ފުލުހުންގެ ހިދުމަތް ލާމަރުކަޒުކުރުމާ ގުޅޭ ގޮތުން ސަރުކާރުގެ ސިޔާސަތު މަޖިލިހުން ސާފު ކުރަނީ
ލާމަރުކަޒު ކުރުމުގައި ސަރުކާރުގެ ސިޔާސަތުތައް ބަދަލަވެފައިވާކަމުގެ މައުލޫމާތު ލިބިވަޑައިގަންފައިވާ ކަމަށް ރައީސް ނަޝީދު ވިދާޅުވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ޚިދުމަތް ލާމަރުކަޒު ކުރުން އެއީ ސަރުކާރުގެ ނަޒަރުގައި އެންމެ ރަނގަޅު ގޮތްތޯ ނުވަތަ ނޫންތޯ ސާފު ކޮށްލަ ދެއްވުމަށް ހޯމް މިނިސްޓަރ އައްޝެއިޚް އިމްރާން އަބްދުﷲ ގެ އަރިހުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އެދިވަޑައިގެންފިއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ރައީސް ނަޝީދު ވަނީ ގިނަ މެމްބަރުންތަކެއް އެ މެމްބަރުންގެ ދާއިރާތަކުގައި ފުލުހުންގެ ޚިދުމަތް ލިބޭނެ ދުވަހަކާއި ގުޅޭ ގޮތުން ކަންބޮޑުވުންތަކެއް އެބަހުރި ކަމަށް ވިދާޅުވެފައެވެ. އަދި ގިނަ މެމްބަރުންތަކެއް ވަނީ އެ މެމްބަރުންގެ ދާއިރާތަކުގެ ރަށްރަށުގައި ފުލުހުންގެ ޚިދުމަތް ދެވޭނެ ތާރީހަކާއި ގުޅޭ ގޮތުން މިނިސްޓަރަށް ސުވާލު ކުރައްވާފައެވެ.
އެ ކަންކަމާއި ގުޅިގެން ވާހަކަ ދައްކަވަމުން ރައީސް ނަޝީދު ވިދާޅުވީ މަޖިލީހުގެ ކޮމިޓީގައި މިހާރު ލާމަރުކަޒީ ޤާނޫނު އިސްލާހު ވެގެންދާ ކަމަށާއި ޤާނޫނަށް ހުށަހެޅިފައިވާ އިސްލާހުތަކުގައި ކައުންސިލްތަކަށް ބެލޭނީ ކޮން މިންވަރެއްގެ ކޮން ބާވަތެއްގެ ކަންތައްތަކެއްތޯ ބަޔާން ކޮށް އިސްލާހެއް ހުށަހެޅިފައިވާ ކަމަށެވެ. އަދި މިހާރު ލާމަރުކަޒު ކުރުމުގައި ސަރުކާރުގެ ސިޔާސަތުތައް ބަދަލަވެފައިވާ ކަމުގެ މައުލޫމާތު ލިބިވަޑައިގަންފައިވާ ކަމަށް ރައީސް ނަޝީދު ވިދާޅުވިއެވެ.
މީގެ އިތުރުން ދިވެހި ފުލުހުންގެ ޚިދުމަތުގެ ބިލް ވެސް ކޮމިޓީގައި ދިރާސާ ކުރަމުން އަންނަ ކަމަށާއި އެ ބިލް އިސްލާހު ކުރުމުގެ މަސައްކަތް ކުރެވެމުންދާ އިރު ލާމަރުކަޒީ ނިޒާމަށް ފުލުހުންގެ މަސައްކަތް އިންތިޒާމު ކުރުމަށް ފިކުރެއް ގެންގުޅެވޭ ކަމަށް ރައީސް ނަޝީދު ވިދާޅުވިއެވެ. އަދި އެކަން އެ މަގަށް ހިނގުމުގައި މެމްބަރުންގެ ދާއިރާތަކުގައި ފުލުހުންގެ ޚިދުމަތް ފޯރުކޮށް ދެވޭނެ އިންތިޒާމު ހަމަޖެހިގެން ދާނީ މެމްބަރުންގެ ބައިވެރިވުން އެ ކަމުގައި އޮވެގެންކަމަށް ދެކެވަޑައިގަންނަވާ ކަމަށް ރައީސް ނަޝީދު ވިދާޅުވިއެވެ.
ދިވެހި ފުލުހުންގެ ޚިދުމަތުގެ ބިލް މި މަސް ނިމެންވާއިރު ދިރާސާކޮށް ނިންމުމަށް ކޮމިޓީން އަންނަނީ މަސައްކަތް ކުރަމުންނެވެ. ދައުރު ފެށުމުގެ ގޮތުން މީޑިއާތަކަށް މައުލޫމާތު ދެއްވަމުން ރައީސް ނަޝީދު ވަނީ މިއީ މި ދައުރު އެންމެ އިސްކަމެއް ދީގެން ކުރެވޭ އެއް މަސައްކަތް ކަމަށް ވިދާޅުވެފައެވެ.
މި ސަރުކާރު އައިސްފައި ވަނީ މައި ސަރުކާރަށް އޮތް ބާރުތައް ބަހާލައި ލާމަރުކަޒު ކުރާނެ ކަމުގެ ވައުދާއެކުއެވެ. އަދި އެކަން އެގޮތުގެ މަތިން ކުރުމަށް ލާމަރުކަޒީ ޤާނޫނަށް ބޮޑެތި ބަދަލުތަކެއް ވެސް މަޖިލީހުން ވަނީ ގެނެސްފައެވެ.
