަ ދުވަހަށެވެ. އެކަމަކު ނިއު ޒީލެންޑުގެ ފުޓުބޯޅަ އެސޯސިއޭޝަނުން ބުނީ އިންގްލެންޑަށް ދަތުރުކުރުމަށްފަހު އެނބުރި ގައުމަށް އަންނައިރު ކަރަންޓީނުވާން ޖެހޭނެ ކަމަށާއި، އެހެން ކަމުން ކުޅުންތެރިންނަށް އެކަމުގެ ތަކުލީފު އުފުލަން ޖެހޭނެތީ، އެ މެޗު ކުޅެން ދަތުރު ނުކުރުމަށް ނިންމާފައިވާ ކަމަށެވެ. އެއާއެކު އެ މެޗު ކެންސަލް ކުރިއެވެ.

އެހެންކަމުން އިނގިރޭސި އެފްއޭއިން ވަނީ ނިއު ޒީލެންޑުގެ ބަދަލުގައި އަޔަލެންޑާ ދެކޮޅަށް ކުޅެން މިހާރު ތާވަލުކޮށްފައެވެ. އެ މެޗު ކުޅޭނީ ނޮވެމްބަރު މަހުގެ 12 ވަނަ ދުވަހުއެވެ.

ނިއު ޒީލެންޑުން އިންގްލެންޑް މެޗު ކެންސަލް ކުރިއިރު، އެ ގައުމުން މިދިޔަ އަހަރުގެ ނޮވެމްބަރުގެ ފަހުން އެކުވެރިކަމުގެ މެޗެއް ކުޅެފައެއް ނުވެއެވެ. މިއަހަރު ނިއު ޒީލެންޑުގެ ފުޓުބޯޅަ އެސޯސިއޭޝަނުން ނެރުނު ކަލަންޑަރުގައި އެކުވެރިކަމުގެ ގިނަ މެޗުތަކެއް ހިމަނާފައިވީ ނަމަވެސް، މީގެ ތެރެއިން ގިނަ މެޗުތަކެއް ވަނީ ކޮވިޑް-19 ގެ ސަބަބުން ކެންސަލް ކޮށްފައެވެ.

އޭގެ ބަދަލުގައި އިންގްލެންޑުން ދާދި ފަހުންވެސް ވަނީ އެކުވެރިކަމުގެ މެޗެއް ކުޅެފައެވެ. އެގޮތުން މި މަހުގެ ނުވަވަނަ ދުވަހު އިންގްލެންޑުން ވަނީ ވެމްބްލީގައި ވޭލްސްއާ ދެކޮޅަށް ކުޅެފައެވެ. އެ މެޗުން އިންގްލެންޑް މޮޅުވީ 3-0 ންނެވެ.

ނޮވެމްބަރު މަހު އިންގްލެންޑުން އަޔަލެންޑާ ދެކޮޅަށް ބައިނަލްއަގުވާމީ އެކުވެރިކަމުގެ މެޗެއްގައި ނުކުންނައިރު، މި ދެ ގައުމު އެންމެ ފަހުން ބައްދަލުކޮށްފައިވަނީ 2015 ވަނަ އަހަރުއެވެ. އަޔަލެންޑުގައި ކުޅުނު އެ މެޗު ނިމުނީ ދެ ގައުމުން ކުރެ ގައުމަކަށް ލަނޑެއް ނުޖެހި އެއްވަރުވެގެންނެވެ.