ޖަރުމަނުގެ ދެކުނު ފަރާތު އަވަށެއް ލޮކްޑައުން ކޮށްފި

ކޮވިޑް-19 ހަލުވިކަމާއި އެކު ފެތުރެމުން އަންނާތީ ޖަރުމަނުގެ ބާޗްޓެސްގައިޑްނާ ދެވަނަ ފަހަރަށް ލޮކްޑައުން ކޮށްފިއެވެ.

އޮސްޓްރިއާ ބޯޑަރު ކައިރީގައި އޮންނަ މި އަވަށަކީ 105،000 މީހުންގެ އާބާދީގެ އަވަށެކެވެ. ޖަރުމަނު ސަރުކާރުން ބުނީ އެ އަވަށުގައި ހަލުވި ކަމާއި އެކު ކޮވިޑް-19 ފެތުރެމުން އަންނާތީ ކުރިޔަށް އޮތް ދެ ހަފްތާއަށް ބާޗްޓެސްގައިންޑާ ލޮކްޑައުން ކޮށްފައިވާ ކަމަށާއި، އެހެންކަމުން އާންމުންނަށް ގެއިން ބޭރަށް ނުކުމެ އުޅެވޭނީ ކަމާއި ބެހޭ ފަރާތްތަކުގެ ހުއްދަ ހޯދާ ޒަރޫރީ ބޭނުންތަކަށް އެކަނި ކަމަށެވެ.

ޖަރުމަނުގެ އިތުރުން ޔޫރަޕްގެ ގިނަ ގައުމުތަކަކުން ފާއިތުވެދިޔަ ދެ ހަފްތާ ކޮވިޑަށް މީހުން ޕޮޒިޓިވްވަމުން އަންނަ މިންވަރު ވަނީ އިތުރުވެފައެވެ.

ޖަރުމަނުގެ ސަރުކާރުން ވަނީ ކޮވިޑް ފެތުރުން ކޮންޓްރޯލް ކުރުމުގެ ގޮތުން އެ ގައުމުގެ ސްކޫލްތަކާއި، ރެސްޓޯރެންޓްތަކާއި ޕާކުތައް އަދި ޖިމްތައް ކުރިޔަށް އޮތް ދެ ހަފްތާއަށް ބަންދު ކޮށްފައެވެ. އަދި ކޮވިޑް ކޮންޓްރޯލް ކުރުމަށް އެ ގައުމުގެ ސަރުކާރުން ގިނަ މަސައްކަތްތަކެއް ކުރަމުން އަންނައިރު، މިހާރު އަޅާފައިވާ ފިޔަވަޅުތައް ހަރުކަށި ކުރާނެ ކަމަށް އެގައުމުގެ ސަރުކާރުން ވަނީ ބުނެފައެވެ.

ޖަރުމަންވިލާތަކީ މުޅި ދުނިޔެއިން 18 ވަނައަށް އެންމެ ގިނަ މީހުން ޕޮޒިޓިވްވެފައިވާ ގައުމެވެ. އެގައުމުން މިހާތަނަށް 372،255 މީހުން ކޮވިޑަށް ޕޮޒިޓިވްވެފައިވާއިރު، މިބަލީގައި އެގައުމުން 9،892 މީހުން ވަނީ މަރުވެފައެވެ.