ކޮވިޑް-19ގެ ސަބަބުން ދަރިވަރުންނަށް އަސަރު ކޮށްފައިވާ މިންވަރު ދެނެގަތުމަށް ދިރާސާއެއް ހަދަނީ
ދިރާސާ ހެދުމަށް ނިންމާފައިވަނީ ދަރިވަރުންނަށް ކޮށްފައިވާ އަސަރުތައް ދެނެގަތުމަށްޓަކައި
ކޮވިޑް-19 އާއި ގުޅިގެން މާލޭގެ ސްކޫލްތައް ބަންދުކުރުމަށްފަހު އަލުން ކިޔަވައިދޭން ފެށުނު ދުވަހު ދަރިވަރުން ސްކޫލް ކައިރީގައި މަޑުކޮށްލައިގެން
ކޮވިޑް-19 އާއި ގުޅިގެން ދަރިވަރުންގެ ކިޔެވުން މެދުކަނޑާލުމާއި ގުޅިގެންނާއި، ބަލީގެ ސަބަބުން ދަރިވަރުންނަށް އަސަރުކޮށްފައިވާ މިންވަރު ދެނެގަތުމަށްޓަކައި ދިރާސާއެއް ހެދުމަށް ތައްޔާރުވަމުން އަންނަ ކަމަށް އެޑިއުކޭޝަން މިނިސްޓްރީން ހާމަކޮށްފިއެވެ.
ހޮނިހިރު ދުވަހު ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ރަޝީދު ވިދާޅުވީ ދިރާސާ ކުރުމަށްޓަކައި ވާންޖެހޭ ހުރިހާ ތައްޔާރީތަކެއް ވެފައިވާ ކަމަށާއި، މި ހާލަތުގައި ދަރިވަރުންގެ ލާރނިންގ ލޮސް ހުރީ ކިހާވަރަކަށްތޯ ބެލުމަށްޓަކައި އެ މަސައްކަތް ވެސް ކުރަމުން ދާނެ ކަމަށެވެ.
ޑރ. އަބްދުﷲ ރަޝީދު ވިދާޅުވީ ދަރިވަރުންގެ ކިޔެވުން މެދުކެނޑުނަ ނުދިނުމަށްޓަކައި ޓެލި ކްލާސް މެދުވެރިކޮށް އަދި އޮންލައިންކޮށް ވެސް ކިޔަވައިދިނުމަށް މަސައްކަތް ކުރެވުނު ކަމަށެވެ. އެހެންނަމަވެސް ދަރިވަރުން ސްކޫލަށް ހާޒިރުވެ ޓީޗަރުންނާއި އެހެން ދަރިވަރުންނާއެކު ކިޔެވުމުން އެ ލިބޭ ފައިދާއެއް ގޭގައި ތިބިގެން އޮންލައިންކޮށް ކިޔެވުމުން ނުކުރާކަން އެއީ ވަރަށް ގިނަ ދިރާސާތަކުން ދައްކާފައިވާ ކަމެއް ކަމަށެވެ.
އދ. އިން ހާމަކޮށްފައިވާ މައުލޫމާތުތައް ދައްކާ ގޮތުން ކޮވިޑް-19ގެ ސަބަބުން ދިމާވެފައިވާ މައްސަލަ އަކީ މިހާތަނަށް މުޅި ދުނިޔޭގެ ތައުލީމީ ނިޒާމަށް ދިމާވި އެންމެ ބޮޑު ގޮންޖެހުމެވެ. އަދި މިކަމުގެ ގެއްލުން ބަޔާން ކުރަން ނޭނގޭ ކަމަށާއި، މިކަމުގެ އަސަރު އެތައް ޖީލުތަކަށް ކުރާނެ ކަމަށެވެ.
ޑރ. އަބްދުއްﷲ ރަޝީދު ވިދާޅުވީ ރައްކާތެރިކަމާއެކު ސްކޫލްތައް ހުޅުވައިގެން ދަރިވަރުންނަށް ކިޔަވައި ދިނުމުގެ މުހިންމުކަން ހުރިހާ ފަރާތްތަކުންވެސް ފާހަގަކުރަން ޖެހޭ ކަމަށާއި، މި ސަބަބަށްޓަކައި ދަރިވަރުން ސްކޫލަށް ގެނެސްގެން އަދި ފުރުސަތެއް ލިބޭ އެންމެ އަވަހަކަށް އެކަން ކުރަންޖެހޭ ކަމަށެވެ.
ހޯމަ ދުވަހުން ފެށިގެން ގްރޭޑް 8 ގެ ދަރިވަރުންނަށް ސްކޫލްތަކުގައި ކިޔަވައި ދިނުމަށް ވަނީ ނިންމާފައެވެ. މިކަމާއި ގުޅިގެން ޑރ. އަބްދުﷲ ރަޝީދު ވިދާޅުވީ ކިޔެވުން ނުފެށި ހުރި ގްރޭޑްތަކުގެ ތެރެއިން ގްރޭޑް 8 ގެ ކިޔެވުން އަންނަ ހޯމަ ދުވަހު ފެށިގެންދާނެ ކަމަށާއި، ގްރޭޑް 7 ގެ ކިޔެވުން އޮކްޓޯބަރ 25 ގައި ފެށިގެންދާނެ ކަމަށެވެ. އަދި ސްކޫލްތަކަށް ކުދިން ގެނެސްގެން ކިޔަވައި ދިނުމަކީ ވަރަށް މުހިންމު ކަމެއްކަން ފާހަގަ ކުރައްވާ އޭނާ ވިދާޅުވީ އެޑިއުކޭޝަންގެ އެދުމަކީ ބެލެނިވެރިން މިކަމަށް ސަމާލުކަން ދެއްވާ ގްރޭޑް 8ގެ ދަރިވަރުން ހޯމަ ދުވަހު ސްކޫލް ހުޅުވޭ އިރު އަދި ގްރޭޑް 7 ވެސް ހުޅުވަން ހަމަޖެހިފައިވާ ތާރީހުގައި ދަރިވަރުން ސްކޫލަށް ފޮނުވައި ދެއްވުން ކަމަށެވެ.
ކޮވިޑް-19 އާއި ގުޅިގެން ފިޒިކަލް ކިޔަވައި ދިނުން މެދުކަނޑާލުމާއި ގުޅިގެން އެޑިއުކޭޝަން މިނިސްޓްރީން ވަނީ އޮންލައިންކޮށް ކިޔަވައި ދިނުމަށް ތަމްރީނު ފޯރުކޮށްދީފައެވެ. އެގޮތުން ޓެލި ކިލާސް މެދުވެރިކޮށް ކިޔަވައިދެއްވާ ޓީޗަރުންނަށް ޓީވީ މެދުވެރިކޮށް ކިޔަވައިދޭނީ ކިހިނެއްތޯ އަދި ފުލް ލޮކްޑައުންއަކަށް ދިއުމުން ގޭގައި ތިބެގެން ކިޔަވައިދޭނެ ގޮތްތަކުގެ ތަމްރީނު ދެވިފައިވެއެވެ. އެޑިއުކޭޝަން މިނިސްޓްރީން ބުނީ އޮންލައިންކޮށް ކިޔަވައިދިނުމާއި ގުޅޭ ގޮތުން 3000 ޓީޗަރުންނަށް ބޭސިކް އޮރިއަންޓޭޝަން ދެވިފައިވާނެ ކަމަށެވެ.
