ޝޭހް އިމްރާން އަތުގައި ހުރި ރިލްވާންގެ މައްސަލައިގެ ހެކިތައް ގެންދިޔައީ ފުލުހުން!
21 އޮކްޓޯބަރު 2020 | ބުދަ 05:53އިމްރާން ވިދާޅުވީ އެ ހެކިތައް ނެގި ފުލުހުން ހޯދުމަށް ކުރަންޖެހޭނީ ތަހުގީގެއް
މޭ ޑޭގައި ބޭއްވި މުޒާހަރާގައި ޝެއިހް އިމްރާން އަބްދުﷲ ވާހަކަ ދައްކަވަނީ
ހޯމް މިނިސްޓަރ ޝެއިހް އިމްރާން އަބްދުﷲ ގެ އަތުގައި ހުރި ރިލްވާންގެ މައްސަލަ އާއި ގުޅުން ހުރި ހެކިތަކެއް ކުރީގެ ރައީސް އަބްދުﷲ ޔާމީން ވެރިކަމުގައި ފުލުހުން ގެންގޮސްފައިވާ ކަމަށް ވިދާޅުވެއްޖެއެވެ.
ބުދަ ދުވަހުގެ ޖަލްސާގައި މިނިސްޓަރާ ކުރެވުނު ސުވާލަކަށް ޖަވާބު ދެއްވަމުން ވިދާޅުވީ 2015 ވަނަ އަހަރުގެ މޭ ޑޭގައި އޭރުގެ އިދިކޮޅުން ކުރިއަށް ގެންދިޔަ މުޒާހަރާގައި ހައްޔަރު ކުރެވުނު އިރު، ރިލްވާންގެ މައްސަލަ އާއި ގުޅުން ހުރި ހެކިތައް ފުލުހުން ނަގާފައިވާ ކަމަށެވެ. އަދި އެ ހެކިތައް ނެގި ފުލުހުން ހޯދުމަށް ކުރަން ޖެހޭނީ ތަހުގީގެއް ކަމަށާއި މިހާރު ވެސް އެތައް ތަހުގީގުތަކެއް ކުރިއަށް ދާ ކަމަށް ވިދާޅުވިއެވެ.
މިހެން ވިދާޅުވުމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ މިނިސްޓަރ އެ ދެއްކެވި ވާހަކަތަކުން ފާހަގަ ކުރެވެނީ ގަދަ ބާރުން ހެކި ނައްތާލާފައިވާ ކަމަށެވެ.
މޭ ޑޭގައި ކުރެވުނު މުޒާހަރާގެ ބައިވެރިން ޖުމްހޫރީ މައިދާނާ ހަމައަށް ދިއުމުން، ސަލާމަތީ ހިދުމަތްތަކުން، ބާރުގެ ބޭނުން ކޮށް މުޒާހަރާ ރޫޅާލައި ގިނަ ބަޔަކު ހައްޔަރުކުރިއެވެ. އެ މުޒާހަރާގައި ފުލުހުންނަށް އަނިޔާ ކުރިކަން ސާބިތުވެ، ބައެއް މީހުން ޖަލަށްލިއެވެ. މޭޑޭ މުޒާހަރާ އެއީ މިހާތަނަށް ރާއްޖޭގައި ހިންގުނު އެންމެ ބޮޑު އެއް މަގުމަތީ ހަރަކާތެވެ.
