ރާއްޖޭގައި ހިންގާ އެންޓިބޮޑީ ސާވޭގެ ބައިވެރިން ހޮވާނީ ގުރުއަތުން
ސާވޭ ކުރިޔަށް ގެންދަނީ ހަތަރު އުމުރުފުރައަކަށް ބަހާލައިގެން
ސިރޯ ޕްރިވިލެންސް ސަރވޭގައި ސާމްޕަލް ނެގުމުގެ މަސައްކަތްކުރަނީ
ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އާއި ގުޅިގެން އެޗްޕީއޭއިން ކުރިޔަށް ގެންދާ އެންޓިބޮޑީ ޓެސްޓް ދިރާސާ ނުވަތަ ސިރޯ ޕްރިވިލެންސް ސާވޭގައި ސާމްޕަލް ނަގަނީ ގުރުއަތު ނަގައިގެން ހޮވޭ މީހުންގެ ކަމަށް ބުނެފިއެވެ.
އެކަމުގައި އިސްކޮށްއުޅުއްވާ އެމްއެންޔޫގެ ރިސަރޗް ފެކަލްޓީގެ ޑީން ޑރ. ރަހީމާ އަބްދުއްރަހީމް ވިދާޅުވީ މި ސާވޭގެ އެންމެ މުހިންމު ބޭނުމަކީ މާލެ ސަރަހައްދުގެ އާބާދީގެ ތެރެއިން ކުރިން ކޮވިޑް-19 އަށް ހުށަހެޅިފައިވަނީ އާބާދީގެ ކިތައް އިންސައްތަތޯ ބެލުން ކަމަށެވެ. މީގެ ސަބަބުން ކޮވިޑް ފެތުރިފައިވާ ބާރުމިން ދެނެގަނެވި، ސިޔާސަތުތަކަށް އިތުރަށް ގެންނަންވީ ކޮން ބަދަލުތަކެއްތޯ ބެލިގެންދާނެ ކަމަށް ރަހީމާ ވިދާޅުވިއެވެ.
މި ދިރާސާ ކުރަން ބޭނުންކުރަނީ ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން އެކުލަވާލާފައިވާ މެތޮޑޮލަޖީ ކަމަށް ޑރ ރަހީމާ ވިދާޅުވިއެވެ. ސިރޯ ޕްރިވިލެންސް ސާވޭ ކުރިޔަށް ގެންދަނީ ހަތަރު އުމުރުފުރައަކަށް ބަހާލައިގެންނެވެ.
އެއީ 17 އަހަރުން ދަށުގެ ކުދިންނާއި 18 އަހަރާއި 34 އަހަރާ ދެމެދުގެ މީހުންނާއި 35 އަހަރާއި 59 އަހަރާ ދެމެދުގެ މީހުން އަދި އުމުރުން 60 އަހަރުން މަތީގެ އުމުރުފުރާތަކެވެ. މީގެ ތެރެއިން މިހާރު ކުރިޔަށްދަނީ އުމުރުން 17 އަހަރުން ދަށުގެ ކުދިންގެ ސާމްޕަލް ނެގުމުގެ ކަންކަން ކަމަށް ޑރ. ރަހީމާ ވިދާޅުވިއެވެ. މިއީ މިނިސްޓްރީ އޮފް އެޑިޔުކޭޝަންގެ އެހީތެރިކަމާ އެކު ސްކޫލްތަކާއި ގުޅިގެން ކުރިއަށް ގެންދާ މަސައްކަތެކެވެ.
އޮކްޓޯބަރ މަހުގެ 15 ވަނަ ދުވަހު ދުވަހު ފެށި ދިރާސާގެ ބައިވެރިން ގުރުއަތުން ހޮވަން ނިންމެވި ސަބަބު ސާފު ކޮށްދެއްވަމުން ޑރ. ރަހީމާ ވިދާޅުވީ، އެއީ މި ދިރާސާ ވީހާ ވެސް ސައިންޓިފިކް ކޮށް ކުރިއަށް ގެންދިއުމުގެ ބޭނުމުގައި ކުރާ ކަމެއް ކަމަށެވެ.
މި ދިރާސާ ކުރާ ފަރާތްތަކުން މަސައްކަތް ކުރަމުން އަންނަނީ ހަފުތާއެއްގެ ތެރޭގައި އުމުރުން 17 އަހަރުން ދަށުގެ ބައިގެ ސާމްޕަލްތައް ނަގާ ނިންމާލުމަށް ކަމަށެވެ. އަދި ހުރިހާ އުމުރުފުރައެއްގެ މީހުންގެ ސާމްޕަލްތައް ހަތަރު ހަފްތާ ތެރޭގައި ނަގާ ނިންމުމަށް މަސައްކަތްކުރައްވާ ކަމަށް ޑރ. ރަހީމާ ވިދާޅުވިއެވެ.
މީގެ ކުރިން އޭޑީކޭ ހޮސްޕިޓަލުން ވެސް ވަނީ އެންޓިބޮޑީ ޓެސްޓު ހެދުމުގެ މަސައްކަތް ކޮށްފައެވެ. އެ ހޮސްޕިޓަލުން ހާމަކޮށްފައިވާ މައުލޫމާތަށް ބަލާއިރު، ކޮވިޑް-19 އާ ގުޅިގެން ފްރޮންޓްލައިންގައި މަސައްކަތްކުރާ މީހުންގެ ތެރެއިން 3004 މީހެއްގެ އެންޓިބޮޑީ ޓެސްޓު ހެދި އިރު، އޭގެ ތެރެއިން 125 މީހެއްގެ ހަށިގަނޑުން އެންޓިބޮޑީ ވަނީ ފެނިފައެވެ.
