ހިޔާ ފްލެޓްތަކުން ކުލި ނަގާނީ ފިނިޝިންގ މަސައްކަތަށް ވަގުތު ދިނުމަށް ފަހު: އެޗްޑީސީ
ފިނިޝިންގ މަަސައްކަތްތައް ނިންމުމަށް އެކަށީގެންވާ މުއްދަތެއް ދޭނެކަމަށް ވިދާޅުވި
ހިޔާ މަޝްރޫއުގެ ދަށުން އިމާރާތްކޮށްފައިވާ ފްލެޓްތައް
ހިޔާ ފްލެޓްތަކުން ކުލި ނަގަން ފަށާނީ ފިނިޝިންގ މަސައްކަތް ނިންމަން ވަގުތު ދިނުމަށް ފަހުގައި ކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
ހޯމަ ދުވަހުގެ ރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އެޗްޑީސީގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވީ އަމާޒަކީ އަންނަ އަހަރުގެ ފެބްރުއަރީ މަހަށް މަސައްކަތްތައް ނިންމާ، ސަރުކާރުން ކަނޑައަޅާ ފަރާތްތަކާ ފްލެޓްތައް ހަވާލު ކުރާނެ ކަމަށެވެ. އަދި ތަށި މުށި ހަރުކުރުމާއި، ދޮރު ހަރު ކުރުމާއި ބޮކި ހަރު ކުރުމަށް، އެކަށީގެންވާ މުއްދަތެއް ފްލެޓް ލިބޭ ފަރާތްތަކަށް ލިބިގެން ދާނެ ކަމަށް ވިދާޅުވިއެވެ.
ވަގުތު ދެވިގެން ދާނެ ކަމަށް ވިދާޅުވި ނަމަވެސް، އެއީ ކިހާ މުއްދަތެއްތޯ ސުހައިލް ވިދާޅެއް ނުވެއެވެ.
ސުހައިލް ވިދާޅުވީ ކަނޑައެޅިފައިވާ ޝެޑިއުލްއާ އެއްގޮތަށް ފްލެޓްތަކުގެ މަސައްކަތް މިހާރު ވެސް ކުރިއަށްދާ ކަމަށާއި އެ އަމާޒަށް ވާސިލު ވުމަށް، ފްލެޓްތައް ހަދަމުން ދިޔަ ކޮންޓްރެކްޓަރުންނާއި، އެޗްޑީސީން ދެ ބަޔަކަށް ބަހާލައިގެން މަސައްކަތްތައް ކުރަމުން ގެންދާ ކަމަށެވެ.
ސުހައިލް އިތުރަށް ވިދާޅުވީ ފޭސް 2 އަކީ ގިނަ ބަޔަކު އާބާދުވެގެންދާ ސަރަހައްދަކަށް ވުމާއި އެކު، އެ ސަހައްދުގައި ޕާކިންގ އޭރިއާ އާއި ދެ ބަސް ސްޓޮޕް ގާއިމް ކުރުމުގެ މަސައްކަތް ވެސް ކުރިއަށްދާ ކަމަށެވެ. އަދި އެ ސަރަހައްދުގެ ރައްޔިތުން ހިތް ފަސޭހެ ކޮށްލުމަށް ޕާކެއް އެޅުމުގެ މަސައްކަތް ވެސް ކުރަމުން އަންނަ ކަމަށް ވިދާޅުވިއެވެ.
ހިޔާ މަޝްރޫއުގެ ފްލެޓްތަކުގެ މަސައްކަތް ހަވާލު ކުރެވުނު ކޮންޓްރެކްޓަރާ އެކު އެތަނުގެ ފިނިޝިންގ މަސައްކަތް ކުރުމަށް އެއްބަސްވެވިފައި ނުވާ ކަމަށް ސަރުކާރުން ވަނީ ހާމަ ކޮށްފައެވެ. އެހެންކަމުން، މި ތަންތަން އާންމުންނާ ހަވާލު ކުރެވިގެން ދާނީ ފިނިޝިންގ މަސައްކަތް ނުނިންމައެވެ.
ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކަށް ބަދަލު ނުވެވި ގިނަ ދުވަސްތަކެއް ވަމުން ދިއުމާއި ގުޅިގެން އާންމުންގެ ގިނަ ކަންބޮޑުވުންތަކެއް ހުރުމާ އެކު ސަރުކާރުން އަންނަނީ ފްލެޓްތަކުގެ ހައްގުވެރި ފަރާތްތަށް ދެނެގަތުމުގެ މަސައްކަތް ކުރަމުންނެވެ. އެގޮތުން ބައެއް ކެޓެގަރީތަކަށް ޝަރުތު ހަމަވާ މީހުންގެ ނަންތައް ވަނީ އާންމުު ކޮށްފައެވެ.
މި ލިސްޓުތަކަށް ޝަކުވާ ހުށައެޅުމަށް ހުޅުވާލުމަށް ފަހު، ފްލެޓްތައް ލިބޭ ފަރާތްތަކުގެ ދާއިމީ ލިސްޓު އިއުލާން ކުރުމުގެ މަސައްކަތް އަންނަނީ ކުރަމުންނެވެ. ދާއިމީ ލިސްޓު އިއުލާން ކުރުން ލަސްވެގެން އުޅެނީ، ކޮވިޑްގެ ހާލަތާއި ގުޅިގެން ގޭގެއަށް ގޮސް ދިރިއުޅުމުގެ ހާލަތު ބެލުމަށް ހުރަސް އެޅިފައި އޮތުމުން ކަމަށް ފްލެޓް ކޮމިޓީން ވަނީ ހާމަ ކޮށްފައެވެ.
