މިނިވަން ނޫހުގެ ނޫސްވެރިޔާ އަހުމަދު ރިލްވާނު މަރާލި މައްސަލަ ތަހުގީގުކުރާ ޓީމުގައި ބައިވެރި ކުރަން ނިންމި ބޭރުގެ އިންވެސްޓިގޭޓަރަކު ވަރަށް އަވަހަށް ރާއްޖެ އަންނާނެ ކަމަށް ރައީސް އޮފީހުން ބުނެފިއެވެ.

އެ މައްސަލަ ތަހުގީގުކުރާ ޓީމުގައި އިތުބާރު ކުރެވޭ ބޭރުގެ އިންވެސްޓިގޭޓަރަކު ބައިވެރިކުރަން ނިންމިކަން ހާމަކުރެއްވީ ރިލްވާން ގެއްލުވާލީތާ ހަ އަހަރު ފުރުމާއި ގުޅިގެން އޮގަސްޓު މަހުގެ 8 ވަނަ ދުވަހު، ރައީސް އިބްރާހިމް މުހައްމަދު ސޯލިހުއެވެ.

ބޭރުގެ ތަޖުރިބާކާރު ގެނައުމާއި ގުޅޭ ގޮތުން ރައީސް އޮފީހުގެ ތަރުޖަމާނު އިބްރާހީމް ހޫދު ''ރާއްޖެ.އެމްވީ'' އަށް ވިދާޅުވީ ކުރިޔަށް އޮތް މަދު ދުވަސްކޮޅު ތެރޭގައި، ބޭރުގެ ތަޖުރިބާކާރު ރާއްޖެ އަންނާނެ ކަމަށެވެ. ނަމަވެސް ވަކި ތާރީހެއް ނުވަތަ އެކަމާއި ގުޅޭ އިތުުރު މައުލޫމާތެއް ހޫދު ވިދާޅެއް ނުވެެއެވެ. އަދި އެ ތަޖުރިބާކާރަކީ ކޮން ގައުމެއްގެ މީހެއްކަން ވެސް ހާމައެއް ނުކުރައްވައެވެ.

ރިލްވާނުގެ މަރުގެ މައްސަލާގައި ތަޖުރިބާކާރަކު ގެނަނަން ސަރުކާރުން މަސައްކަތް ކުރަމުންދާއިރު, ރިލްވާންގެ މައްސަލަ އަށް އިންސާފު ނުލިބި ލަސްވަމުންދާ ކޮންމެ ދުވަހަކީ އާއިލާ އަށް ލިބޭ އިތުރު ހިތްދަތިކަމެއް ކަމަކަށްވާއިރު، ރިލްވާން އަށް އިންސާފު ހޯދުމަށް މެދުކެނޑުމެއްނެތި މަސައްކަތް ކުރައްވަމުން ގެންދަވާނެ ކަމަށް ރައީސް ސޯލިހު ވަނީ ވިދާޅުވެފައެވެ.

ގަދަކަމުން ގެންގޮސް ރިލްވާން ގެއްލުވާލާފައިވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުގެ ރޭ ހުޅުމާލެއިންނެވެ. ނަމަވެސް މަރު ކޮމިޝަނުން މިހާތަނަށް ހާމަކޮށްފައިވާ މައުލޫމާތުން އެނގޭ ގޮތުގައި ބަޔަކު ރިލްވާނަށް ފާރަލާ ހުޅުމާލެއިން ކާރަކަށް ގަދަކަމުން އަރުވާފައިވެއެވެ. ރިލްވާން ގަދަކަމުން ކާރަކަށް އަރުގައިވެގެން ދިޔަ ރޭގައި، އޭނާ ގެންދިޔައީ ހުޅުމާލޭގައި ފަޅުގައި އަޅާފައި އޮތް ޑިންގީ އަކަށް ކަމަށެވެ. އަދި އެ ޑިންގީގައި އޭނާ ގެންދިޔައީ ކަނޑުގައި އޮތް އުޅަނދަކަށް ކަމަށާ، އޭނާ މަރާލީ އުޅަނދުގައި ކަމަށް މަރު ކޮމިޝަނުން ބުނެފައިވެއެވެ.

އަދި ރިލްވާން މަރާލުމުގެ ކުރިން އޭނާއަށް ޝަހާދަތް ލައިދިން ކަމަށާއި، އޭނާ މަރާލީ ކުފުރު ވުމުން ކަމަށް ބުނެ ކަމުގައި މިހާތަނަށް މައުލޫމާތު ލިބިފައިވާ ކަމަށް މަރު ކޮމިޝަނުން ވަނީ ބުނެފައެވެ. އަދި އޭނާ މަރާލުމަށް ފަހު ގައިގައި ދާ އޮޅުމަށްފަހު ކަނޑުފައްތާފައި ވާ ކަމަށް އިންޓެލް މައުލޫމާތު ލިބިފައި ވާކަމަށް މަރު ކޮމިޝަނުން ހާމަކޮށްފައިވެއެވެ.