ކޮވިޑް-19 އަށް އުފައްދާ ވެކްސިން ހަމަހަމަކަމާއެކު ހުރިހާ ގައުމުތަކަށް ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އެކުލަވާލާފައިވާ ކޮވެކްސް ފެސިލިޓީގައި 184 ގައުމު ބައިވެރިވެއްޖެއެވެ.

ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ޑަބްލިއުއެޗްއޯގެ ޗީފް ޓެޑްރޯސް އަދަނޯމް ގެބްރިއޭސަސް ވިދާޅުވީ އެ ފެސިލިޓީގައި އެންމެ ފަހުން ބައިވެރިވެފައިވާ ދެ ގައުމަކީ އެކުއެޑޯ އާއި އުރުގުއޭ ކަމަށެވެ.

ދުނިޔޭގެ ބޮޑެތި އިގްތިސާދުތައް ކަމުގައި ރަޝިއާ އަދި އެމެރިކާ ނޫން އެހެން ބޮޑެތި ގައުމުތަކުން ވަނީ މި ފެސިލިޓީގައި ބައިވެރިވުމަށް ނިންމާފައެވެ. ދާދި ފަހުން ދުނިޔޭގެ ދެވަނައަށް އެންމެ ބޮޑު އިގްތިސާދު ކަމުގައިވާ ޗައިނާއިން ވެސް ވަނީ މި ފެސިލިޓީގަައި ބައިވެރިވެފައެވެ.

ކޯވެކްސް ގެ މައިގަނޑު މަގްސަދަކީ 2021 ގެ ނިޔަލަށް ކޮވިޑް-19 ވެކްސިންގެ ދެ ބިލިއަނަށް ވުރެ ގިނަ ޑޯޒް ހޯދުމެވެ. އަދި މި ފެސިލިޓީގައި ބައިވެރިވާ ގައުމުތަކުގެ ތެރެއިން ވެކްސިން އުފައްދާ ގައުމުތަކުން މިކަމަށް ވަކި ވަރެއްގެ އެހީތަކެއް ވުމަށް ޑަބްލިޔުއެޗްއޯއާ އެކު އެއްބަސްވާން ޖެހެއެވެ.